Rei Manaj, gjithmonë e kemi cilësuar si një futbollist “të lindur” me këmishë. Për të veshur fanellën e Barcelonës A dhe për t’u stërvitur me yjet më të mëdhenj të futbollit botëror duhet me patjetër që të kesh lënë shumë gjurmë në kampionatet më të forta të Europës dhe të kesh rrëmbyer vëmendjen e miliona sportdashësve.

Por nuk ishte ky rasti i Rei Manaj. Pas aventurave tërësisht zhgënjyese me ekipet “e dorës së dytë” në Itali pasi u largua si huazim nga Interi, valixhet do të bëheshin gati për të shkuar në Spanjë, te Granada, në një tjetër aventurë që Manaj dështoi tërësisht. Pas kësaj eksperience do të linte një gjurmë të mirë te Albacete në “Segunda Division”, por edhe aty pa pasur vazhdimësinë e duhur.

E në këtë moment vjen…Barcelona. Pa kaluar dy ndeshje në Barcelonën B, Manajt i mbërrin ftesa nga Setien në ekipin e parë. Këtë histori e ka përshkruar mediat prestigjoze “Goal” me titullin: “Nga Interi te Barcelona, lojtari i ndjekur gjithmonë nga fati”.

“Karriera e një lojtari përbëhet nga mundësitë, nga zgjedhjet e duhura në kohën e duhur, të afta për të kthyer një histori në dukje anonime në një drejtim pozitiv. Rei Manaj hyn në këtë kategori: i panjohur në Itali, një shans krejt i papritur në Spanjë ku po ndërtohet një e ardhme dinjitoze. Kur ishte ende i ri kishte shumë shpresa për të dhe do të shqetësonte dy emra të mëdhenj për futbollin në Itali, Interi dhe Juventusi.

Protagonistët e një beteje në treg fituan me një parakalim të denjë në kthesë si Michael Shumacher, për të fituar Interi. Prania e njerëzve si Ikardi, Perisic dhe Jovetic, i pret krahët sulmuesit shqiptar për t’u thirrur në ekipin e parë nga Roberto Mancini, që zgjodhi të debutonte në 23 gusht 2015 me 5 minutat e fundit te Inter-Atalanta”, shkruhet në artikullin që tregon gjithë historinë e karrierës së Rei Manajt, “i përkëdheluri i fatit” dhe që tani kërkon ta shfrytëzojë në maksimum.

Nedim Bajrami është transferuar nga Zvicra drejt Italisë i blerë nga Juventusi. Për këtë, Bajrami është një futbollist në pronësi të bardhezinjve, të cilët e blenë nga Grasshopers për rreth 2 milionë franga zvicerane dhe e ka huazuar tek Empoli. Me këtë të fundit, fantazisti është duke luajtur sezonin e dytë.

Skuadra e Serisë B ka marrëveshje dhe klauzola me bardhezinjtë për kartonin e tij si dhe për rregullimin e çështjeve të bilanceve, kur dihet mirë që Juventusi dhe Empoli kanë marrëveshje të shumta transferimesh.

Fantazisti këtë sezon ka asistuar 6 herë në Serinë B me Empolin dhe ka shënuar 2 gola. Me vlerën e kartonit pesë milionë euro, Bajrami është bërë një nga lojtarët më të vlerësuar në Serinë B italiane.

Në një krahasim nga “Transfermarkt”, ku bien në sy se janë vetëm lojtarë të lindur nga 1 janari 1999, talenti 21-vjeçar është i pesti për vlerën më të lartë të kartonit pas Samuele Riçit (7 mln euro), Davide Fratesit (6 mln euro), Sebastiano Espozitos (6 mln euro) dhe Karlos Augustos (5 mln euro).

Nedim Bajrami ka zgjedhur Shqipërinë. Mesfushori fantazist ka pranuar ftesën e trajnerit Edi Reja dhe insistimin për ta veshur kuqezi.

“Panorama Sport” ka mësuar ekskluzivisht edhe zgjedhjen që ka bërë futbollisti me origjinë nga Tetova dhe mënyrën e ndarjes që ka bërë me përfaqësuesen helvete, pjesë e së cilës ka qenë me U-21.

NDAHET ME ZVICREN

Burime të besueshme në FSHF kanë bërë me dije për gazetën edhe ndarjen që lojtari ka bërë me helvetët. Bajrami ka zhvilluar një videokonferencë me trajnerin e kombëtares së Zvicrës, Petkoviç, si dhe drejtues të federatës helvete për t’u bërë atyre me dije vendimin për të zgjedhur Shqipërinë.

Bajrami ka kërkuar prej tyre respektimin e vullnetit të tij për të luajtur me Kombëtaren e Shqipërisë si dhe ndarjen prej helvetëve me mirëkuptim dhe pa krijuar polemika. Të njëjtat burime në federatë bëjnë me dije se ky ka qenë meraku kryesor i talentit 21-vjeçar, pra që të mos largohet nga Zvicra me polemika. Bajrami ka qenë pjesë e të gjithë zinxhirit të ekipeve kombëtare të Zvicrës që nga U-15 deri së fundmi tek U-21 me të cilën ka regjistruar 12 ndeshje dhe një gol të shënuar. …

”PO” SHQIPËRISË

Vendosmëria e trajnerit Edi Reja ka qenë një nga faktorët që e ka bindur djaloshin të pranojë fanellën kuqezi. Absolutisht, bindjet dhe dëshira e tij personale si dhe e familjarëve të tij janë shtysë për këtë zgjedhje, por biseda dhe kontakti me trajnerin italian dhe drejtues të lartë të FSHF-së kanë qenë intensivë.

Kësisoj, pas bisedës dhe vendimit të komunikuar për trajnerin Petkoviç si dhe drejtuesit e federatës helvete, Bajrami ka njoftuar edhe trajnerin Reja për t’i konfirmuar dëshirën që të luajë me Shqipërinë si dhe duke dhënë dakordësinë e tij që të nisin të gjitha procedurat e ndryshimit të përfaqësueses.

Në vijim, federata shqiptare do të duhet të plotësojë të gjithë dokumentet për kërkesë në FIFA që 21- vjeçari të jetë gati për Shqipërinë në ndeshjet e marsit.