Politikë
Nga Armir SHKURTI/ Më e madhe frika nga frika se nga virusi
“Aman boll me koronavirusin”! “Na çmendët”! “Mos me panik”! I lexon e i dëgjon përditë. Më mirë të mos e dimë të keqen. Kur të vijë – të vijë! Apo nuk është ky mentaliteti ynë? Sa prej nesh kanë dëgjuar tek mjeku: “Ke ardhur vonë”? Për vete a për familjarët. Sepse pa na rënë zali në rrugë për qamet se vemi te mjeku. Gënjejmë veten se “nuk është gjë”! “Do kalojë”! Ther e dhemb trupi por “s’është gjë”! Ftohmë, lodhje, virozë ia vëmë vetes diagnozën për të shpëtuar nga frika.
E TMERRSHME FRIKA NGA E VËRTETA!
“Vetëm 2% vdesin nga koronavirusi dhe ata mbi 70 vjeç”.
Ah sa mirë! Ia hodha! Ra zjarri në fshat – larg shtëpisë time. Ra në shtëpinë time – larg b*** time! Anipse 70 e sipër mund të keshë prindërit a të afërm. “Ata e kanë ngrënë çahirin. Ça ti bëjmë ne? Si ta kenë fatin” ! Sepse në shekujt që na u desh të zhvillonim instiktin e përshtatjes për të mbijetuar na u bë natyrë të SHPËTOJMË VETËM PRAPANICËN TONË!
“E kanë ngrënë çahirin” dëshmon dhe padijen e mungesën e respektit për jetën. Plaku ( që supozohet i tillë që kur i bie takati seksual apo i hollohet kuleta pas pensionit ) çdo ditë jete qar e ka. Sepse në shumicën e rasteve ne AS KUPTIMIN E JETËS NUK E DIMË !
S’kish ç’më duhej kjo përsihatje me koronavirus e frikë këtë të dielë sikur të njejtin tip sjelljeje të mos e ndeshim në sjelljen tonë politike. Ngulet një regjim në Shqipëri, tregon dhëmbët dhe ne kemi më shumë frikë nga frika sesa nga dhembja. Para zgjedhjeve të vjetshme u përmend viti ’97. “Aman mo vetëm luftë të mos na bëhet pa…” Mjaft ta bësh gjumin e ëmbël? Për të tjerat përshtatesh ë? U përshtate 5 shekuj me turkun. Ke një shekull që përshtatesh me shtypjen, padrejtësinë dhe totalitarizmin por nuk ke frikë prej tyre! Ke frikë nga frika. Si ai në anekdodën me ferrin që zgjodhi të vuante përjetësinë në një gjol me fekale. E kur nisi të futej, një gojë që mezi dukej mbi cipën e qetë të liqenit iu lut: “Aman mos bëj dallgë”!/ CNA.al
Politikë
Pas gjashtë vitesh qeverisje/ Rama pranon publikisht dështimin
Kryeministri Edi Rama, me dashje apo pa dashje ka pranuar sot që sistemi arsimor në Shqipëri është i dështuar. Është një sistem i cili prodhon diploma pa vlerë.
Gjatë fjalës së tij në Kongresin e Partisë Socialiste, Rama tha se sipërmarrjet në Shqipëri vuajnë nga mungesa e punonjësve.
“Ka shumë të rinj që nuk janë të aftë për punë, por kanë në dorë një dreq diplomë për jurist. Në Durrës një sipërmarë më tha se sipërmarrjet në Shqipëri nuk kanë punëtorë. Dhe nën atë pallat ishte një kafe, të rinjtë rrinin aty, kafe e muhabet si turqit e lashtë. Dhe kur iu them pse nuk punoni, më thanë jemi juristë”-u shpreh Rama.
Ishte kjo një frazë realisht e përsëritur nga kreu i qeverisë, por ndoshta Rama ka “harruar” që ka gjashtë vite që qeveris këtë vend e nëse universitetet tona nxjerrin jurista të paaftë për punë, është edhe përgjegjësia e tij.
Dhe ata “jursitët e paaftë” siç i cilëson Rama janë dërguar në universitet tona vërtetë me sakrifica, nga “lekët e babit”, sikurse ka qejf të ofendojë të rinjtë Rama, por faji se pse në universitet kanë marrë një diplomë pa vlerë, sërish nuk është as i tyre dhe as i “babit” që jep lekët.
Përgjegjës për këtë është vetë Edi Rama me shokë. Bashkë me të gjithë ata që e kanë degraduar këtë vend në këtë gjendje, ku juristi me diplomë duhet të punojë në ndërtim, ndërsa i pashkolli bëhet deputet./ CNA.al
Politikë
Rama sulmon mediat dhe analistët/ Shthurja e gjuhës nuk është cilësi, nuk iu dëgjon njeri
Kryeministri Edi Rama vijon të sulmojë mediat, por edhe analistët që dalin në ekranet telvizive. Gjatë fjalës së tij në Kongresin e PS-së, Rama tha se debatet televizive kanë shthurur gjuhën.
Sipas kreut të qeverisë, kjo nuk është cilësi demokratike, por përkundrazi flasin shumë e nuk i dëgjon askush.
“Mjafton të hapësh televizorin e të shohësh, larg qoftë një debat në televizor, them larg qoftë se unë nuk i shikoj. Ta shohësh ku shkon lira e çfarë lirie kanë përballë shthurjes së gjuhës. Por kjo nuk është cilësi demokratike. Cilësinë e përcakton fakti sa dëgjohesh, jo sa flet. Këtu është bërë fol fol por kush po të pyet”-tha Rama.
Politikë
Rama i përgjigjet Metës/ Të merresh me “Besëliken”, humbje kohe dhe degradim
Kryeministri Edi Rama ka reaguar sot në lidhje me thirrjen e presidenti Ilir Meta për tubimin e dy marsit, dhe për të ashtuquajturën “Besëlidhje”, të trumbetuar nga kreu i shtetit.
Gjatë fjalës së tij në Kongresin e PS, Rama e cilësoi humbje kohe dhe degradim të merresh, me “Besëliken”, duke ironizuar kështu presidentin Meta.
“”S’mund të jetë debat që të marrim vendin peng, debati që ka marrë mediat peng për gjithë këto kohë, besëlidhja dhe besëlikja, nuk është ky debati. Kush është me Besëlidhjen e kush me “Besëliken”. Kjo është humbje kohe, degradim dhe goditje e shpresës së në këtë vend mund të jetohet normalisht dhe se ky vend nuk është peng i atyre që dalin në TV e shafqen sikur janë ata dhe pas tyre nuk ka asgjë tjetër”-tha Rama.
