Ministrja e Drejtësisë Etilda Gjonaj ka folur lidhur me padinë e ngritur nga presidenti Ilir Meta ndaj saj në SPAK për emërimet në Gjykatën Kushtetuese.

Gjonaj e cilësoi si inekzistent kallëzimin, ndërsa pretendon se nuk e ndikon aspak Komisonin e Venecias lidhur me draft-opinionin për emërimet në Gjykatën Kushtetuese.

“S’ka asnjë lloj ndikimi, pasi çështja ka të bëjë me zgjidhjen e ngërçit dhe s’ka të bëjë me kallëzimin inekzistent që presidenti ka bërë. Pres vendimin e  institucioneve të drejtësisë. Unë i kam bërë publike të gjitha provat, me aq sa mund t’i interpretohen publikut”, tha ajo, ndërsa ironizoi Kreun e Shtetit, teksa ishte e ftuar në emisionin “Top Talk”.

“Jo çdo njeri që bërtet ka të drejtë. Le t’ja lemë institucioneve të drejtësisë”, nënvizoi ministrja. Gjithashtu Gjonaj foli edhe për takimin me ambasadoren e SHBA-së Yuri Kim dhe u pyet nëse kjo e fundit është ndikuar nga afeksione personale.

“Ambasadorët vijnë si përfaqësues, nuk vijnë për Etildën si individ dhe absolutisht nuk bëhet fjalë për afeksione personale se në mënyrë të vazhdueshme kam pasur takime me një sërë përfaqësuesish të SHBA. Zonja Kim nuk ka mbështetur ministren si person, por Reformën në Drejtësi”, u shpreh ajo.

Ndërkohë për pyetjen se kush mendon se do ta fitojë betejën mes saj dhe presidentit, Gjonaj tha se duhet “t’ja lemë kohës, se e para nuk mund t’i them gjitha këtu sot dhe e dyta presim të flasin institucionet”./ CNA.al

Ministrja e Drejtësisë Etilda Gjonaj ka folur për raportin paraprak të Komisonit të Venecas lidhur me “betejën” për emërimet në Gjykatën Kushtetuese.

Ndonëse Venecia u shpreh hapur në mbështetje të presidentit Ilir Meta, Gjonaj tha ende nuk është dhënë opinioni përfundimtar dhe se ky ishte një fotografim i parë i situatës.

Ajo paralajmëroi se Kuvendi do të dorëzojë argumenta të tjera plotësuese deri në datë 13 mars, të cilat sipas saj mund të ndryshojnë dhe qëndrimin.

“Komisioni i Venecias ka një proces që e kryen, si një proces gjyqësor. E shikojnë dhe japin argumenta sipas këndvështrimit tuaj. Deri në datën 13 të dy palët do duhet të japin mendime, komente dhe opinione mbi këtë fotografim të parë. Është një fotografim i parë i situatës, nëse nuk do kishte mundësi që secila palë të paraqiste argumentat ligjorë, nuk do kishte një opinion përfundimtar. Të dyja palët duhet të jenë konkrete, pa e politizuar çështjen.

Argumentat shtesë do dorëzohen deri në datën 13. Ka argumenta. Nëse s’do ishte kështu, atëherë do të ishte një raport përfundimtar. Kuvendi ka një sërë argumentash për të paraqitur, se në fund të fundit ne nuk na intereson për të kuptuar kush ka të drejtë. Këtu nuk ka të fituar dhe të humbur, ky është një proces i drejtë”, deklaroi ministrja në “Top Talk”, ndërsa theksoi mazhoranca do ta respektojë opinionin e Komisonit të Venecias cilido qoftë ai./ CNA.al

Pas konfirmimit të dy rasteve të para të prekura nga koronavirusi në Shqipëri, qeveria vendosi mbylljen e të gjitha institucioneve arsimore në të gjithë vendin, për dy javë.

Ndërkohë, pas këtij vendimi, në një deklaratë për mediat, ministrja e Arsimit, Besa Shahini sqaroi se mësimi do të vijojë të bëhet, por online. Shahini theksoi se nga nesër do të ngrihen “klasat virtuale”.

Kjo do të thotë, se secili mësues do të krijojë në rrjetet sociale, përmes Whatsappit etj, grupe me prindërit e nxënësve të klasës, për të shpërndarë virtualisht detyrat dhe udhëzimet në mënyrë që fëmijët të mos humbin orët mësimore.

“Jemi duke bërë një plan të rrinë në kontakt me prindërit, t’u japin instruksione fëmijëve dhe t’i bëjnë detyrat në kushte shtëpie. Të komunikojnë në ëhatsapp, t’i orientojnë fëmijët të punojnë nga shtëpia, me video të shkurtra në grup. Do të jenë klasa të vogla virtuale në telefona” sqaroi ministrja.

Ndërkohë, Besa Shahini tha se mësuesit do të vazhdojnë të punojnë nga shtëpia ose nga shkolla, për të marrë të gjitha masat dhe udhëzimet për nisjen nga puna me klasat virtuale në rrjetet sociale.

“I kemi orientuar të gjithë drejtuesit e shkollave që ditën e sotme ta mbyllim me qetësi, të orientojnë fëmijët për detyrat në dy javët e ardhshme”, tha ministrja.