Një aksident ka ndodhur mesditën e sotme në zonën e mbikalimit të Kamzës në Tiranë.

Një makinë ka përplasur një efektive policie teksa ishte duke kryer detyrën. Ajo ndodhet në spital jashtë rrezikut për jetën.

“Më datë 15.01.2021, rreth orës 12:55, tek Cassa Italia, mjeti me drejtues K. V, ka aksidentuar punonjësen e policisë të qarkullimit rrugor shtetasen A. Sh, aktualisht në shërbim, e cila u dërgua në spital dhe ndodhet jashtë rrezikut për jetën.
Grupi hetimor dhe sherbimet e Policisë vijon punën për sqarimin e rrethanave të aksidentit”, njofton policia./CNA.al

Si rezultat i bashkëpunimit të Interpol Tiranës me zyrat homologe, falë shkëmbimit të vazhdueshëm të informacionit, është bërë i mundur arrestimi dhe më pas ekstradimi drejt vendit tonë i 2 shtetasve shqiptar, si dhe ekstradimin drejt Kosovës i një tjetër shtetasi shqiptar.

U realizua me sukses ekstradimi nga Stuttgart/Gjermani drejt vendit tonë, i shtetasit shqiptar:

Gj. Ç., 56 vjeç, banues në Korçë.

Ky shtetas ishte shpallur në kërkim ndërkombëtar nga ZQK Interpol Tirana, pasi Gjykata për Krimet e Rënda Tiranë, me vendimin e datës 11.09.2019, i ka caktuar masën e sigurisë “Arrest në burg”, për veprat penale “Trafikimi i narkotikëve”, “Grupi i strukturuar kriminal” dhe “Kryerja e veprave penale nga grupi i strukturuar kriminal”.

Ky shtetas, në bashkëpunim me shtetas të tjerë, ka qenë pjesë e një grupi të strukturuar kriminal që merrej me trafikimin e lëndëve narkotike.

Gjithashtu, nga Interpol Tirana është bërë i mundur ekstradimi nga Republika e Kosovës drejt vendit tonë, i shtetasit shqiptar:

Indrit Taullai., 46 vjeç, banues në Durrës.

Ky shtetas ishte shpallur në kërkim, pasi Gjykata e Posaçme e Shkallës së Parë për Korrupsionin dhe Krimin e Organizuar Tiranë, me vendimin penal të datës 02.12.2020, i ka vendosur masën “Arrest në burg” për konsumimin e veprave penale “Vrasja me paramendim e kryer në bashkëpunim në formën e grupit të strukturuar kriminal”, “Mbajtja e paligjshme e armëve të zjarrit, me pasoja të rënda”, “Grupi i strukturuar kriminal”, “Vrasja në rrethana të tjera specifike ndaj dy ose më shumë personave, kryer në bashkëpunim në formën e grupit të strukturuar kriminal”.

Po nga zyra e ZQK Interpol Tirana, ditën e sotme është finalizuar me sukses ekstradimi drejt Republikës së Kosovës, i shtetasit shqiptar:

A. I., 58 vjeç, banues në Fier.

Ky shtetas ishte shoqëruar nga Drejtoria Vendore e Policisë Fier, pasi Gjykata e Lartë, me Vendimin e Kolegjit Penal të kësaj gjykate, datë 11.12.2020, ka vendosur mospranimin e rekursit të paraqitur nga ky shtetas ndaj vendimit të datës 23.07.2020 të gjykatës së Apelit Vlorë (me të cilin ishte vendosur lënia në fuqi e vendimit lejues të ekstradimit nga Gjykata e Rrethit Gjyqësor Fier).

Ky shtetas është ekstraduar drejt Republikës së Kosovës, me qëllim ekzekutimin e masës së sigurimit “Arrest në burg” të vendosur nga Gjykata Themelore Prishtinë, për veprat penale “Krim i organizuar ” dhe “Blerje, posedim, shpërndarje dhe shitje e paautorizuar e narkotikëve”.

Gjykata e Dibrës ka shtyrë marrjen e vendimit për dosjen “184” që ka marrë vëmëndjen e opinionit publik për shitblerjen e votës.Mësohet se seanca do të mbahet më 29 janar.

Gjykata do të vendoste nëse do ta kalonte dosjen për gjykim apo do të kërkonte rihetim nga Prokuroria. Sakaq familjarët dhe të akuzuarit kanë thënë se ata janë viktima.

“As kryetari i bashkisë nuk kishte strehë, as kryetari i partisë nuk kishte strehë, asnjë nuk ishte këtu. Viktimat ishin këtu”, thotë njëri prej familjarëve të të akuzuarve.

Prokuroria e Dibrës i ka dhënë fund hetimeve dhe ka marrë të pandehur 4 persona të identifikuar si Robert Aga ish-shefi i komisariatit në Dibër, Drini Gjeci ish-drejtori i arsimit, Nuri Meda zyrtar në njësinë administrative të Tominit dhe Hasan Hoti nga njësia administrative Lurë.

Ata janë në akuzën për “kanosje të zgjedhësve” dhe për “Shpërdorim detyre”. Mësohet se për  pjesën tjetër të personave nën hetim Dionis Imeraj, Imer Lala, Arben Keshi, Bekim Krashi, Afrim Mikli, prokuroria ka  kërkuar pushimi i çështjes.

Dosja “184” u regjistrua fillimisht nga Prokuroria për Krimet e Rënda pas një kallëzimi të Partisë Demokratike, për dyshime mbi shitblerje të votës në zgjedhjet e Dibrës, kur fitues doli Muharrem Rama i PS përballë Sherefedin Shehut të PD./CNA.al