Organizata Botërore e Shëndetësisë shpalli koronavirusin e ri pandemi. Ky është një moment gjerësisht simbolik, për shkak se shtetet duhet të vijojnë të ndërmarrin të njëjtat masa si ishin rekomanduar të ndërmerrnin para se OBSH të përdorte termin më të frikshëm në terminologjinë e saj. Drejtori i Përgjithshëm i OBSH-së Dr. Tedros Adhanom Ghebreyesus, deklaroi në Gjenevë:

“Pandemia nuk është një fjalë që mund të përdoret me lehtësi apo pa kujdes”.

Megjithatë ai shtoi se të gjitha vendet janë ende në kohë për të ndryshuar rrjedhën e ngjarjeve përmes masave parandaluese apo ngadalësuese të përhapjes së sëmundjes.

Po çfarë është pandemia?

Ky është përkufizimi i OBSH-së:

Pandemia është një përhapje e një sëmundjeje të re në shkallë botërore.

Një pandemi gripi ndodh kur një virus i ri gripi shfaqet dhe përhapet nëpër botë ndërkohë që shumica e njerëzve nuk kanë imunitet prej tij. Viruset që kanë shkaktuar pandemi në të shkuarën zakonisht kanë pasur origjinë nga gripet e kafshëve.

Disa aspekte të pandemisë së gripit mund të jenë të ngjashme me gripin sezonal ndërsa karakteristikat e tjera mund të jenë shumë të ndryshme. Për shembull, si gripi sezonal ashtu edhe ai pandemik mund të shkaktojë infeksione në të gjitha grupmoshat dhe shumica e rasteve do të rezultojë në sëmundje të kufizuara në të cilat personi merr veten plotësisht pa trajtim mjekësor. Por nga ana tjetër, zakonisht gripi i stinës shkakton shumicën e vdekjeve mes të moshuarve ndërsa raste të tjera të rënda ndodhin më së shumti mes njerëzve me kushte të tjera mjekësore, shkruan Reporter.al.

Ndryshe nga kjo, pandemia H1N1 shkaktoi sëmundje më të rëndë dhe më fatale mes më të rinjve, si mes atyre me kushte të tjera kronike ashtu edhe mes personave të shëndetshëm dhe shkaktoi më shumë raste pneumonie virale se sa shikohet zakonisht në gripin sezonal.

Si për gripin sezonal ashtu edhe për atë pandemik, numri total i njerëzve që sëmuren rëndë mund të jetë i ndryshëm. Gjithsesi, impakti apo rëndesa ka tendencë të jetë më e lartë te pandemitë, pjesërisht për shkak se një numër shumë më i madh njerëzish nuk ka imunitet paraprak ndaj virusit të ri. Kur një pjesë e madhe e popullsisë infektohet, edhe nëse pjesa e atyre që infektohen dhe që zhvillojnë sëmundje të rëndë është e vogël, sërisht rastet e rënda mund të jenë goxha të numërta.

Si për gripin sezonal ashtu edhe për atë pandemik, kulmi pritet të ndodhë në sezonin e zakonshëm të gripit. (Në zonat me klimë të ftohtë kjo zakonisht ndodh në muajt e dimrit). Por siç kemi parë me pandeminë H1N1, pandemitë mund të kenë tipare të pazakonta epidemiologjike dhe shpërthime të mëdha mund të ndodhin edhe në muajt e verës.

Kryetari i Bashkisë së Tiranës, Erion Veliaj bëri me dije se transporti publik të Tiranë do të ndërpritet plotësisht si një tjetër masë drastike e ndërmarrë nga qeveria për të shmangur përhapjen e mëtejshme të coronavirusit.

“Menjëherë sapo të shkëpus lidhjen me ju do të nënshkruaj urdhrin për ndërprerjen e plotë të transportit publik në Tiranë. Jemi në një situatë ku fluksi i lëvizjeve me urban ka rënë me 70%, me duam që të bjerë dhe 30 % që ka mbetur. unë nuk jam shkencëtar por dihet që virusi ka një kurbë të vetën që bie në proporcion me masat që ndërmerren. Preken më pak banorë në kohë më të shkurtër nëse minimizohet lëvizja e njerëzve”, tha kryebashkiaku i Tiranës në një lidhje live me Euro News.

Teksa e cilësoi një masë jo popullore, por të nevojshme Veliaj tha se do të firmoste urdhrin për ndërprerjen e transportit publik menjëherë pas intervistës pas konsultimit që kishte pasur me kryeministrin.

“Kështu që do t’i besojmë shkencës, fakteve, realiteteve të ngjashme që kanë përballuar krizën që thonë se janë ca masa jo popullore, është jo popullore t’u thuash fëmijëve mos luaj në këndin e lojërave, t’u thuash të moshuarve mos luani domino dhe t’u thuash të tjerëve që duhet të ecin, nëse është absolutisht e nevojshme në këmbë apo me biçikletë, siç bëjmë shpesh ne në Bashkinë e Tiranës, e di që është një masë jo popullore, por na rezulton që qytetet të cilët e kanë marrë që javën e parë e kanë pasur më të shkurtër periudhën e prekjes dhe më të ngushtë hartën e kontaminimit.

Ndaj do ta marrim këtë masë. Edhe kam qenë në konsultim me kryeministrin dhe menjëherë me të mbaruar këtë interviste ne do të firmosim urdhrin për ndërprerjen e transportit publik si një masë jo popullore, por absolutisht e nevojshme për momentin”, u shpreh ai./ CNA.al

Ambasada gjermane në Tiranë është duke i respektuar me korrektësi këshillat e dhëna nga qeveria shqiptare për koronavirusin.

Ajo ka informuar qytetarët e kthyer nga Gjermania të shmangin rradhën për vërtetimet e kalimit kufitar, pasi thekson se nuk do të pranojnë më deri në një njoftim të dytë.

“Informacion i rëndësishëm për të kthyerit nga Gjermania. Për shkak të zhvillimeve të fundit në lidhje me CORONA-virusin, ambasada nuk do të pranojë më (deri në një njoftim tjetër) vërtetime të kalimit të kufirit. Ju lutemi për mirëkuptimin tuaj!”, thuhet në deklaratën e Ambasadës të publikuar në faqen e saj zyrtare.

Ky akt vjen si masë paraprake lidhur me situatën aktuale në Shqipëri, ku janë konfirmuar 15 persona të prekur nga koronavirusi./ CNA.al