Connect with Us

SHBA/ Mbi 3,700 raste të konfirmuara, 69 të vdekur nga koronavirusi

Bota

SHBA/ Mbi 3,700 raste të konfirmuara, 69 të vdekur nga koronavirusi

Publikuar

-

Mbi 3 mijë e 700 është numri i personave të infektuar me koronavirus në Shtetet e Bashkuara ndërsa 69 kanë vdekur. ShBA vazhdon përpjekjet për të penguar përhapjen e epidemisë që ka arritur në 49 nga të 50 shtetet. Masat kanë çuar në mbylljen e shkollave e lokaleve si dhe anulimin e aktiviteteve publike në shumë vende.

Presidenti i Shteteve të Bashkuara Donald Trump dhe anëtarë tjerë të administratës po përpiqen të zbutin panikun, pasi raftet e dyqaneve në mbarë vendin po boshatisen nga frika e izolimit.

“Nuk keni pse bleni kaq shumë gjëra. Merreni me qetësi”, tha presidenti të dielën në një konferencë.

“Nuk kemi mungesë në furnizim, vetëm se njerëzit po blejnë tri deri në pesë herë më shumë sesa zakonisht”, tha ai.

Zoti Trump foli në konferencë me anëtarë të task forcës kundër koronavirusit por nuk pranoi pyetje.

Koronavirusi tha ai,“është diçka që e kemi nën kontroll”, përpara se nënpresidenti Mike Pence, drejtues i Task Forcës, të fliste një orë.

Disa zyrtarë u shprehën të kujdesshëm rreth rrugës që i pret ShBA.

“Më e keqja ende është para nesh” tha drejtuesi i Institutit Kombëtar për Alergji dhe Sëmundje Infektive, Dr. Anthony Fauci, ndërsa sekretari i shëndetit Alex Azar, paralajmëroi mundësinë që pandemia të mbingarkojë sistemin amerikan të kujdesit shëndetësor.

Komentet bëhen ndërsa më shumë shtete po urdhërojnë masa që ndalojnë grumbullimet publike.

Guvernatori Gavin Newsom urdhëroi mbylljen e të gjithave bareve në shtetin më të populluar të ShBA, Kaliforni.

Ai gjithashtu deklaroi se personat 65 e më shumë vjeçarë duhet të qëndrojnë në izolim në shtëpi, pasi janë të rrezikuar nga COVID-19.

Vendimi i guvernatorit të shtetit të Ohajos, Mike DeWine, ndalon qytetarët të hanë brenda restoranteve. Mundësia e vetme është të marrin ushqimin me vete ose të porosisin nga shtëpia.

Masa të njëjta janë ndërmarrë edhe në Nju Jork dhe Los Anxhelos, dy qytetet më të mëdha në vend. Kjo pas rregullave të reja të prezantuara nga kryetarët e bashkive të dy qyteteve që të mbyllen të gjitha vendet e argëtimit si kinematë.

“Po marrim një seri veprimesh në kuadër të përpekje për të shpëtuar jetët e më të dashurve tanë dhe fqinjëve” tha kryebashkiaku i Nju Jorkut, Bill de Blasio.

Rekomandimet e Qendrës Kombëtare për Parandalimin dhe Kontrollin e Sëmundjeve sugjerojnë ndalimin e grumbullimeve të më shumë se 50 njerëzve gjatë 8 javëve të ardhshme.

FAUÇI: ÇDO MUNDËSI ËSHTË NË TRYEZË

I pyetur nëse duhet të ketë masa mbarëkombëtare siç bënë vendet tjera, zoti Fauci tha se çdo mundësi është në tryezë dhe se gjithçka do të ëhet për të mbrojtur popullin amerikan.

Zyrtarët në 35 nga 50 shtete ose kanë mbyllur shkollat ose kanë rekomanduar të mbyllen.

LEXO EDHE:  Çifti Andrea të akuzuar për korrupsion, zotërojnë shtëpi në Amerikë?

Radhë të gjatë dhe panik është vërejtur në aeroportet e vendit ndërsa autoritetet po punojnë me rregullat e reja që synojnë parandalimin e virusit.

Radhët e gjata janë të papranueshme, tha sekretari në detyrë i sigurisë kombëtare, Chat Wolf, ndërsa shpjegoi para gazetarëve në Shtëpinë e Bardhë se procesi është rregulluar dhe se pritjet kanë rënë për 30 minuta.

Sipas Departamentit të Sigurisë Kombëtare ata me shtetësi amerikane dhe banorët që kthehen nga vendet me të cilat janë ndërprerë fluturimet, duhet të kryejnë teste mjekësore para se të kthehen.

Nëse nuk kërkohet trajtim mjekësor, këta qytetarë dërgohen në shtëpi ku kalojnë dy javë në vet-karantinë.

Të huajt që jetojnë në ShBA por që kanë udhëtuar në vendet e ndaluara, nuk do të lejohen të kthehen në Shtetet e Bashkuara.

Një zyrtar i Departamentit të Sigurisë Kombëtare tha se ata duhet të udhëtojnë në një vend të tretë, që nuk është vend i ndaluar nga ShBA, ku duhe të presin për dy javë në vet-karantinë përpara se të nisen për Shtetet e Bashkuara.

ShBA ka më shumë se 3 mijë e 700 raste të konfirmuara me koronavirus, në 49 nga 50 shtete.

Në mbarë vendin janë raportuar 69 vdekje.

PAKETË EMERGJENCE

Senati, që kontrollohet nga republikanët, të hënën shqyrton një paketë të emergjencës të cilën dhoma e përfaqësuesve e kontrolluar nga demokratët e ka miratuar.

Legjislacioni parasheh fonde për bizneset e vogla dhe të mesme të cilave u janë rritur shpenzimet nga lejet e sëmundjeve. Fondi ndihmon edhe individët që humbën pagën pasi u futën në karantinë ose nga aktiviteti i reduktuar ekonomik.

Në qendër të masave emergjente të presidentit është shtimi i testimeve për koronavirus.

Shtetet e Bashkuara janë kritikuar për ritmin e futjes në përdorim të pajisjeve të testimit ndërsa zoti Trump kërkoi rritje të kapacitetit testues, që përfshin edhe pikat ku njerëzit shkojnë me makinë për t’u kontrolluar nëse kanë simptoma.

Shtëpia e Bardhë tha se 1.9 milion teste do të mundësohen këtë javë dhe një faqe online do të jetë e aksesueshme brenda pak ditësh, e cila do të jetë në shërbim të atyre që janë prioritet i testimit.

Rekomandimet për distancën shoqërore po i respektojnë edhe korrespondentët e Shtëpisë së Bardhë të cilët nga e hëna janë më pak në numër. Secili reporter do të ketë ulësen e tij dhe një hapësirë boshe anash.

Rekomandimet që njerëzit të mos mblidhen në grupe solli vendimin e rrjetit të kafeneve të Starbucks që njerëzit mund të marrin kafe me vete por jo të ulen në mjediset e tyre./VOA

KLIKO PER TE KOMENTUAR

Komentoni

Your email address will not be published. Required fields are marked *

Bota

Evropa propozon mbylljen e kufijve të saj

Publikuar

-

Nga

Evropa propozoi të hënën mbylljen për 30 ditë të kufijve të saj të jashtëm për të huajt, në përpjekje për zbutjen e krizës së koronavirusin. Megjithatë ky hap i ri shihet si tepër i vonuar dhe i mangët.

Me numrin zyrtar të vdekjeve në Itali që ka arritur mbi 1.800 dhe numrin e rasteve që po rriten me shpejtësi në të gjithë kontinentin, kriza ka nxjerrë në pah përçarje në Bashkimin Evropian me 27 anëtarë.

Disa vende kanë vënë në zbatim kontrolle kufitare brenda zonës Schengen të kufijve të hapur të Evropës, ndërsa të tjerët kanë refuzuar të ndajnë të dhëna ose pajisje mjekësore.

Thirrjet për unitet nga Brukseli deri tani duket se kanë rënë në vesh të shurdhër. Fotografitë nga vendkalimet në Evropë tregojnë rradhë të gjata automjetesh që presin të kalojnë ato që normalisht janë kufij të padukshëm.

“Sa më pak udhëtime, aq më shumë mund ta frenojmë virusin. Prandaj … u propozoj krerëve të shteteve dhe qeverive të vendosin kufizime të përkohshme të udhëtimeve jo thelbësore në BE”, tha Presidentja e ekzekutivit të BE-së, Ursula von der Leyen.

LEXO EDHE:  Atentati i 11 tetorit/ Zbardhet skema e krimit makabër në mes të qytetit

LEXO EDHE:  Atentati i 11 tetorit/ Zbardhet skema e krimit makabër në mes të qytetit

“Këto kufizime udhëtimi duhet të jenë në fuqi për një periudhë fillestare prej 30 ditësh, por mund të zgjaten sipas nevojës,” tha ajo.

Udhëheqësit e vendeve anëtare të BE-së do të diskutojnë mbi propozimet gjatë një videokonference të martën. Burime diplomatike thanë se nismëtar i tyre është presidenti francez Emmanuel Macron, i cili po bën presion për veprime të koordinuara evropiane.

Plani do të përfshinte 30 vende: të gjitha shtetet anëtare të BE-së me përjashtim të Irlandës, si dhe Islandën, Norvegjinë, Zvicrën dhe Lichtensteinin, që janë pjesë e zonës Shengen edhe pse jo pjesë e Bashkimit Evropian./VOA

LEXO TE PLOTE

Bota

Virusi Corona/ A po bën Gjermania sa duhet për të ngadalësuar shpërthimin?

Publikuar

-

Nga

Shkollat po mbyllen në të gjithë vendin, ndeshjet sportive janë pezulluar dhe thuajse gjithçka është anuluar. Por disa thonë se masat parandaluese të Gjermanisë nuk janë të mjaftueshme për të ndaluar përhapjen e virusit.

Email pas emaili mbërrin në kutinë e postës elektronike. I pari është nga punëdhënësi, që anulon të gjitha takimet për javët e ardhshme. Pastaj një organizator koncertesh, që njofton se artisti yt i preferuar nuk do të performojë në fundjavë. Pastaj të kontaktojnë prindërit, që e shtyjnë vizitën te nipërit dhe mbesat – të gjithë duke marrë masa paraprake për të frenuar përhapjen e virusit Corona.

Në Gjermani, si në pjesë të tjera të Evropës, jeta publike ngadalë po ndalet. Ekipet në Bundesliga, në ligën e futbollit në Gjermani, fillimisht luanin në stadiume boshe dhe më pas i shtynë ndeshjet, fushat e lojërave janë të shkreta dhe krejt papritur në trenat e udhëtarëve dhe në kafeteritë e vendit të punës ke më shumë vend për këmbët. Shumica e landeve gjermane kanë urdhëruar që shkollat ​​dhe kopshtet të ndërpresin mësimet që nga java e ardhshme, kryetari i Bashkisë së Berlinit njoftoi edhe se të gjitha baret do të mbyllen. Ndoshta është vetëm çështje kohe përpara se këtë ta bëjnë edhe më shumë restorante dhe kinema, ashtu siç bënë në Itali.

Si shpëton jetën ruajtja e distancës

“Ne e dimë shumë mirë që në fazën e tanishme të pandemisë duhet të ndërpresim praktikisht të gjitha kontaktet me njerëz të tjerë, po të duam të kemi ndonjë shans për të mbajtur sa më të ulët numrin e të infektuarve”, thotë Patrick Larscheid, nëpunësi i shëndetësisë publike për qarkun Berlin-Reinickendorf. Ai i ka bërë thirrje senatit të Berlinit të ndërmarrë hapa më vendimtarë kundër përhapjes së COVID-19, sëmundjes së shkaktuar nga virusi SARS-CoV-2. Ai kërkon që jeta publike të kufizohet sa më shumë që të jetë e mundur për të mbrojtur popullsinë.

Doni të njiheni me shifrat aktuale rreth virusit korona? – Klikoni në këtë hartë  interaktive të Universitetit ”Johns Hopkins“ në Baltimore, SHBA

 

Harta interaktive e Universitetit ”Johns Hopkins“ në Baltimore, SHBA

Nëse nuk ju hapet harta, atëherë mund të klikoni ketu

A do të shohim së shpejti një situatë të ngjashme me Italinë edhe në Gjermani? Si masë për të ndaluar përhapjen e virusit, në Itali janë mbyllur për momentin të gjitha dyqanet, përveç farmacive dhe supermarketeve – që i kanë mbyllur dyert e tyre baret, restorantet dhe madje edhe berberët. Ngjarjet avancojnë shpejt.

LEXO EDHE:  AMA ultimatum mediave/ “Mbroni personelin dhe publikun”

LEXO EDHE:  Video-20 të vdekur e 1015 të plagosur/ Vijojnë kërkimet nën rrënoja pas tërmetit shkatërrimtar në Turqi

Këto ditë, dashamirësit e kinemave në Gjermani lënë një vend të lirë mes tyre, ndërsa shumë vetë po e shmangin krejtësisht kinemanë nga frika e infeksionit. Shkollat ​​po mbyllen, edhe shteti i Baden-Württemberg e shtyu fillimin e semestrit veror. Ngjarjet kulturore – si Festivali tradicional i Beethoven në Bonn ose Java e Amerikës Latine-Karaibeve në Berlin – po anulohen, siç ndodh edhe me panairet e shumta tregtare. Jeta publike po mbyllet, por për momentin vazhdon, në lëvizje të ngadaltë.

Blerjet në panik i lënë raftet bosh në supermarkete. Me gjermanët që blejnë me shumicë mallrat e konservuara dhe letrat higjenike për në WC për t’i pasur për çdo rast, dyqanet kanë më pak mallra të mbetura për t’ua dhuruar nevojtarëve, thotë Jochen Brühl, kreu i Tafel Deutschland, kuzhinës popullore, e cila mbështet më shumë se 1.5 milion njerëz me sende ushqimore të tepruara dhe donacione të tjera. Brühli i inkurajoi ata që kanë blerë më shumë se u duhet, që të dhurojnë.

A janë këto masa të mjaftueshme?

Numrat e pasagjerëve në aeroportin e Frankfurtit ranë me 14.5% në javën e fundit të shkurtit. Industria e taksive raporton humbje të të ardhurave deri në 40% – humbje që ata po përpiqen t’i kompensojnë, duke ofruar ulje të thella për njerëzit me abone mujore në transportin publik.

Tedros Adhanom Ghebreyesus, kreu i Organizatës Botërore të Shëndetësisë, i ka akuzuar disa vende për masa të pamjaftueshme për të luftuar pandeminë e virusit Corona. “Ne jemi thellësisht të shqetësuar që disa vende nuk po i afrohen këtij kërcënimi me nivelin e angazhimit politik të nevojshëm për ta kontrolluar atë,” tha drejtori i përgjithshëm në Gjenevë të enjten. Çështja se cilave shtete u referohej ai mbeti pa përgjigje – por është e mundur që Gjermania të llogaritet mes tyre./DW

LEXO TE PLOTE

Bota

Koment/ Virusi Corona e arti i së mundshmes

Publikuar

-

Nga

Politika, thuhet gjithmonë, është arti i së mundshmes. Kjo fjali zakonisht shoqërohet me një ngritje të supeve dhe shqiptohet kur nuk merren në moment vendime të rëndësishme, kur hidhen dëm mundësitë për të ardhmen apo kur padrejtësitë nuk luftohen me vendosmëri.

Pas një jave të mirë ngjarjesh percepituese nxituese dhe vendimesh që kanë ndikim të gjerë në jetën publike dhe private, njeriu fshin sytë me habi: e mundur është në fund të fundit, shumë më tepër sesa mendohet në përgjithësi.

Prioriteti i ekonomisë – jo më në fuqi

Papritur janë shkencëtarët ata që përcaktojnë tonin në politikë. Modele kompjuterike bëhen bazë për vendime largvajtëse. Prioriteti i ekonomisë që mbizotëron përndryshe së paku është pezulluar përkohësisht. Përballë kërcënimit shumë konkret nga COVID-19, ka zënë vend një ndjenjë vendosmëri e tipit “Ne do t’ia dalim mbanë – pavarësisht se si”.

Sado e mprehtë dhe e rrezikshme është pandemia e Coronas, ajo është më urgjentja, por në asnjë mënyrë kërcënimi i vetëm për njerëzit në planetin blu. Marrim për shembull fushën e mjedisit, bie fjala ndryshimin e klimës: shkencëtarët kanë paralajmëruar për këtë prej dekadash. Modele kompjuterike shumë bindëse tregojnë me ngulm, se si do të ndryshojë jeta në Tokë, po të mos merren masa vendimtare – sa më herët, aq më mirë.

Deri tani, kjo nuk ka çuar në asnjë veprim vërtet vendimtar. Ose një problem tjetër mjedisor: flakja gjithnjë e më shumë pa kriter dhe ngarkimi i tokës me mbeturina plastike. Ose zhdukja masive e specieve. Në shumicën e rasteve ne e dimë saktësisht se çfarë duhet të bëjmë. Por ajo që ndodh është shumë pak e shumë ngadalë.

Matthias von Hein

LEXO EDHE:  SHBA demostron forcën/Avionët e pakapshëm zbarkojnë në kufijtë e Koresë Komuniste

LEXO EDHE:  Çifti Andrea të akuzuar për korrupsion, zotërojnë shtëpi në Amerikë?

Sigurisht që është më e lehtë të mobilizosh një shoqëri të tërë kur bëhet fjalë për mbrojtjen konkrete të jetës tënde dhe atë të njerëzve të tu të dashur. Po të mos luftohet në të ardhmen një rrezik të perceptohet si abstrakt. Ose një rrezik që shfaqet ndoshta më fort në vende të tjera sesa te ti.

E mundur është shumë më tepër nga ajo që mendohet

Kësaj i shtohet problemi i qylaxhinjve. Po të mbetemi te shembulli i ndryshimit të klimës: nga masat që merren tani, ato që përfitojnë nuk janë vetëm vendet që i paguajnë dot këto masa.
Sidoqoftë, dikur, pandemia e Coronas do të jetë pjesë e historisë. Nëse atëherë dikush na thotë që politika është vetëm arti i së mundshmes, atyre mund t’u kujtojmë se ajo që është e mundur është shumë më tepër nga ajo që mendon.

Doni të njiheni me shifrat aktuale rreth virusit korona? – Klikoni në këtë hartë  interaktive të Universitetit ”Johns Hopkins“ në Baltimore, SHBA

LEXO TE PLOTE