Politikë
“Gjobë deri në 5 mijë euro”/ Rama bën paralajmërimin e fortë: Kjo është luftë
Qeveria vijon të ashpërsojë masat kundër përhapjes së koronavirusit.
Kryeministri Edi Rama ka paralajmëruar gjobë deri në 5 mijë euro për të gjithë ata persona që vijnë nga vendet e kuqe, dhe nuk vetëkarantinohen për 14 ditë.
Në një lidhje live nga zyra e tij në Kryeministri, kreu i qeverisë theksoi se kjo është një kohë lufte përballë një armiku që është përreth nesh.
“Kushdo që vjen nga këto vende dhe nuk vetëkarantinohet për 14 dite do të marrë gjobë deri në 5 mijë euro. Edhe nesër nuk do lejohet të ikë pa paguar gjobën. Për kohën normnale janë të palogjikshme këto masa, por kjo nuk është kohë normale. Futeni mirë në kokë. Është kohë lufte me një armik pa din e iman, por është përreth nesh. Është e vështirë të kufizosh lëvizjen apo të mbylësh biznesin. Por i falenderoj shumë të gjithë ata që iu përgjigjen thirrjes dhe që mbyllen diskot, pubet, klubet e natës apo palestrat. Sot do të mbyllen dhe pikat e internetit. Kjo është qytetari dhe solidaritet njerëzor me përgjegjshmëri. Duhet të kufizohen lëvizjet kur nuk janë të domosdoshme”-tha ndër të tjera Rama.
Politikë
Beteja me koronavirusin/Ambasadori i BE: Mbështetje ndaj Shqipërisë, jemi në kontakt me qeverinë
Ndërsa Shqipëria vijon betejën në përballje me koronavirusin, ambasadori i Bashkimit Evropian në vendin tonë, Luigi Soreca ka shprehur mbështetjen ndaj Shqipërisë.
Në një postim në rrjetet sociale, Soreca shkruan se në përballimin e situatës së koronavirusit, nëse është e nevojshme do të ketë edhe ndihmë financiare.
“BE po punon në të gjitha frontet për të ndalur shpërthimin e COVID19, përfshirë koordinimin e veprimeve të shteteve anëtare dhe mobilizimin e ndihmës financiare. Ne jemi në kontakt me qeverinë shqiptare, të gatshëm për të mbështetur përpjekjet e tyre për një përgjigje të koordinuar”, shkruan ambasadori Luigi Soreca.
Politikë
Nis dezinfektimi i ambjenteve publike të hapura në Shkodër
Paralelisht me dezinfektimin e institucioneve publike, shkollave, kopshteve, çerdheve, qendrave në territorin e Bashkisë Shkodër, ka nisur puna edhe për dezinfektimin e rrugëve e shesheve ku ka lartë lëvizje të shumta të qytetarëve.
Në orët e para të mëngjesit janë dezinfektuar pedonalet e qytetit, ajo “Kol Idromeno”, “28 Nëntori” dhe “Oso Kuka”. Në vijimësi, do të dezinfektohen edhe rrethrrotullimet kryesore, sheshet dhe rrugët pranë institucioneve të rëndësishme në territorin e Bashkisë së Shkodrës.
Nga data 9 mars 2020, kur në Shqipëri u konstatuan rastet e para me COVID-19, Bashkia e Shkodrës ka hartuar një plan të detajuar veprimi dhe masash të nevojshme për pengimin përhapjes së virusit tek qytetarët.
Bashkia e Shkodrës fton qytetarët e bisneset të zbatojnë me rigorozitet masat e higjenës personale, të dezinfektojnë ambjentet ku jetojnë e punojnë dhe të kufizojnë në maksimumin e mundshëm lëvizjet dhe qarkullimin e panevojshëm.
Politikë
Koronavirusi në Shqipëri/ Pezullohen proceset gjyqësore, vetëm me një përjashtim
Në kuadër të masave parandaluese për përhapjen e koronavirusit në vend, Gjykata e Shkallës së Parë për Korrupsionin dhe Krimin e Organizuar, ka vendosur pezullimin e veprimtarisë dhe shërbimeve gjyqësore në të githa Gjykatat e vendit të juridiksionit të përgjithshëm dhe të posacëm.
“Gjykata e Shkallës së Parë për Korrupsionin dhe Krimin e Organizuar, lajmëron se me vendimin nr.127 datë 10.03.2020 ”Për pezullimin e veprimtarisë dhe shërbimeve gjyqësore në të gjitha gjykatat në Republikën e Shqipërisë” të Këshillit të Lartë Gjyqësor me qëllim mbrojtjen e shëndetit të popullatës nga infeksioni i shkaktuar nga COVID – 2019 është vendosur pezullimi i veprimtarisë dhe shërbimeve gjyqësore në të githa Gjykatat e vendit të juridiksionit të përgjithshëm dhe të posacëm për shkak të situatës së krijuar nga infeksioni i përhapur COVID-2019.” thuhet në njoftimin.
Ndërkohë theksohet se përjashtohen nga efektet e këtij pezullimi veprimtaria dhe shëbimet gjyqësore që lidhen me cështje me natyrë të ngutshme të vlerësuara si të tilla rast pas rasti nga gjyqtari.
“Përjashtohen nga efektet e këtij pezullimi seancat e vlerësimit të masave të sigurisë , seancat në të cilat janë kërkuar ose zbatuar masat e sigurisë me burg dhe kur të arrestuarit, të pandehurit ose mbrojtësit e tyre kërkojnë të vijohet me shqyrtimin e tyre. Në cdo rast nga ana e Gjykatës duhet të shmanget prania e publikut në zhvillimin e seancave gjyqësore. Kohezgjatja e pezullimit do të jetë për një periudhë 2 javore nga hyrja në fuqi e këtij vendimi.” thuhet në njoftim.
