Connect with Us

Një gjerman përdor teknologjinë e printimit 3D për maska mbrojtëse

Blog

Një gjerman përdor teknologjinë e printimit 3D për maska mbrojtëse

Publikuar

-

Ka disa javë që pandemia e Coronës ka ndryshuar jetën e përditshme të njerëzve në Gjermani. Disa janë bërë shumë kreativë, si Dirk Thelen, që pasionin e tij e përdor tani për të prodhuar maskat aq të kërkuara këto kohë.

Pesë printera 3D ka Dirk Thielen në shtëpi. Normalisht ai printon me ta figura filmash si Batmani. Por tani printerat prodhojnë 24 orë në ditë diçka që kërkohet me urgjencë këto kohë. Maskat. 100 copë maska transparente plastike mbrojtëse – të ashtuquajturat “Face Shields” prodhon tani në ditë Dirk Thelen. Pesë printera dhe dy aparate laser, – pasioni që Dirk kishte për printimin 3D tani është kthyer në një prodhim të rëndësishëm. Dirk Thelen furnizon tani personelin mjekësor në azilet e pleqve, që ka nevojë urgjente për maska mbrojtëse.

Dirk Thelen fertigt Schutzmasken für Altenpfleger an (Dirk Thelen)Prodhimi i maskave transparente në dhomën e punës së Dirk Thelen

35-vjeçari punon normalisht si supervizor në një firmë autobusësh, që ndër të tjera iu vihen në dispozicion edhe shkollave. Por shkollat janë mbyllur, autobusët qëndrojnë në vendparkim. Dirk Thielen ëshë dërguar në punë me orar të shkurtuar. Ai jeton pranë Heinsbergut, një nga zonat e para që u kthyen në vatra të krizës së Coronës në Gjermani. Bashkëshortja e tij, Barbara i dha idenë të printonte maskat transparente plastike në dhomën e punës. Ajo vetë punon në një azil pleqsh. Kur filloi kriza e Coronës, personelit i mungonin maskat mbrojtëse. Çmimet që kërkoheshin në treg ishin të papërballueshme, “çmime astronomike”, thotë Dirk Thielen. Kështu ai vendosi të printojë vetë. Bashkëshortja dhe kolegët ishin mirënjohës. Edhe nga banorët në azilin e pleqve erdhën mesazhe pozitive. “Sidomos të sëmurët dementë, që orientohen e ruajnë përmes fytyrës, ishin të gëzuar që maskat ishin transparente.”

Kërkesë e lartë për “Face Shields”

Kanë kaluar katër javë ndërkohë. Ndërkohë Dirk Thielen ka prodhuar 700 Face Shields. Makineritë e nxehin materialin deri në 220 gradë dhe e formojnë në një maskë transparente. Mesatarisht duhet një orë e 40 minuta deri sa një maskë të jetë gati. Para se Face Shields të përdoreshin në azilin e pleqve, Dirk Thelen dhe bashkëshortja e tij bënë një test. “Gruaja ime e vuri maskën dhe unë e sprucova me lëndë pastrimi. Asgjë nuk depërtoi”, thotë Thielen

Megjithatë këto maska nuk mund të krahasohen me Face Shields që përdoren në sallat e operacionit në spitale. Për këtë ato nuk janë menduar. Megjithatë Thielen përpiqet të ruajë higjienën në prodhim dhe përdor gjithmonë dorashka dhe maskë, kur punon me teknologjinë e printimit 3D.

Dirk Thelen fertigt Schutzmasken für Altenpfleger an (Dirk Thelen)
Dirk Thelen

Interes edhe tek prodhuesit e automjeteve dhe azile të tjera

Pasi Thielen furnizoi azilin e pleqve, ku punon gruaja e tij, ai shkroi në Facebook një status, që u përhap shumë. Ai u regjistrua edhe në një faqe online që bashkon ofertat e njerëzve me printera 3D. “Komuniteti i teknologjisë së printimit 3D është i lidhur mirë”, thotë Dirk Thielen. Një prodhues automjetesh e telefonoi dhe porositi maska për të mbrojtur punëtorët. Edhe një azil pleqsh bëri kërkesë, së fundmi i ka ardhur edhe një ofertë nga Berlini. “Më ka shkruar edhe një grua e sëmurë, që duhet të shkojë rregullisht tek mjeku. Ajo donte të porosiste një maskë”.

Dirk Thelen fertigt Schutzmasken für Altenpfleger an (Dirk Thelen)Maskat transparente të Dirk Thelen

Dirk Thielen thotë, se me Face Shields nuk ka ndonjë fitim, ai kërkon vetëm pak euro, për të blerë materialin. Shqetësimi i tij është fatura e rrymës eletrike. “Printerat 3D shpenzojnë shumë rrymë elektrike”, thotë Thelen. Ai i ka shkruar operatorit të rrymës elektrike dhe shpreson për një subvencion ose një përjashtim. Ndërkohë edhe një autoshkollë po bashkëpunon me Dirk Thelen. Ajo ka ofruar printerin e saj 3D. Kështu Thelen mund të vazhdojë të printojë në javët e ardhshme 24 orë në ditë maskat kaq të kërkuara këto kohë./ DW

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Blog

Pse asnjë ushtri në botë nuk mund të krahasohet me atë amerikane

Publikuar

-

Nga

Nga Michael Peck “National Interest”

Arsyeja kryesore:Armët e ushtrisë amerikane, janë ndër më të mirat në botë. Kur është fjala për armë vdekjeprurëse, ushtria amerikane nuk ka asnjë lloj mungese në inventar. Disa prej tyre mund të jenë shumë të shtrenjta, disa tepër komplekse, dhe të tjerat mund të dëshirohen nga politikanët dhe kontraktorët e mbrojtjes, por jo nga trupat në terren.
Gjithsesi, ushtria e sotme amerikane, mund të gjenerojë një sasi mahnitëse të fuqisë së zjarrit, dhe ta përdorë atë në një larmi mjedisesh, nga kundër-rebelimet në formën e luftërave lokale, deri tek lufta e mekanizuar në shkallë të gjerë. Ja cilat janë disa nga armët më të mira të ushtrisë amerikane:

Avioni AH-64 Apache

I pajisur me një top 30 milimetra, raketa “Hellfire” dhe sensorë të sofistikuar, ky avion kombinon shpejtësinë, fuqinë e zjarrit dhe rrezen e madhe të veprimit, çka i jep mundësi ushtrisë amerikane t’i godasë armiqtë e saj shumë kohë përpara se ata të afrohen brenda rrezes së goditjes së trupave tokësore amerikane.
Ky avion është po aq i dobishëm për të goditur rebelët apo kolonat e blinduara të armikut. “Apache”, ka luftuar mirë në konfliktet e ndryshme nga Operacionin “Stuhia e Shkretëtirës” në vitin 1991 në Gjirin Persik, deri në Luftën e Afganistanit.

Tanku M-1 Abrams

Me një peshë prej 60 ton, ky tank ka një grykë zjarri 120-milimetër, i blinduar me një shtresë uraniumi të varfëruar, dhe ka një shpejtësi maksimale prej më shumë se 64 km/h. Ai i dërrmoi forcat e blinduara të prodhimit sovjetik që zotëronte ushtria e Irakut në vitin 1991, dhe ka shumë të ngjarë të bëjë të njëjtën gjë edhe me tankun më të përparuar që zotëron sot Kina, “Type 99”.
Shumë pak tanke “M-1 Abrams”, janë shkatërruar në luftime.Fakti që ISIS ka shkatërruar ose kapur tanke të këtij lloji të përdorur nga qeveria irakiane, flet më shumë për cilësinë e dobët të ekuipazhit, sesa të vetë tankut.



TopiM-109A6 Paladin

Ky top përdoret shumë nga ushtria amerikane në luftërat e vogla. Gjithsesi, mbetet një armë shumë e fuqishme.Paladin është versioni i fundit i topit të famshëm “M-109”.Ai mund të gjuajë deri në 32 km larg një predhë të kalibrit 155 milimetra.Topi mund të përdorë gjithashtu predhën “Excalibur”, të pajisur me lazer dhe të drejtuar përmes sistemit GPS.

Raketa antitank TOW

Kjo raketë është ende e fortë pas gati 45 vitesh në shërbim. Ajo ka shkatërruar shumë tanke – kryesisht ruse – në Vietnam, Luftërat Arabo-Izraelite, Luftën Iran-Irak dhe tani luftën në Siri. “TOW 2B”, raketa më e re vjen në disa versione, përfshirë një raketë që godet bunkerët, si dhe modelin ‘Aero’, i cili shpërthen mbi tank për të depërtuar në blindat e tij të hollë.

Arma automatike M-2

Mund të duket e çuditshme të klasifikosh një mitraloz 80-vjeçar, si një nga armët më të mira të ushtrisë amerikane.Por fakti që “M-2” po reziston pas gati një shekulli dhe luftërash të panumërta, dëshmon se është një armë e jashtëzakonshme.E zhvilluar qëkur Frenklin Ruzvelt u zgjodh president, dhe kur Hitleri sapo ishte ngjitur në pushtet në Gjermani, M-2 është përdorur në të gjithë botën si një mitraloz anti-ajror por dhe anti-blind./Përshtatur nga CNA.al

LEXO TE PLOTE

Blog

Si u formua bota moderne nga epidemitë e 500 viteve më parë

Publikuar

-

Nga

Si u formua bota moderne nga epidemitë e 500 viteve më parë

Nga Matthew Ward “The Conversation”

Pandemia e koronavirusit, është krahasuar me shumë epidemi të mëparshme, përfshirë Murtajën e Madhe dhe pandeminë e Gripit Spanjoll të vitit 1918. Gjithsesi, është marrë shumë pak parasysh ndoshta episodi historik më i rëndësishëm i sëmundjes.

Bota moderne siç e dimë nuk do të kishte ekzistuar pa epidemitë që përfshinë Amerikën
në shekujt XVII-XVII. Ishin ato epidemi që i dhanë formë botës moderne. Në vazhdën e eksplorimeve të Kristofor Kolombit, evropianët mbërritën në Amerikë në një numër gjithnjë e më të madh. Ata çuan aty një sërë virusesh, si ai i lisë, gripit, fruthit, shytave etj, ndaj të cilave amerikanët vendas nuk kishin pasur ndonjë ekspozim paraprak dhe kurrfarë imuniteti. Historianët i quajtën ato epidemi “epidemi e tokës së virgjër”.

Koronavirusi ka treguar ndikimin që mund të ketë sëmundja epidemike në një popullatë të prekshme. Ngjashëm, ato epidemi përfshinë me shpejtësi komunitetet vendase të Amerikës. Shoqëritë u tronditën. Të gjithë u sëmurën menjëherë:nuk kishte kush të kujdesej për të sëmurët, dhe as për të mbjellur apo korrur. Ndikimi i atyre epidemive ishte i gjerë. Në një aspekt, ato zhdukën në masë njerëzit që mund t’i kishin rezistuar ekspansionit evropian. Studimet aktuale sugjerojnë se popullsia e Amerikave mund të ketë qenë deri në 100 milionë para kontaktit me evropianët. Në shumë rajone, brenda një shekulli nga ekspozimi ndaj këtyre sëmundjeve, 95 për qind e asaj popullsie vdiq.

Në njohim perandoritë Azteke dhe Inkase por shoqëri të ngjashme, në mos po aq komplekse, ekzistonin diku tjetër. Kur Hernando de Soto eksploroi atë që tani është SHBA-ja juglindore në vitet 1540, ai pa se popullata lokale jetonte në qytete të mëdha, të cilat mund të krijonin ushtri me mijëra burra. Ndërkaq, kur eksploruesit anglezë hynë në rajon në fund të shekullit pasues, ata gjetën vetëm disa fise të shpërndara. Për shumë vite, historianët vunë në dyshim vërtetësinë e ditarit të Sotos. Por tanimë arkeologjia ka verifikuar shumë nga përshkrimet e tij.

Shoqëritë vendase u shfarosën nga “epidemitë e tokës së virgjër”, edhe pse kontakti i tyre i drejtpërdrejtë me evropianët ishte i kufizuar. Ato epidemi vranë jo vetëm vendasit, por ndërkohë shkatërruan kulturën dhe moralin e tyre. Shumica e shoqërive vendase nuk kishin një gjuhë të shkruar. Për rrjedhojë, kur pleqtë vdiqën njëkohësisht, u zhduk një pjesë e mirë e kulturës dhe njohurive të komunitetit.



Kjo humbje nxiti një cikël dëshpërimi dhe demoralizimi, që e minoi rezistencën e amerikanëve vendas përballë evropianëve, dhe ua bëri më të lehtë punën këtyre të fundit për tu zgjeruar. Disa analistë në Azinë Lindore, e kanë parë dështimin e qeverive perëndimore për të kontrolluar koronavirusin, si dëshmi të dobësisë dhe brishtësisë së demokracisë perëndimore. Në mënyrë të ngjashme në shekullin XVI-të, evropianët i panë “epidemitë e tokës së virgjër” si provë të epërsisë së tyre morale dhe biologjike.

Ato ishin dëshmi se Zoti synonte që evropianët të merrnin nën kontroll dy Amerikat. Kur Pelegrinët mbërritën në Anglinë e Re në vitet 1620, ata zbuluan se popullata lokale tashmë ishte shfarosur nga sëmundjet epidemike. Përgjatë bregdetit kishte shumë fshatra të braktisura, që ishin vende të përsosura për të jetuar.
Dukej sikur vetë Zoti ta kishte bekuar misionin e Pelegrinëve. Vetë epidemitë ndihmuan për të racionalizuar kolonializmin:tek e fundit ishte vullneti i Zoti. Ato i dhanë mundësi evropianëve të përvetësonin tokat e vendasve. Ne ende nuk e dimë se sa të gjera do të jenë efektet afatgjata sociale dhe ekonomike të koronavirusit, por “epidemitë e tokës së virgjër” patën pasoja të papritura.

Shumë nga aventurierët e hershëm evropianë, parashikuan se amerikanët vendas do të siguronin krahun e punës për të punuar në fushat e tyre. Kur ata nisën të prodhonin prodhime bujqësore fitimprurëse si sheqeri, kafeja dhe duhani, kërkesa për punë u bë më e madhe.

Duke mos pasur më njerëz në dispozicion, evropianët iu drejtuan Afrikës. Tregtia e skllevërve kishte ekzistuar prej kohësh në forma të ndryshme, por shkalla që arriti ajo në shekujt XVII-XVIII, metodat e përdorura dhe arsyetimet e dhëna, ishin të pashembullta. Pronësia absolute e njerëzve – skllavëria e egër – e justifikuar nga konceptet e epërsisë racore ishte në shumë aspekte, rezultat i këtyre “epidemive të tokës së virgjër”. Ndërsa ‘historia alternative” mund të jetë e vështirë dhe e rrezikshme, është e qartë se sikur ato epidemi të mos kishin përfshirë Amerikat, bota moderne do të ishte zhvilluar shumë ndryshe.

Kombet amerikane, përfshirë SHBA-në, nuk do të kishin ekzistuar në formën e tyre aktuale. Ndërkohë, pa fitimet nga pasuria natyrore e Amerikave, Evropa do të ishte bërë kaq mbizotëruese në botë. Mbetet për t’u parë se sa koronavirusi i ri do të transformojë gjithashtu botën./Përshtatur nga CNA.al

LEXO TE PLOTE

Blog

Sekreti i një jete të gjatë? Një dush i ngrohtë dhe sjellja e mirë me të tjerët

Publikuar

-

Nga

Nëse keni menduar se një jetë e shëndetshme do të thotë seanca të pafundme stërvitore në palestër, dhe një diete ekstreme me lakër jeshile dhe spirulinë, mendojeni sërish. Studimet më të fundit, kanë treguar se çelësi për të pasur një jetë të gjatë dhe të lumtur, ka të bëjë me kalimin e kohës me miqtë dhe familjen, po aq sa edhe me dietën dhe ushtrimet fizike.

“Ekziston një lidhje e fortë biologjike, midis jetës sonë sociale dhe shëndetit”- thotë ekspertja Marta Zaraska.“Dhe arsyeja për këtë, është se ne kemi evoluar në këtë mënyrë pasi jemi një specie shoqërore.Ashtu si shimpanzetë, kushërinjtë tanë, ne funksionojmë më mirë kur jemi të rrethuar nga të tjerët”- thotë ajo.

Marta beson se kur është fjala për shëndetin, ne jemi bërë shumë të ndërvarur nga rregullimet e shpejta të gjërave.“Ne jemi një shoqëri që i pëlqen zgjidhjet e lehta, dhe pilulat janë perfekte për këtë gjë. Ju gëlltisni disa prej tyre, dhe papritmas si për mrekulli besoni se do jetoni më gjatë ose se do jeni më të shëndetshëm. Mjerisht ky është një iluzion, nuk ka asnjë pilulë që bën mrekulli”- nënvizon ajo.
Por duke u fokusuar në jetën tonë sociale, ne jo vetëm që mund të jetojmë më gjatë por edhe të jemi më të lumtur. “Përfitimet afatgjata mbi shëndetit tuaj përmes miqësisë, optimizmit dhe mirësisë, janë shumë më shpërblyese pasi ato ju bëjnë më të lumtur.Është më e këndshme, sesa të konsumosh suplemente, apo të zbatosh dieta të ndryshme”- vijon më tej ekspertja.Ja cilat janë sipas kësaj, këshillat kryesore për të pasur një jetë të gjatë dhe të lumtur:

Telefonojini një miku

Këto kohë, ne përdorim shpesh mesazhet me tekst apo media sociale për t’u lidhur me të tjerët.Por bisedat telefonike, janë ato që mund ta forcojnë shëndetin tonë.Kjo pasi kur dëgjojmë zërin e një personi të dashur, trupi ynë çliron hormonin oksitocinë – shpesh i njohur si hormoni i dashurisë – në sasi më të mëdha, sesa kur ne shkruajmë apo përdorim mediat sociale.

Bëni një dush të ngrohtë

Vetmia nuk është vetëm e pakëndshme, por ajo shton gjithashtu rrezikun e sëmundjeve të ndryshme.Por nëse shoqërimi me të tjerët është i vështirë, sidomos tani në kohën e pandemisë, ka disa gjëra që mund të bëni për t’u ndjerë më të lidhur.Hulumtimet tregojnë se bërja e një dushi të ngrohtë, mund të aktivizojë një pjesë të trurit të quajtur insula, e cila lidhet me ndjenjën e lidhjes shoqërore.

Bëhuni një fqinj i mirë

Mirësia ka një ndikim të mahnitshëm tek mirëqenia.Të qenit një njeri i mirë, mund të ulë presionin e gjakut.Ka shumë mënyra për të qenë të sjellshëm me të tjerët.Për shembull, pse të mos piqni disa biskota për fqinjin tuaj, apo të ndihmoni të bëjë blerje në internet dikë që ka nuk ka shumë njohuri në këtë fushë?

Përqafoni të dashurit tuaj të zemrës

Dihet se të kesh një gamë të larmishme bakteresh në zorrë, e forcon shëndetin, nga tretja e ushqimit dhe luftimi i sëmundjeve, deri tek parandalimi i depresionit.Ushqimet e fermentuara si kosi, dihet se përmirësojnë larminë e baktereve të zorrëve. Por a e dini se kontakti me të tjerët mund të jetë po aq i dobishëm? Kjo sepse teksa përqafohen njerëzit, ata shkëmbejnë mikrobe midis tyre.Prandaj përqafojini ata që ndodhen më pranë jush.



Kaloni kohë me të dashurit tuaj

Kalimi i kohës me njerëzit tanë më të dashur nuk na bën vetëm më të lumtur, por mund të na ndihmojë të jetojmë më gjatë. Njerëzit e vetmuar, kanë 2-3 herë më shumë gjasa të vdesin para kohe.Ata kanë telomere më të shkurtra, pra “kapakët” mbrojtës në fund të kromozomeve që përfshihen tek plakja e njeriut.

Mos u shqetësoni më

Kur studiuesit studiuan 100 e ca vjeçaren franceze Zhan Kalment, ata zbuluan një sekret befasues për jetën e saj të gjatë.Përveçse kishte gjene të mira, ajo kishte prirjen të mos shqetësohej për asgjë.Studimet tregojnë se optimizmi mund të zgjasë jetën deri me 10 vjet, ndërsa shmangia e shqetësimit për gabimet e së kaluarës e forcon sistemin imunitar tek të moshuarit. Ndoshta ky ishte sekreti i jetës së saj 122-vjeçare.

Angazhohu në punë vullnetare

Pasja e një dietë mesdhetare, e ul me 22 për qind rrezikun e vdekshmërisë. Por a e dini se edhe vullnetarizmi mund të ketë të njëjtin efekt? Fryma e përgjithshme, të qenit social dhe i ndërgjegjshëm, e forcon shëndetin tonë të paktën po aq sa faktorët tradicionalë të një jete të shëndetshme.

Gjejeni qëllimin tuaj në jetë

Shpesh kur mendojmë për Japoninë, kombin më njerëzit me jetëgjatë në botë, mendja na shkon tek dieta ushqimore. Por në Japoni, fokusi kryesor është tek qëllimi në jetë i çdo njeriu, aq sa Ministri japonez i Shëndetësisë e njeh idenë e të pasurit e qëllimit në jetë si një sjellje shëndetësore.
Studimet tregojnë se njerëzit jetojnë më gjatë, nëse kanë diçka për të arritur, pavarësisht nëse ky është suksesi në karrierë, sigurimi i jetesës së fëmijëve, të bërit punë bamirësie, apo diçka tjetër që është e rëndësishme për ta.

Përqendrohuni tek dashuria

Nëse doni të jetoni më gjatë, përpiquni të gjeni partnerin e duhur dhe martohuni me të,
pasi të qenit i martuar në një lidhje të shëndetshme, mund të ulë më 49 për qind rrezikun e vdekshmërisë. Oksitocina, ju bën të ndiheni gjithë energji kur jeni pranë të dashurve tuaj, por gjithashtu ajo zvogëlon dhimbjen dhe ka veti anti-inflamatore./Përshtatur nga CNA.al

LEXO TE PLOTE