Connect with Us

Kërcënimet ekonomike që i vijnë Evropës, nga apatia ndaj fuqive të mëdha

Blog

Kërcënimet ekonomike që i vijnë Evropës, nga apatia ndaj fuqive të mëdha

Publikuar

-

Nga Jonathan Hackenbroich, “European Center of Foreign Relations”

* Amerika dhe Kina, po përdorin tashmë kërcënime të forta ekonomike ndaj Gjermanisë dhe Evropës. Dhe kjo gjë po ndodh për 3 arsye: nga paaftësia e Evropës për të mbrojtur veten nga efektet e sanksioneve mbi Iranin, për shkak të Turqisë, dhe nga gazsjellësi “Nord Stream 2”.

Javës që shkoi Ministria gjermane e Mbrojtjes, konfirmoi se Shtëpia e Bardhë kërcënoi të vendosë tarifa mbi makinat e vendeve evropiane, përveçse nëse ato vënë në lëvizje Mekanizmin e Zgjidhjes së Mosmarrëveshjeve mbi marrëveshjen bërthamore të Iranit, një akt që mund të çojë në prishjen e një marrëveshje që evropianët duan të mbështesin.

Po javën e shkuar, “The New York Times” zbuloi se Pekini e ka kuptuar, se mund t’i imponohet në të njëjtën mënyrë evropianëve, duke përdorur kërcënimin me tarifa të tilla, për ta detyruar Gjermaninë të pranojë ofertën e kompanisë Huauei për të ndërtuar rrjetin 5G në vend.

Por evropianët, nuk është se nuk janë paralajmëruar për këtë që po ndodh. Vetëm në politikën e sanksioneve, ka pasur 3 shenja kryesore. Natyrisht, shenja e parë ishte me Iranin. Është e vërtetë se evropianët po mendojnë tashmë nëse do të rivendosin apo jo sanksionet e tyre ndaj Teheranit, në përgjigje të përshkallëzimit të fundit të situatës në Lindjen e Mesme.

Deri vonë, vullneti i evropianëve ishte të vazhdonin tregtinë me Iranin, pavarësisht sanksioneve të ashpra të SHBA-së. Madje, evropianët ndërmorrën disa nisma për t’i ndihmuar kompanitë evropiane t’i tejkalonin sanksionet amerikane. Por tani ata janë ndërgjegjësuar, se një fuqi e madhe thuajse ka ndërprerë plotësisht tregtinë me ta.

Prandaj Evropa e sheh gati të pamundur eksportimin e mallrave për synime humanitare në Iran.

Megjithëse Irani kurrë nuk ka qenë asnjëherë një nga partnerët më të mëdhenj tregtarë të Evropës, shenja e dytë paralajmëruese, tregoi se sanksionet shkatërruese amerikane, mund të godisnin shumë shpejt kompanitë evropiane. Kur presidenti turk Rexhep Taip Erdogan vendosi trupa në Sirinë Verior në tetorin e vitit të shkuar, presidenti amerikan Donald Trump, u përball me kritika të ashpra në SHBA për braktisjen e kurdëve.

Brenda disa orësh, ai firmosi një urdhër ekzekutiv që përfshinte masa drastike shtrënguese kundër Turqisë, duke deklaruar se do të “shkatërronte” ekonominë turke, nëse Erdogan vepronte kundër interesave amerikane. Trump i dha Sekretarit të Thesarit kompetenca të gjera, për të vendosur sanksione ndaj gjithë kompanive evropiane të përfshira në sektorët kryesorë të ekonomisë turke.

Shumë banka evropiane dhe kompani të tjera që bëjnë biznes në Turqi, do të gjendeshin papritmas në shkelje të ligjit amerikan. Fatmirësisht, Turqia ndryshoi kurs, duke arritur një pakt armëpushimi me Rusinë, dhe Trump anuloi vendosjen e sanksioneve.

LEXO EDHE:  Rusia e SHBA diskutojnë planin e Moskës për sulme kundër ISIS në Siri

Shenja e tretë paralajmëruese, lidhet me gazjellësin “Nord Stream 2”. Ky rast ilustron se si tregtia evropiane me vendet e treta është nën kërcënim, jo vetëm nga një president i paparashikueshëm që vepron instiktivisht, por edhe nga Kongresi Amerikan, kur anëtarët e të dyja partive mund të mos kenë skrupuj në lidhje me ndërhyrjen në ekonominë e Evropës, kur interesat amerikane dhe ato evropiane dallojnë nga njëra-tjetra.

Si Uashingtoni ashtu edhe Pekini, e kanë parë se si Gjermania dhe pjesa tjetër e Evropës, reaguan ndaj këtyre 3 veprimeve paralajmëruese. Ata e panë se evropianët u përpoqën të mos reagonin fare. Dhe kjo gjë mund të ketë krijuar një precedent të rrezikshëm për të dyja fuqitë e mëdha:që  nëse ushtrojnë mjaftushëm presion ekonomik mbi Evropën, mund të marrin politikën e jashtme apo rezultatet ekonomike që duan.

Sigurisht, të tria rastet janë shumë komplekse, dhe paraqesin vështirësi reale. Irani, është një temë e vështirë, pasi regjimi përdor sistematikisht dhunën për qëllime gjeopolitike në Lindjen e Mesme, dhe paraqet një kërcënim për Izraelin.

Edhe “Nord Stream 2”, është një çështje delikate pasi projekti anashkalon partnerët e saj të Evropës Lindore, dhe e rrit varësinë e Gjermanisë nga Rusia. Uashingtoni dhe Pekini, duket se interpretojnë gjithnjë e më shumë mosveprimin e evropianëve si dobësi, dhe si një ftesë për përdorimin e më shumë mjeteve shtrënguese, në ndjekje të interesave të tyre ekonomike dhe gjeopolitike.

Për shembull, Kina po harton një ligj të ri të kontrollit të eksportit, që është në kundërpërgjigje ndaj një ligji të ngjashëm amerikan, dhe përmes efekteve të tij ekstraterritoriale, mund të pengojë ndjeshëm tregtinë e Evropës me vendet e treta.

Në dritën e këtyre paralajmërimeve, është gjithnjë e më e rëndësishme që Gjermania dhe vendet e tjera evropiane të mbledhin mjetet e tyre, për të reaguar ndaj përdorimit të presionit ekonomik nga fuqitë e mëdha ekonomike. Në këtë kuadër, është e rëndësishme që Evropa të kuptojë varësitë asimetrike që formojnë marrëdhëniet e saj me fuqitë të mëdha, dhe të krijojë mekanizma parandalues ​​të besueshëm.

Evropa mund të veprojë më me forcë, por pa i dëmtuar marrëdhëniet e saj me Shtetet e Bashkuara (gjë që do të ishte një gabim strategjik). Nëse nuk reagojnë, evropianët do të ftojnë Uashingtonin dhe Pekinin të përdorin sërish kërcënimet e tyre të fundit./ Përshtatur nga CNA.al

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Blog

Pse njerëzit përdorin fotot në çift, si foto të profilit të tyre në mediat sociale

Publikuar

-

Nga

Ndërsa lëvizni lart e poshtë në Facebook, ju e shihni:Miku juaj, ka ndryshuar foton e profilit të tij. Por në vend të një fotoje ku ai ka dalë vetëm, ti sheh një foto në çift, të mikut tuaj me partneren e tij. Po përse njerëzit zgjedhin zakonisht fotot në çift, si foto të profilit të tyre?

Sipas një studimi më të fundit zgjedhja e fotove në çift, postimi i statusit të marrëdhënies së tyre dhe përmendja e partnerit në përditësimet e profilit në mediat sociale, të gjitha mund të
jenë shenja se si njerëzit ndihen në marrëdhëniet e tyre,dhe mund të dërgojnë një mesazh të rëndësishëm tek rivalët e mundshëm.

Po kush e bën këtë gjë? Ajo që psikologët socialë e quajmë “shfaqje diadike”, është relativisht e zakonshme. Në një studim të kohëve fundit, 29 për qind e përdoruesve të përfshirë në lidhje romantike, kishin si foto profili në Facebook një foto në çift. Shtatëdhjetë për qind e tyre, kishin të shënuar në status “në një marrëdhënie” ose “i martuar”.

Dhe pjesëmarrësit në studim, e përmendnin partnerin e tyre në 15 për qind të përditësimeve të tyre të fundit në Facebook. Disa njerëz, kanë më shumë të ngjarë të kenë sjellje të tilla, sesa
të tjerët. Njerëzit që janë shumë të kënaqur, ose të përkushtuar në marrëdhëniet e tyre romantike, kanë më shumë të ngjarë të postojnë foto të profileve në çift.

Sa më i dashuruar që është një person i lidhur, dhe sa më shumë xhelozi që raporton ai në pyetësor, aq më shumë të ngjarë ka të postojë statusin e marrëdhënies së tij në Facebook. Njerëzit që janë zakonisht në ankth në një marrëdhënie – pra që kanë frikë se mos partneri e refuzon apo braktis – kanë gjithashtu më shumë të ngjarë të përdorin një foto në çift si foto profili.

LEXO EDHE:  Si mund të kurseni 30 mijë dollarë/ Ndiqni këtë këshillë të vlefshme

LEXO EDHE:  Trafikoi 613 kg kokainë/ Gjykata gjermane vendos ekstradimin e Arbër Çekaj në Shqipëri

Nëse dikush e thekson apo jo statusin e tij në internet, kjo mund të ndryshojë në varësi të mënyrës sesi ndihet ai person në një kohë të caktuar. Njerëzit kanë më shumë gjasa të postojnë informacione që lidhen me marrëdhëniet në Facebook, në ditët kur ndjehen më të pasigurtë në lidhje me ndjenjat e partnerit të tyre, sesa në ditët kur ndjehen më të kënaqur nga marrëdhënia e tyre.

Një sondazh me 236 përdorues të Facebook e mbështeti këtë ide. Po ai zbuloi një arsye tjetër:Ata janë të motivuar të mbrojnë marrëdhëniet e tyre nga kërcënimet që ekzistojnë në mediat sociale. Përdorimi i Facebook, Twitter dhe rrjeteve të tjera sociale, i ekspozon njerëzit ndaj një sërë gjërash që mund të dëmtojnë potencialisht marrëdhëniet e tyre, përfshirë ish-partnerët, apo partnerët alternative.
Ndërkohë jashtë mediave sociale, hulumtimi ka treguar se njerëzit në një marrëdhënie romantike, përfshihen sërish në një mori sjelljesh për të mbrojtur marrëdhëniet e tyre, kundër kërcënimeve të paraqitura nga partnerë alternative dhe rivalë romantikë.

Përmendja e partnerit ose e marrëdhënies së tyre, është një mënyrë përmes së cilës njerëzit mund të përpiqen t’i largojnë këto probleme të mundshme. Studiues të tjerë, kanë zbuluar se disa njerëz e shfaqin partnerin dhe marrëdhënien e tyre në profilin që kanë në mediat sociale, pasi vetëdija se të tjerët e dinë që ata janë në një lidhje, u jep një rritje të vetëvlerësimit.
Movitimi për t’u ndier mirë me veten, është një nga arsyet pse njerëzit duan që miqtë e tyre në Facebook, ta dinë ata janë në një lidhje./Përshtatur nga CNA.al

LEXO TE PLOTE

Blog

Intervista- Koronavirusi/ Vaksina do vonojë, katastrofë nëse përhapet tek vendet e varfra

Publikuar

-

Nga

Eksperti i sëmundjeve infektive, njëherazi drejtues i qendrës “Wellcome Trust”, Xheremi Farrar, flet për gjermanen ”Der Spiegel” mbi përhapjen e shpejtë të koronavirusit të ri, kërkimet e vështira për një vaksinë, mbi çështjen nëse qytetet në Evropë duhen futur në karantinë si ato në Kinë, dhe skenarin më të keq sipas tij:atë kur virusi mund të nisë të përhapet tek vendet me të varfra.

Keni paralajmëruar për vitesh, se në epokën e globalizimiy, një virus i rrezikshëm mund të përhapet në të gjithë botën në një mënyrë të pakontrollueshme. A është realizuar me koronavirusin e Vuhanit makthi juaj më i keq?

Në Kinë kjo është duke ndodhur. Virusi po përhapet shumë më shpejt sesa SARS-i. Pas vetëm disa javësh, ai ka infektuar më shumë njerëz në mbarë botën, dhe ka vrarë më shumë pacientë në Kinë sesa SARS-i në 9 muaj. Në Vuhan dhe në pjesë të tjera të Kinës, komunitetet po përjetojnë një makth.

A ka ndonjë rrezik të shohim skena të ngjashme në Gjermani dhe Evropë?

Unë besoj se më e keqja ka ende mundësi të parandalohet. Por kjo do të kërkojë marrjen e masave të ashpra brenda disa javëve. Duhet të mos harrojmë një fakt:Për sistemin tonë imunitar, ky virus është një kundërshtar i ri, i panjohur, dhe që është shumë i transmetueshëm midis njerëzve. Ai mund të shkaktojë gjithçka, nga simptoma shumë të lehta deri tek ato më të rëndat. Ky kombinim e bën këtë virus shumë të vështirë për t’u kontrolluar.

Cilat janë masat e ashpra, që mendoni se mund të jenë të nevojshme?

Mund të shohim izolimin e qyteteve apo rajoneve të veçanta. Ose disa javë ndërprerje të lidhjeve ajrore, hekurudhore apo detare, të cilat mund të kushtojnë miliarda dollarë. Edhe ne ekspertët po punojmë në një territor plotësisht të panjohur.
As me SARS-in dhe as me Gripin e Derrave, nuk u futën në karantinë qytete sikurse po ndodh tani në Kinë. Masa të ngjashme u morën për herë të fundit kundër Gripit Spanjoll në vitet 1918-1920, kur vdiqën deri në 50 milionë njerëz. Gjithsesi, Gjermania është e përgatitur mirë për këtë epidemi.

A ka gjasa të kërkohet futja në karantinë e qyteteve të mëdha, si Mynihu apo Parisi?

Kam shumë dyshime, sesi do ta përballonin banorët e qyteteve të mëdha perëndimore një gjë të tillë. Masa të tilla, do të shkaktonin një përçarje të madhe në mesin e komuniteteve. Nëse kjo gjë ndodh vërtet, njerëzve do t’u kërkohet të qëndrojnë në shtëpi bazuar në vullnetin e tyre të lirë.
Por që masa të tilla të funksionojnë, është shumë e rëndësishme që politikanët dhe ekspertët e shëndetit publik të nisin që tani të përgatitin njerëzit, përmes një komunikimi të hapur, të ndershëm dhe transparent. Besimi është thelbësor, kërkon kohë, dhe mund të humbasë shumë shpejt.

A i druheni një pandemie të mundshme globale?

LEXO EDHE:  Merkel: Nëse Europa dështon me refugjatët s’do të jetë ajo që kemi dashur

LEXO EDHE:  Fushata e zgjedhjeve presidenciale në SHBA

Natyrisht, jam shumë i shqetësuar. Por nuk do të jetë frika, por puna ajo që do të na shpëtojë.

Cilat pjesë të botës do të jenë vendimtare, në përcaktimin nëse koronavirusi i ri ka dalë jashtë kontrollit:vendet e zhvilluara apo ato në zhvillim, që kanë një sistem shëndetësor të dobët?

Një situatë aq e keqe sa ajo në Vuhan, do të ushtronte shumë presion edhe mbi sistemet shëndetësore shumë të mira si ato në Gjermani apo Singapor, sidomos në dimër. Por në vende
të varfëra si Bangladeshi, Venezuela apo disa vende të Afrikës, edhe një epidemi e vogël do
të ishte katastrofike. Prandaj ne duhet të ndihmojmë vendet e varfëra me gjithçka që është e nevojshme: pajisje mbrojtëse, testim, ilaçe dhe këshilla mjekësore.

Cila do të ishte shenja e parë, se situata në mbarë botën po del jashtë kontrollit?

Gjëja më e rëndësishme në 2-3 javët e ardhshme, është nëse do të ketë apo jo një transmetim të qëndrueshëm të koronavirusit jashtë Kinës. Këtë javë pati një raport mbi një të sëmurë nga Koreja e Jugut, që kishte vizituar Tajlandën, por jo Kinën. Ai nuk kishte qenë në kontakt me ndonjë kinez, dhe sërish u infektua. Dhe kjo gjë është shumë shqetësuese.

A mund të ndihmojë parandalimin global të virusit, prodhimi i shpejtë i një vaksine?

Jo, vaksina do të vinte shumë vonë për këtë gjë. Koalicioni për Inovacionet e Gatishmërisë Epidemike (CEPI), një organizatë ndërkombëtare e financuar nga Ministria gjermane e Arsimit dhe Kërkimit, po mbështet kërkimet mbi zhvillimin e një vaksine.
Por ato do të zgjasin të paktën 6 muaj. Në fakt, vaksina nuk do të jetë gati para fundit të këtij viti. Vaksina është diçka që i bëhet njerëzve të shëndetshëm. Dhe duhet të jemi absolutisht të sigurt se ajo është e sigurtë. Nëse nuk kemi fat, mund të mos jemi në gjendje të zhvillojmë dot asnjë vaktinë kundër koronavirusit./Përshtatur nga CNA.al

LEXO TE PLOTE

Blog

Pse Greqia duhet të zëvendësojë Turqinë, si partnere strategjike e SHBA-së në rajon

Publikuar

-

Nga

Nga Eric Edelman & Charles Wald “National Interest”

Në takimin e tij të fundit në Shtëpinë e Bardhë me presidentin amerikan Donald Trump, kryeministri grek, Kiriakos Micotaqis, tha se Shtetet e Bashkuara duhet ta shohin vendin e tij
si një “aleat të besueshëm dhe të parashikueshëm”, në një pjesë të paparashikueshme të botës.
Një deklaratë e tillë në dukje e vërtetë, mund të tingëllonte qesharake vetëm disa vjet më parë, kur rajoni ishte i qetë dhe kur Turqia, dhe jo Greqia, ishte shtylla e stabilitetit. Por sot Athina
po bëhet një lojtare thelbësore pro-amerikane, në qendër të çështjeve të rëndësishme të sigurisë në Mesdheun Lindor.

SHBA-ja duhet të përfitojë nga kjo marrëdhënie në lulëzim mes 2 vendeve, si pjesë e një fokusimi të ri strategjik në rajon. Mesdheu Lindor, dhe sidomos Greqia, ishin thelbësore në vendimin që mori SHBA për të mbrojtur larine, dhe për të frenuar komunizmin pas Luftës së Dytë Botërore.
Tani gjeopolitika dhe gjeologjia, po rikthejnë konkurrencën në fushën e sigurisë në këtë udhëkryq strategjik, me Greqinë si nyjen kryesore. Nxitësi kryesor i këtij rivaliteti, ka qenë transformimi i Turqisë nën presidentin Rexhep Taip Erdogan.

Dikur një aleate demokratike e besueshme, Ankaraja është gjithnjë e më shumë një autokraci pro-ruse, që ka ambicie për një ndikim më të madh rajonal, në kurriz të ndikimit të SHBA-së, Greqisë, Izraelit dhe të tjerëve. Ndërkohë, në rajon po kthehet konkurenca mes fuqive të mëdha, teksa ka një ndërhyrje në rritje të Rusisë, Iranit dhe Kinës.

Një tjetër “mollë sherri” vjen nga zbulimi i njëkohshëm i sasive të mëdha të gazit natyror, dhe nga mundësia për të zbuluar shumë më tepër. Kjo gjë mund të promovojë një zhvillim ekonomik që kërkohet më dëshpërim, sidomos nga Greqia, dhe që mund të zvogëlojë varësinë shqetësuese për energji që ka Evropa ndaj Moskës.

Për këtë arsye vitet e fundit ka një afrim më të madh në Greqi të kompanive amerikane. Po kjo ka rritur ndërkohë tensionet midis Turqisë dhe të gjithë të tjerëve. Në dallim nga fqinjët e saj, Ankaraja nuk pranon të njohë ligjin ndërkombëtar mbi kufijtë e Zonës së saj ekskluzive Detare Ekonomike.
Përkundrazi, ajo po mbron pretendimet e saj territoriale, dhe dërgon rregullisht anije që kryejnë shpime në ujërat qipriote, duke kërcënuar pjesën tjetër për zhvillimin dhe eksportimin e burimeve të vlefshme natyrore. Këto zhvillime të mëdha, shpjegojnë aspiratat e Greqisë për ta zëvendësuar Turqinë si një qendër rajonale diplomatike dhe ekonomike, dhe që kohët e fundit ka një mosmarrëveshje me NATO-n.
Në fakt, Athina po bën pikërisht atë që kërkojnë politikëbërësit amerikanë nga aleatët:po merr përgjegjësi më të mëdha për mbrojtjen kolektive. Greqia shpezon tashmë një pjesë më të madhe të PBB-së saj për mbrojtjen, sesa çdo anëtar i NATO-s përveç Shteteve të Bashkuara.

Dhe kjo pasqyron mënyrën sesi pas disa dekadash marrëdhëniesh të ftohta në rastin më të mirë, ekziston një konsensus kombëtar në rritje, se partneriteti me Shtetet e Bashkuara duhet të përbëjë themelin e sigurisë së Greqisë. Kthesa e raporteve SHBA-Greqi nisi me Aleksis Cipras, ish-kryeministrin e majtë.

LEXO EDHE:  Dy fytyrat e Edi Ramës

LEXO EDHE:  Si mund të kurseni 30 mijë dollarë/ Ndiqni këtë këshillë të vlefshme

Nismat e tij po zgjerohen tashmë nga qendra e djathtë e Demokracisë së Re, që është tradicionalisht më pro-amerikane. Gjithsesi, Greqia ka nevojë për një bashkëpunim më të madh, për të projektuar fuqinë amerikane dhe promovuar stabilitetin gjithnjë e më të trazuar në Mesdheun Lindor. Thelbësor për rolin e ri gjeopolitik të Greqisë, është udhëheqja e saj diplomatike, që po ndërton lidhje më të forta me Qipron, Izraelin dhe Egjiptin, mbi energjinë
dhe sigurinë.

Me kompanitë amerikane që po përfshihen gjithnjë e më shumë në eksplorimin e burimeve energjitike në rajon, Shtetet e Bashkuara duhet të forcojnë praninë e saj detare në Mesdheun Lindor, përfshirë vizitat në porte, stërvitjet e përbashkëta ushtarake, dhe integrimin e forcave detare greke me njësitë e aeroplanmbajtësev amerikane.
Ndërkohë SHBA-ja, duhet të përfitojnë nga padurimi i Greqisë për të bërë më shumë në këtë drejtim. Greqia do të ketë nevojë për financim të huaj ushtarak (FMF), për të modernizuar forcat e saj ajrore dhe detare. Në fund të vitit të kaluar, Kongresi autorizoi 3 milionë dollarë ndihmë ushtarake për Greqinë; ndërsa Athinës i duhet më shumë më tepër.

Gjithashtu, politikëbërësit amerikanë duhet të marrin në konsideratë një prani më të fortë ushtarake amerikane në Greqi. Dhe kjo mund të përfshijë forcat detare amerikane në portet me rëndësi strategjike në Gjirin e Sudas dhe Aleksandropulit, ankorimin e cisternave, dhe zgjerimin e operacioneve trajnuese për helikopterët ushtarakë.

Greqia është ndërkohë një mundësi tërheqëse, për zhvendosjen e aseteve ushtarake amerikane nga Turqia. Po kështu mund të jetë Qipro, në varësi të zhvillimeve me Turqinë. Kjo do të siguronte një qasje të besueshme për forcat amerikane, dhe mund të krijojë një mekanizëm presioni, për të imponuar ndryshime në politikat gjithnjë e më destabilizuese të Ankarasë mbi rajonin.

Shënim:Eric Edelman, ish-ambasador i SHBA-së në Turqi. Charles Wald, ish-zëvendëskomandanti i Komandës Evropiane të SHBA-së në NATO./Përshtatur nga CNA.al

LEXO TE PLOTE