LEXO PA REKLAMA!

SHKARKO APP

Vettingu në polici, si një lugë çorbë e prishur

7 Shkurt 2020, 09:42, Politikë CNA
Vettingu në polici, si një lugë çorbë e prishur

Pasi filloi Reforma në Drejtësi dhe Vettingu, pra transparenca për gjyqtarët dhe korrupsionin në sistemin e drejtësisë, Fatmir Xhafaj, në kohën që ishte ministër i Brendshëm, shpalli Vettingun edhe në Policinë e Shtetit.

Një Vetting i cili duket të jetë herë një hanxhar mbi kokat e policëve apo drejtuesve të lartë të policisë, e herë një lugë çorbë e prishur që e gëlltit për ta vjellë gjithë jetën.

Kjo batutë e dytë, e huazuar nga filmi ?Ilegalët?, është më e neveritshmja e Vettingut në Policinë e Shtetit.

Së pari shikon Drejtorin e Përgjithshëm të Policisë së Shtetit, Ardi Veliu që shkon e dorëzon ca letra dhe me 50 faqe raport nga një Vetting për t?u kontestuar shikon se ai është pa bukë, është gati me ndihmë ekonomike dhe i mbytur në borxhe, me 24 milion të marra nga vjehrri, e kështu me radhë, pa folur për pjesët e tjera problematike.

Shikon drejtues të tjerë të Policisë së Shtetit, ku flitet për 200 milion të dhëna nga një shok, e kështu me radhë, të cilët kalojnë Vettingun, pa asnjë lloj problemi.

Shikon të sulmohen eksponentë të caktuar përpara Vettingut me materiale të nxjerra nga instrumenta politik brenda Vettingut në polici.

Pra, ?luga e çorbës? funksionon shumë mirë. Dikush sulmohet në media dhe i nxirret një raport, dikush tjetër që i ka edhe më të keq dhe më të nxirë raportin, nuk i del ai, por e kalon me lehtësi Vettingun.

Pra, duket se hanxhari mbi kokat e Policisë së Shtetit funksionin dhe është një moment delikat, ku shtetit thuajse është shthurur, ku bandat kontrollojnë gjithçka, kriminelët e dënuar po lirohen dhe policia ndihet më e pasigurtë se kurë.

Asnjëherë dhe në asnjë rast nuk duket të jetë për të forcuar Policinë e Shtetit dhe për të bërë transparencën e saj. Por, luga e çorbës së prishur në Vetting duket të jetë mënyra për të goditur disa elementë profesionistë në Policinë e Shtetit.

Por, nga ana tjetër më parë nuk është përdorur kjo formë, por janë përdorur lëvizjet politike dhe emërimet transferuese, duke i degdisur oficerët e karrierës nëpër detyra shumë të ulëta deri në roje poste.

Këtë herë politika ka gjetur një mënyrë tjetër për të goditur, duke përdorur një gjoja Vetting në polici.

Një Vetting i filluar nga ata që nuk kanë kaluar kurrë në Vetting, nga politikanët. Po kërkohet të goditet Policia e Shtetit, po kërkohet të goditen drejtues të saj, ndërkohë që ka shumë struktura që mund ta kontrollojnë atë. Ndërkohë që me dhjetëra apo qindra oficerë karriere janë goditur më përpara me emërime dhe lëvizje të pandershme apo edhe largime nga funksionet e tyre.

Sot për të liruar ca hapësira apo për të hequr atë që nuk i pëlqen ministrit të radhës po përdoret një Vetting që është herë një hanxhar e herë përdoret si një lugë çorbë e prishur, për të ndotur imazhin e drejtuesve të policisë në publik.

Policia e Shtetit nuk është më e mira, nuk është vërtetë ajo që ne duam, ka shumë probleme, por është në një moment delikat dhe hanxhari mbi kokën e saj dhe ta ushqesh me çorbën e prishur, është një plagë që ndoshta nuk do të mbyllet kurrë. Do ti dhembë shumë gjatë. Në një moment delikat për vendin, policia nuk po e merr goditjen nga krimi, i cili po e ndien se ka terren të lirë, por nga politika.

Nga ajo që me shpatë të madhe filloi reformën në drejtësi, e cila po zgjat pafundësisht dhe gjithashtu po fut në kolaps edhe vetë Policinë, e cila ka në strukturë oficerë të lartë por dhe një trupë profesioniste, jo pa probleme, por që tashmë duket në ankth, e stresuar sepse në çdo moment mund të goditet padrejtësisht. Dhe ajo nga ka një trupë në luftë kundër krimit mund të kthehet në një kërmë e hedhur në rrugë që ta shqyejnë hijenat e krimit. Dhe këtë shërbim më mirë se kurë po e bën çorba e prishur, e gatuar nga politika, me një Vetting që duket të jetë vërtetë hanxhar mbi kokat e Policisë së Shtetit./ CNA.al

Lajmet e fundit nga