Connect with Us

Familja Emblematike Jasharaj, flakadan i pashuar i lirisë së Kosovës martire

Opinione

Familja Emblematike Jasharaj, flakadan i pashuar i lirisë së Kosovës martire

Publikuar

-

Nga Azgan Haklaj
* Drenica u shndërrua në shekullin e XX-të kryeqënder e lëvizjes kombëtare për çlirim, ku spikati Prekazi si bazë e aksioneve të rrufeshme e të guximshme luftarake.
Sëpata e Ahmet Delisë, pushkët e Azem Bejtës, Shaban   Polluzhës, Tahir e Nebih Mehës mbajtën gjallë gati një shekull shpresën e çlirimit kombëtar nga Serbia.
Në pranverën e vitit 1981, me dt 13 maj doli në skenë Familja Jashari, kur Shaban Jashari me Hamzën dhe Ademin u betuan mbi varret e Tahir dhe Nebih Mehës se do ta vazhdojnë luftën deri në vetëmohim për çlirim e bashkim kombëtar.
Tahir Meha dhe Nebiu kishin rënë heroikisht në fushë të mejdanit me njësitet speciale të Jugosllavisë, të cilët treguan heroizëm të rrallë në luftimet e rrepta, duke asgjesuar disa prej tyre.
Shteti i Millosheviçit gjakatar e mbante nën mbikqyrje Familjen Jashari dhe e percillte vazhdimish sepse e shihte si rrezik shumë të madh që nga varrimi i Mehajve, në lëvizjen studentore të vitit 1989, për shkak të mbështetjes që ata i baënë asaj e në vazhdim.
Me dt 30 dhjetor të vitit 1991, në virgjilje të vitit të ri 1992 Ushtria Serbe sulmoj për herë të parë Jasharajt, por u detyrua të terhiqet për tu rikthyer me forca me të shumta me dt 22 janar të vitit 1998, në sulmin e dytë dhe përsëri kjo familje ndonëse me gra e femijë i rezistoj aksionit ushtarak megjithëse u plagosën vajzat e Ademit dhe Hamzës.
E turpëruar dhe e mundur ushtria e Kasapit të Ballkanit u tërhoq për tu shfaqur pas pak kohësh e shumtë në numër, me mjete të blinduara e artileri të rëndë me dt 5 mars të vitit 1998.
Pas tre ditësh luftime të ashpra me dt 5-6-7 mars ranë në fushën e nderit për tu përjetësuar në pavdekësi Komandanti Legjendar i UÇK- së Adem Jashari, Shabani e Hamza dhe dhjetra familjarë, mes të cilëve gra e femijë.
Këtij sulmi i mbijetoj Bashkimi, djali i Rifatit dhe Besarta, vajza e Hamzës.
Familja Jashari luftoi për tre ditë më guxim e trimëri të rrallë deri në vetëmohim, duke u pagëzuar kështu si kryefjala dhe kallzuesi më autentik i qëndresës për liri e pavarësi e për ta shkruar përgjithmonë emrin me shkronja të arta në Panteonin e Kombit Shqiptar.
Ajo u martirizua për çlirim e bashkim kombëtar.
Me aktin sublim të flijimit në emër të Atdheut u ba frymëzim për luftën çlirimtare shqiptare por edhe për lëvizjet e popujve që aspirojnë për liri.
Sot pas 22 vitesh përkulemi me respekt e mirënjohje para Komandantit të UÇK-së Adem Jashari dhe familjarëve të tij që dhanë jetën për lirinë e Kosovës.
Gjaku i tyre i derdhur lumë do të mbetet kurdoherë materie e gjallë e ndërgjegjes kombëtare, me mesazhin postulat se:
“Më e shtrenjtë se jeta ime, më e shtrenjtë se familja ime është Atdheu im”.
Vepra e tyre shendrit si flakadan i pashuar përjetësisht.
Sot pas 22 viteve, në ditën e kujtesës historike të Familjes së Jasharajve, kujtojmë me pietet Komandantin Legjendar të UÇK- së së lavdishme Adem Jashari, që realizoi ëndrrën shekullore të Kosovës për liri dhe pavarësi dhe vitin që shkoi kemi festuar me madhështi 20 -vjetorin e çlirimit e para pak ditësh 12- vjetorin e Pavarsisë së saj, si dhe shembien e kufijëve mes shqiptarëve duhet ti them Bacës Adem se ëndrra juaj nuk është përmbushur.
Ju dhatë jetën për Kosovën e lirë e sovrane dhe për bashkimin kombëtar.
Por projekte të reja ndarje po hartohen në kurriz të shqiptarëve dhe kufj të rinj po ndërtojnë mes tyre.
Ogur i zi është qarkullimi i një draft- marrveshje mes Kosovës dhe Serbisë me qëllim njohjen e Kosovës nga Serbia në të cilin parashihet:
“Krijimi i Osecacionit të komunave serbe, i cili manaxhon shëndetësinë, ekonominë dhe arsimin nga Serbia.
Kisha Ortodokse Serbe me të gjitha pronat e saj në Kosovë do të jetë etnitet me pavarësi të ngjashme si të Vatikanit.
Krijimi i një komune të re serbe në Kosovë duke i marrë territor Vushtrisë, Obiliqit, Skenderajt e cila do të lidhet me Graçanicën, komunë me popullsi serbe, jetësimi i idesë mëparshme të Prilluzhës, që do të mbetej gozhda e Nastradinit.
Komuna e Lepasoviqit t’i takojë Serbisë në demarkimin e ri që do të bëhet mes Kosovës e Serbisë”.
Baca Adem, Gebëlsi i Millosheviçit,Vuçiçi me ndihmën e konspiracionistëve shqipfolës tentoj ta rrëmbejë Trepçen, vlera e të cilës është e barbartë me buxhetin 100 vjeçar të Shtetit të Kosovës, por Qeveria Haradinaj e shpalli atë pasuri shtetërore dhe e parandaloj.
Në Samitin e Berlinit, ndonse i vetëm bashkëluftëtari i juaj ish Kryeministri Haradinaj u ba barrikadë e pakapërcyeshme e skenarëve për ndarjen e Kosovës, dhe shterroj ëndrrat serbiane për Serbinë e madhe apo Jugosllavinë e re.
Fatkeqësisht në këtë skenar janë përfshirë me Vuçiçin Kryeministri ynë Rama e bashkëluftëtari juaj Presidenti Hashim Thaçi.
I çmendur nga dëshperimi për deshtimin, Kryeministri ynë me sivëllaun e tij Vuçiçin ideuan miniShengenin Ballkanik për të aneksuar Kosovën dhe krijimin e bajpaseve detare për Serbinë.
Paturpësia e Edi Ramës arriti deri aty sa ta padisë gjoja për shpifje bashkëluftëtarin tuaj, ish Kryeministrin e Kosovës z Ramush Haradinaj.
Baca Adem, Ramush Haradinaj i vendosi taksë Serbisë ndërsa Edi Rama u vendosi taksë shqiptarëve në Rrugën e Kombit dhe krijoj kufijë të ri, për shembien e të cilëve ju e dhatë jetën tuaj dhe sakrifikuat familjen.
Kryeministri ynë Edi Rama i kërkon Kryeministrit Albin Kurti ti heqë taksën Serbisë dhe deklaron nëpër studiot televizive se kosovarët e paguajnë taksën e Rrugës Kombit me krenari.
Baca Adem, kuislingët, esadistët, zervistët, kanë rrëmbyer pushtetin, dhe po luajnë pokër me demokracinë dhe Kombin tonë.
Koha therret Adem të rinj.
Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Opinione

Votimi elektronik, Mondi dhe dublanti humbës Salianji

Publikuar

-

Nga

Nga Artur Ajazi

Në qarkun e Korçës, i deleguari i Lulzim Bashës, ka një dublant të përshtatshëm për të justifikuar humbjen. Ai qark është përzgjedhur nga KQZ si “qark pilot” nga ku mund të realizohet votimi elektronik në 25 Prill, dhe ka peshë të konsiderueshme në zgjedhjet e reja parlamentare. Dhe ndoshta pikërisht për këtë gjë, Lulzimi ka preferuar të dërgojë atje mes dimrit të acartë, Edmond Spahon njeriun që dështoi të riorganizonte degën e PD Elbasan, (duke marrë atje dy humbje rradhazi) dhe humbësin apo njeriun e pavotuar për tu bërë pjesë e listës “së re” Ervin Salianji. Përgjatë gjithë procesit të pergatitjeve për zgjedhjet e reja dhe fushatë, Mondi do të dublohet nga Salianji.

Duket se Lulzimi kërkon që të zgjerohet “rrezja” e goditjeve për të sakrifikuar të tjerët për humbjen e madhe, dhe justifikuar punën e tij të dobët. Dihet se si është bërë përzgjedhja e drejtuesve politikë të cilët do të kenë “fatin” të kenë me vehte edhe dublantë ndihmës, për të mbajtur “peshën” e madhe të kësaj fushate. Sikur të mos kishte ndodhur asgjë në Elbasan, në qarkun me shumë probleme në fushën e organizimit të asaj partie, Edmond Spaho ka marrë transferimin e papritur, dhe është nisur drejt një qarku tjetër të madh, i cili historikisht njihet si shumicë socialiste. Por në fakt cila është gjendja reale në degën e Partisë Demokratike në Korçë, nga ku Lulzimi ka varur “shpresat”e humbura tek Mondi dhe dublanti Salianji.

Dihet se PD në Korçë, ka marrë goditje të fuqishme qysh nga 2013, dhe nuk mund të bëhet fjalë për “fitore absolute”, aq më tepër që ajo degë pothuajse nuk ka as kryesi të zgjedhur prej vitesh. Ndërkohë, edhe pse shpesh është ankuar se “reforma territoriale ka dështuar dhe se rishikimi i hartës është prioritet absolut i opozitës”, duket se kryetari i PD-së, nuk ka një opsion alternativ në tryezë poskthimit në variantin e 384 njësive vendore, por edhe ai model është provuar si i dështuar në fakt për atë parti. Për këtë ja vlen të përmendim situatën e krijuar në territorin e vendit me ndërtimet pa kriter gjatë mbretërimit të qeverisjes së demokratikasve, dhe kthimin e ish-komunave të dikurshme në qendra punësimi partiak.

Për këtë arsye PD-ja më tepër sesa një opsion për “korrigjim”, duket se propozon një model ku ka siguri elektorale dhe përfaqësimi. Akuza e saj se “reforma territoriale diskriminon elektoralisht atë”,mund të ketë bazë por ajo nuk mund të absolutizohet. Vetëm pak ditë më parë kryetari i PD-së Lulzim Basha deklaroi se “për sistemin zgjedhor le të vendosin shqiptarët, pasi PD-ja fiton me çdo sistem” pavarsisht se në mënyrë hileqare, aludoi për një “{referendum” që ai e di shumë mirë se nuk ka gjasa të zhvillohet. Por duke u kthyer te Korça, ja vlen të përmendim faktin se, ai qark konsiderohet nga demokratikasit si “barometri i zgjedhjeve”, dhe pikërisht atje Lulzimi delegoi njeriun më apatik dhe më të paaftë, duke i vënë pas edhe kandidatin e përjashtuar nga komisioni Ruli-Nishani. E rëndësishme është se as votimi elektronik,nuk e zgjidh problemin e kësaj opozite,paçka se Edi Rama ka vendosur të pranojë çdo propozim racional që ndihmon procesin zgjedhor.

Korça dhe gjithë Shqipëria, në 25 Prill, do të rikonfirmojnë sërish Partinë Socialiste edhe për një mandat tjetër qeverisës, pasi kjo është e vetmja rrugë që do të bashkojë vendin me familjen e madhe europiane, dhe do ti japë shansin e “artë” Lulzimit të njohë nga afër aftësinë e (pa)dukshme të Edi Ramës, mëshirën ndaj të dobëtit edhe kur e ka kundërshtar.

LEXO TE PLOTE

Opinione

Nga Kreshnik Spahiu/ Pse populli nuk e kupton, që zgjedhjet e 25 Prill janë shitur në tavolinë?

Publikuar

-

Nga

Pse populli nuk e kupton, që zgjedhjet e 25 Prill janë shitur në tavolinë?

5 vjet më parë kam përjetuar një nga ngjarjet më të hidhura në politikë.

Isha në Peshkopi gjatë fushatës elektorale për zgjedhjet e parakohshme të bashkisë e cila ishte shkaktuar nga “brekët e grisuara të Shukriut” ish kryetarit Bashkisë.

I brengosur nga ngjarja perverse vendosa të mbështesja Sherefedin Shehun, për të cilin unë ende kam shumë respekt.

Sapo mbërita në hotelin në qendër të Peshkopisë, dëgjova ulurimat e pronarit, i cili shante me nënē dhe babë disa persona.

U shtanga dhe mendova se do kriste pushka.

Dyshova mos ishte ndonjë bandë hajdutësh që i kishte vjedhur, por jo isha gabuar.

U afrova të ndihmoja pronarin që e njihja paksa dhe ti vija në ndihmë, por u befasova.

Në tavolinën që po shaheshin ishte kryesia e Partisë Demokratike, dy nënkryetarët, sekretarët dhe 10 antarët e kryesisë. Nuk ishte mbledhje. Thjesht ishin nē verandë me gota përpara.

Pronari vazhdonte të uluriste dhe i kërkonte njërit prej tyre të largohej nga hoteli.

“O pis, o maskara, o batakçi që shkatrrove Partinë Demokratike”

“ O plehrë që ke dy javë që pi vetëm raki dhe nuk bën asnjë mbledhje.”

E tërhoqa pronarin e Hotelit veç për të shmangur përplasjen fizike dhe e pyeta:

“Cfarë ka ndodh?”

Ai më tha: “Këta derra hanë dhe pinë pa paguar, dhe e diskredituan Partinë Demokratike. Nuk punojnë fare. Kanë ardhur gjoja për fushatë dhe ma mbaruan fuçinë e rakisë dhe gjithë qoftet apo jufkat e qytetit. Këta hanë dhe pinë si derra 12 orë”

Pas pak na u desh ta bindnim “drejtuesin” e Partisë Demokratike të largohej nga Hoteli se në të kundërt do ndodhte skandal.

Ishte moment tragjik që më ka lënë një shije të hidhur.

“Burri me thinja” mbushi valixhet me zhelet e tij dhe në sy të qindra klientve iku në një hotel tjetër.

Aq e rëndë ishte ngjarja sa mua më vjen shumë rëndë t’ja publikoj emrin dhe po e ruaj disi për etikë.

Mu kujtua kjo ngjarje, tek po lexoja emrat e drejtuesve të listave për deputet në disa qarqe të opozitës shqiptare.

Ishin të njëjtat emra dhe figura që i përzuri pronari i Hotelit në Peshkopi.

I lexova dhe kujtova ngjarjen e pianecve ordiner që nuk fituan dot garën as kundër brekëve të grisura të socialstëve në Peshkopi.

Sot thjesht kuptova: Që zgjedhjet janë shitur, njësoj si ato ndeshjet e futbollit që u kuptohet rezultati para se të filloj ndeshja, që nga momenti kur trajneri përcakton formacionin humbës.

Listat humbëse të Lulzim Bashës në Durres,Fier, Korce, Elbasan, Shkoder, Korçe, Tiranë s’janë as nga budallallëku dhe as nga paaftësia.

Thjesht janë formacione humbëse për një ndeshje të shitur.

Kush ka sy le ta shikoj, dhe kush ka vesh le ta dëgjoj. Rezultati i zgjedhjeve në 25 Prill është bërë pazar në tavolinë, prandaj 6 muaj përpara zgjedhjeve trajneri mori 4 vila me pishinë dhe i vuri në emër të kunatit.

Mund të duronte dhe 6 muaj nëse shpresonte në fitore, por jo aspak. Ai e di rezultatin humbës.

Kap ç’të kapësh para humbjes dhe dorëheqjes.

Në 26 Prill do i duhet të largohet si kryetar por i duhet që të ketë edhe një alibi.

Këtë rradhë do të thotë: Emrat dhe listën pa “Nishan” e bëri Jari dhe Besniku.

3 muaj para zgjedhjeve s’kanë akoma lista

3 muaj para zgjedhjeve po shqyhen mes vetes

3 muaj para zgjedhjeve po ndahen nga LSI

3 muaj para zgjedhjeve grinden për emra

3 muaj para zgjedhjeve sulmojnë partitë e reja

3 muaj para zgjedhjeve s’kanë zyra elektorale

3 muaj para zgjedhjeve Basha del vetëm kudo

3 muaj para zgjedhjeve deklaron 4 vila

3 muaj para zgjedhjeve s’kanë asnjē figur te re

3 muaj para zgjedhjeve emrat e njëjt si në 2017

Keqardhje e madhe për mijëra demokratë që kanë 8 vjet enden rrugëve duke protestuar dhe bërē tifozllëk për Lulzimin. Në 26 Prill do ju dal “narkoza” dhe kuptojnë pazarin dhe ndeshjen e shitur në tavolinë nga trajneri, i cili kur e pa të pamundur fitoren, i ra shkurt dhe tha:

“Kap ç’të kapësh se humbjen e kam në xhep”

LEXO TE PLOTE

Opinione

Nga Fatos LUBONJA/Si mund ta pranojmë vaksinën “sekrete” të Ramës

Publikuar

-

Nga

Gjatë ditëve të fillimit të janarit kanë ndodhur dy ngjarje që pushtuan mediat tradicionale, portalet dhe rrjetet sociale. Njëra ishte videoja e darkës në Dubai, që tregonte ministra, zyrtarë të lartë dhe të pushtetit lokal (disa bashkë me gratë) duke ngrënë darkë në një restorant super të shtrenjtë, së bashku me biznesmenin më të fuqishëm të vendit, ndërkohë që Shqipëria ishte nën ujë. Tjetra ishte njoftimi i papritur dhe shumë i çuditshëm dy ditë më vonë nga Kryeministri, se në Shqipëri do të fillonte vaksinimi – me disa vaksina që nuk tregohej se nga kishin ardhur – ndërkohë vaksinimi pritej të fillonte pas javës së tretë të janarit.

Komentet më të shumta kritike që i lidhën të dyja ngjarjet ishin se Rama e kishte nxjerrë lajmin e vaksinimit – duke siguruar shpejt rreth 900 vaksina – për të mbuluar skandalin e Dubait. Dhe në këtë qasje, ajo që ra në sy, në ditët në vazhdim, ishte ngulmimi nga ana e kritikëve për të trajtuar skandalin e Dubait, duke nxjerrë fakte pas faktesh se ajo tryezë ishte treguesi më i mirë se si funksionon shteti ynë i oligarkëve, sesi po shitej Durrësi dhe Vlora pa tender tek arabët, si dhe duke numëruar gënjeshtrat e Kryeministrit lidhur me këtë skandal, ndër to edhe stratagjemën e vaksinave.

Ndoshta, edhe për këtë arsye, ngjarjes së vaksinave, megjithë kritikat serioze të një pakice për mungesë transparence, i mbeti hija e një ngjarjeje pozitive për Kryeministrin tonë. Këtë perceptim sikur e përforcoi edhe një lloj gati heshtjeje e opozitës ndaj kësaj ngjarjeje, nisur nga ideja – të paktën kjo është një nga interpretimet që kam dëgjuar më shumë – se kjo sjellja e vaksinave është në favor të Ramës, se ata nuk mund të dalin kundër vaksinimit, kundër mjekëve që shkuan u vaksinuan në rresht, pasi pjesa më e madhe e zgjedhësve të mundshëm e shohin si pozitive.

Edhe unë mendoj se me shumë gjasa Rama e ka bërë këtë akt për të tërhequr vëmendjen nga skandali i Dubait me diçka pozitive, por sipas meje vetë fakti që i ka shkuar mendja të përdorë një stratagjemë të tillë, por, mbi të gjitha, mënyra e sjelljes së atyre vaksinave, fjalët me të cilat e shoqëroi në publik, ku si qershia mbi tortë ishte deklarata se “këto i keni pasi keni Edi Ramën Kryeministër”, janë një skandal më vete që jo që nuk e lan aspak skandalin e Dubait, por e plotëson atë në aspektin më dramatik që përmbajnë të dyja skandalet: mënyrën pa institucione, pa ligj, pa kontroll, pa drejtësi se si funksionon ky palo shtet gangsterësh e trafikantësh.

Ndonëse Edi Rama na ka paralajmëruar se “nuk keni parë gjë akoma”, duke na e provuar këtë në mënyrë të progresive me skandale gjithnjë e më të rënda, përsëri do të thosha se kjo mënyra e sjelljes së 900 vaksinave hyn në çuditë që nuk i kishim parë deri tani. Përpara saj nuk mund të mos ngresh me një habi të re pyetjet: si ka mundësi të dalë Kryeministri i një vendi të thotë në publik – për një çështje kaq sensitive – se këto vaksinat na i ka dhënë një vend i BEsë, por unë nuk e them se cili është?! Si ka mundësi t’i trajtojë vendet e BE-së sikur të funksionojnë me mendësinë tonë: si shtet trafikantësh?

Dhe kjo habi e re nuk ka të bëjnë thjesht me Edi Ramën, por me pyetjen më të përgjithshme: si ka mundësi që jemi katandisur deri këtu?! Nuk po e lidh habinë me faktin se shteti e ka për detyrë të na bëjë transparencë, veçanërisht duke pasur parasysh skepticizmin që ekziston mbi efektet anësore që mund të shkaktojnë këto vaksina të nxjerra në kohë rekord. Ajo që është shumë më e habitshme dhe shumë alarmante në këtë histori, është se Kryeministri i vendit sillet si një kontrabandist në qiell të kaltër dhe nuk ka asnjë reagim institucional, por as nga opozita, për të ngulmuar në kërkimin e së vërtetës të kësaj ngjarjeje, përveç disa gazetarëve që u jepet nga Kryeministri përgjigjja: “Nuk të përgjigjem”.

Ndër variantet që kam dëgjuar nëpër korridoret e gazetarisë për atë se kush i ka sjellë vaksinat, më kanë tërhequr vëmendjen dy syresh. Njëri që vjen nga më afër zyrave të Kryeministrit, sipas të cilit vendi mik qenka Italia, por Kryeministri Conte nuk dashka që kjo të dalë për shkak të opinionit publik italian që pret me padurim vaksinat për vete. Ky version më duket krejtësisht i pabesueshëm. Sepse, nëse do të ishte vërtet Italia, jo vetëm se kjo nuk do të mbahej e fshehtë për detyrimet e transparencës që ka shteti italian ndaj qytetarëve të vet, por edhe sepse Conte nuk do ta kishte aspak problem t’ua bënte të ditur këtë italianëve, duke u rikujtuar faktin e shumëduartrokitur prej tyre se qeveria shqiptare dërgoi në pranverën e vitit të kaluar grupin e mjekëve dhe infermierëve. Italianët kanë një shprehje: “O mangi questa ministra o salti dalla finestra!”. (O haje këtë çorbë, o hidhu nga penxherja!). Ky varianti i Ramës me shtetin e BE-së që nuk do t’i dalë emri më duket si: “O hani gënjeshtrën time, o hidhuni nga penxherja!”.

Mungesa e paraqitjes së çertifikatës doganore nga vendi prej ku kanë dalë vaksinat për mua bën më të besueshëm një variant të dytë që kam dëgjuar: se vaksinat i paska sjellë një privat që merret me shpërndarjen e vaksinave në Gjermani. Sjellja dorazi e kësaj pakoje, pretendimet e Kryeministrit se nuk ka si na e thotë emrin, gënjeshtrat e atyre mjekëve si Pipero që deklaruan se këto kishin ardhur që dy ditë më parë dhe ruheshin në frigoriferë e posaçëm për to, ndërkohë që ato erdhën ditën që u injektuan, mua më duken si prova të mjaftueshme për të ngritur dyshimin e arsyeshëm se këtu kemi të bëjmë me një trafikim, përveçse me një mashtrim të rëndë të shqiptarëve e prandaj duhet hetuar. Kurse ky reagim kaq i dobët i opozitës, por edhe i opinionit, për të ngulmuar në zbardhjen deri në fund të së vërtetës të kësaj ngjarjeje është një sinjalizim se do të na shohin sytë gjëra edhe më të paimagjinueshme se kjo në degradimin e shtetit./ Panorama

LEXO TE PLOTE