Connect with Us

Nga Artan Fuga/ Problemi nuk është Gjiknuri, por Bylykbashi!

Opinione

Nga Artan Fuga/ Problemi nuk është Gjiknuri, por Bylykbashi!

Publikuar

-

“T’i hapin letrat njëherë e mirë”/Artan Fuga: Opozita duhet të kërkojë demokratizimin e plotë të Kodit Zgjedhor

Tryeza e partive?

Qeveria 10 – Opozita 1

Por, të ndjekim vazhdimin.
Kur deklarova se ditën që në tryezën e organizuar për kodin zgjedhor midis partive politike, qeveria pati një fitore 10 me 1 ndaj opozitës, disa e censuruan atë çka thashë. E censuruan edhe ata që kanë ndofta nja shtatë vjet që marrin postimet e mia, shkruar thjesht për qefin tim në facebook, pa më pyetur. Disa të tjerë e keqinterpretuan, dhe disa as kuptuan se për çfarë bëhej fjalë dhe as pritën të shpjegohem. Direkt thonjë në fyt! Partia mbi të gjitha!
Nejse, gjëra pa pikë rëndësie! Se mos ra tërmet?!

Përpara sesa të numuroj dhjetë fitoret e qeverisë dhe një të opozitës, desha të sqaroj diçka.

Eshtë e padyshimtë që jeta politike në vendin tonë duhet të hyjë në shinat e institucionalizimit. Duhet patjetër që fati politik i vendit të vendoset si e bëjnë popujt e qytetëruar, në kutitë e votimit, dhe jo në rrugë, as si ballafaqim bombash molotov kundër gazit lakrimogjen, as si takime te mullari i kashtës pas gardhit dhe fshehur nga sytë e botës! As me djegje mandatesh dhe dalje revolucionare nga Kuvendi! Duhet patjetër gjithashtu një kod zgjedhor i ri. Duhet patjetër që opozita të hyjë në zgjedhjet e ardhëshme, sikurse nuk ka rrugë tjetër që veç aktorëve të tjerë socialë, të injoruar, në negociata të hyjnë edhe partitë politike.

Ky qendrim të jetë i qartë dhe bërë dallueshëm i tillë nga ana ime.

Por, pasi thamë këto, pasi dimë që edhe partnerët tanë perëndimorë këtë kërkojnë me ngulm dhe me të drejtë, pra kërkojnë ata që kërkojmë ne qytetarët : marrjen fund të aventurizmit politik ardhur nga çdo horizont, të shohim një pikë tjetër: Përse mendoj se qeveria atë ditë ditë fitoi shumë më tepër sesa opozita?

Ishte një humbje e paralajmëruar, e paevitueshme, ndoshta e ndërgjegjësuar edhe nga vetë opozita. Problemi ynë është se kur partitë politike që sundojnë Shqipërinë dhe ne qytetarët, radikalizohen në qendrime, si kur grinden ashtu edhe kur pajtohen, e bëjnë me zell të tepruar.

Kur grinden hidhnohen, kur pajtohen harrojnë dallimet.

Pra, ajo që unë pashë atë ditë të tryezës ishte që opozita nuk erdhi atje si opozitë në artikulimet e saj, në simbolikën e veprimeve të veta, në mesazhet që duhej të lëshonte te opinioni publik, i cili pret shumë prej saj, por erdhi si palë, aq sa dukej sikur në tryezë ishin ulur njerëz me status social dhe politik e me qendrime dhe strategji të njejta.

Pse 10 me 1?

1. Në tryezë përfaqësuesve të opozitës u ishte vendosur përballë pikërisht personi që është lakuar nga opozita për gjatë të gjithë vitit si mishërimi, simboli, nyja, vetë djalli, i vjedhjes të votave, i shkatërrimit të demokracisë shqiptare, personi i kërkuar të dënohet, emri i të cilit ka shërbyer për të mbledhur të gjithë protestuesit në sheshet e tymosura. Zëri i tij u transmetua nga të gjitha mediat e opozitës dhe deri në Gjermaninë e largët!
Unë personalisht i urrej të gjithë manipuluesit e votës. Por, ende vetë personalisht nuk kam ndonjë të dhënë të besueshme se zoti Damian Gjiknuri është ai që ka paraqitur opozita. Edhe mundet, por vetë nuk di gjë. Pse t’i bie në qafë kot! Publikisht pa një vendim të drejtësisë nuk kam asnjë të drejtë të them asnjë fjalë për të. Mirëpo duke dëgjuar opozitën e kam të qartë se cilin imazh të tij ajo na ka transmetuar. Qeveria i vendos përballë opozitës pikërisht atë që opozita e kishte shpallur prej një vitit si vetë djallin, si njeriun që vetëm kod zgjedhor të mirë nuk do, vetëm zgjedhje të ndershme nuk do! Me ose pa të drejtë! Unë nuk di asgjë! Dhe kryeministri në mënyrë shumë provokative duket sikur i thotë opozitës : Erdhe në tryezë??? Ik fol pak me Damjanin!!!Dhe opozita shkon! Sigurisht nuk i zgjedh kundërshtarët – sikundër thotë – por rezervat e veta nuk mund t’i deklaronte, nuk mund të kërkonte të ishte ndryshe? Hiç asgjë!
Tani më thoni : A nuk është kjo një pikë në favor të qeverisë?

2. Kur pranohet Damjani në tryezë me të cilin thuhet se do të bihet në konsensus (pra Gjiknuri dhe Bylykbashi supozohet se do të bien dakord si dy shokë të mirë), nënkuptohet se është hequr dorë dhe nga kërkesa që të shkohet në zgjedhje pa Edi Ramën si kryeministër. Eshtë logjike rjedhoja. Përderisa për Damjanin thuhet se opozita nuk i zgjedh kundërshtarët, sikundër deklaroi zoti Bardhi, atëhere nuk e zgjedh dot edhe kryeministrin që cakton pala tjetër! Pra, kryeministri ka të drejtë të thotë: iku edhe kjo pikë!
Tani më thoni: a nuk ishte edhe kjo një pikë tjetër në favor të qeverisë?

3. Thuhet që opozita kishte kërkuar që për kodin zgjedhor të diskutohej dhe të vendosej de facto jashtë Kuvendit. Shumë mirë. E kam thënë, Shqipëria nuk ka pasur kurrë më parë një kuvend kaq shumë kukull, të padenjë dhe karagjoz. Mirëpo kjo i shërben në radhë të parë vetë qeverisë. Pse budallaqe është qeveria dhe kryeministri Edi Rama që të shkonte në zgjedhje me një kod zgjedhor të konceptuar dhe aprovuar vetëm nga një parlament kukull? Përse t’a bënte këtë kur e dinte se pastaj sido të delte rezultati i zgjedhjeve, ato do të ishin të palegjitimuara politikisht, juridiksht e politikisht? Qeveria përkundrazi kishte nevojë urgjente që kodin zgjedhor t’a aprovonte me opozitën që është jashtë Kuvendit, sepse e di që rreth saj janë formësuar realisht shpresat e popullit opozitar.
E thamë që opozita do të shkonte në tryezë nëse nuk donte të bënte gabimin e madh përfundimtar, por kjo nuk ndryshon gjë. Qeveria ja arriti që opozitën ta ulte në tryezë tamam atëhere ku i nevojitej. Kur qeveriste nuk kishte nevojë ta kishte opozitën nëpër këmbë, opozita iku nga Kuvendi. Tani që afrohen zgjedhjen ka nevojë që opozita t’a bekojë kodin zgjedhor, dhe opozita vjen! Cfarë të bëjë ?!
Më thoni, a nuk është edhe kjo një pikë në favor të qeverisë?

4. Ditën që mbahet tryeza e të katërve, pra kur opozita më në fund lëshon mesazhin e shumë pritur, që megjithë humbjet dhe çmimin që paguante, po i kthehej më në fund rrugës institucionale, po braktiste revolucionin ku ishte futur si rrugë qorre, po atë ditë lajmëron një protestë të madhe të shkurtit. Disa përfaqësues të saj theksojnë që atje populli do të kërkojë që në zgjedhje të parakohëshme të shkohet pa Ramën kryeministër!!!
Unë e di që në gjendjen ku ka arritur vendi ka vend që shqiptarët të protestojnë jo me njoftime para një muaji, por me shpërthime edhe spontane në vendet e tyre të punës, në lagje, e kudo ku bëhen padrejtësi të fëlliqura! Unë kam thënë shumë herë se në zgjedhje duhet të zerohet fuqia administrative e çdo kryeministri. Por, kjo është tjetër gjë. Ndërkohë, atë që opozita i hyn rrugës institucionale, kërkon shpëtim përsëri te rruga!!!
Cfarë u kërkon protestuesve për të njëmijtën herë ? Të përplasen në rrugë, ndërkohë që opozita është duke kërkuar konsensus me ata që ajo i quante vjedhësit e demokracisë?
Po shkon në zgjedhje apo në përplasje e tensione në rrugë? Sepse kemi dy mesazhe kontradiktore brenda disaorësh.
Më thoni, ky konfuzion, a nuk është edhe kjo një fitore e qeverisë? T’a rrëzosh Gjiknurin me anë të rrugës ndërkohë që bisedon me të në tryezë për të organizuar zgjedhjet e ardhëshme?

LEXO EDHE:  Përfundon mbledhja e Këshillit Politik/ Gjiknuri akuza PD-së: Devijoi bisedën, i është kthyer skemës së KQZ

5. Por, problemi në atë tryezë nuk është zoti Gjiknuri, por zoti Bylykbashi!!! Duket si e habitshme, madje një çmenduri t’a thuash! Dale mos u nxitoni. Për zotin Bylykbashi si jurist dhe opozitar, si deputet, dhe si administrator i politikës, kam respekt të veçantë. Konkret, i edukuar, profesionist, parimor, mendoj se ai i ka bërë shumë shërbime Shqipërisë. Llaf të keq nuk kam dëgjuar! Megjithatë, ai duhej zëvendësuar në atë tryezë. Përse? Sepse ka qenë gjithë kohën negociatori i kodit zgjedhor apo i negociatave të tjera. Cfarë mesazhi marr si qytetar kur shoh të përjetshmit Gjiknuri – Bylykbashi përballë njeri tjetrit? Marr mesazhin që gjithmonë të njejtët ripërsërisin dramën e madhe politike të këtyre tridhjet vjetëve. Pas çdo grindjeje politike, vjen harmonia politike. Klasa politike ja njeh gjuhën vetes. Sikurse ka qenë do të jetë. Të njejtët që rivijnë në mënyrë të përsëritur nga grindja në negocim. A nuk ngjall kjo mosbesim te qytetarët, te elektorati,duke ushqyer idenë se asgjë e ndryshme, e re, nuk ndodh? Nuk ka partia demokratike të tjera personalitete, qoftë dhe për t’a kursyer zotin Bylykbashi?
Dhe nëse jep imazhin se gjithçka vazhdon si më parë, a nuk e demotivon kjo elektoratin, a nuk e shtyn drejt abstinencës politike? A nuk është kjo një fitore tjetër e qeverisë që kërkon pikërisht demotivimin e elektoratit për të votuar?

6. Unë nuk mendoj se ajo tryezë u mbaj jashtë logjikës të Kuvendit – sikurse gjoja imponoi opozita. Fakti i i organizimit të saj në një mjedis hapësinor dhe material jashtë ndërtesave të Kuvendit nuk tregon asgjë për thelbin e kuptimit të saj politik. Aty ishin përfaqësuesit e partive politike parlamentare, pra të PD, të PS, të LSI-së. Jo? Sepse partitë opozitare kanë dalë nga Kuvendi? Prisni një sekondë! Lsi – ia atje ka deputetë nga të listave, edhe partia demokratike ka deputetë që nuk di t’i ketë përjashtuar. Sadoqë ata deputetë kanë shkelur vendime partiake.
Në këtë plan një fjalë për zonjën Hajdari. Unë kam shumë arësye qytetare dhe personale t’a vlerësoj shumë zonjën Hajdari, edhe kur ajo është dakord me udhëheqjen e partisë demokratike, edhe kur ajo e kundërshton atë. Kurajoze, e fortë në brishtësinë e saj, ajo ka një artikulim politik që del nga i foluri i drunjtë tridhjetvjeçar i politikës shqiptare. Por, nuk e kam kuptuar se me çfarë statusi ajo ishte në atë tryezë. Si deputete e partisë demokratike? Si kryetare komisioni? Por, po të ishte kështu, atëhere mbetet të jemi brenda Kuvendit? Partia demokratike noton në një turbullirë politike në raport me konstituimin e tryezës.
Më thoni a nuk është edhe kjo një fitore e qeverisë që i imponon opozitës të ketë përballë një deputete të saj, por që është kundër saj?

7. Të gjitha këto po i harrojmë për një çast, mirëpo drejtimi politik i opozitës deklaron se kodi zgjedhor në thelbin e tij, pra në mënyrën e kandidimit të partive me lista të mbyllura, nuk qenka një problem!!! Këtu gjithçka përmbyllet. Pra fajin e ka individi, thjesht individi, kryeministri Edi Rama! Dikur fajin e ka Saliu, më parë, fajin e ka Enveri, a Pal Vata, tani fajin e ka Rama!!! Po mirë, a nuk është sistemi juridiko-politik që lejon ekseset e pushtetit, abuzimet me të? Cfarë kuptimi ka që të bësh zgjedhje të mira kur prej tyre del një Kuvend kukull, karagjoz, ushtarësh?
Elektorati pret me padurim: A do të arrijë ai me të vërtetë të votojë për deputetët e tij duke i patur nën kontroll, apo do të votojë lista kryetarësh që bëjnë shiun dhe erën, në mënyrë antikushtetuese mbi grupin e deputetëve?
E di partia demokratike që statutet e partive politike lidhur me strukturimin partiak të grupeve të deputetëve bien ndesh me kushtetutën?
Pra, jepet paraprakisht mesazhi se asgjë nuk do të ndryshojë!
Dhe nëse në vend të deputetëve të dalë nga parapëlqimet e elektoratit do të kemi të emëruar me lista, më thoni, a nuk është gjithashtu një fitore e qeverisë? Në vend që Kuvendi të kontrollojë qeverinë kemi qeverinë që Kontrollon Kuvendin.

8. Dhe nëse ka një mendim të tillë për t’a ruajtur kodin e tanishëm zgjedhor, ai nuk figuron nga ndonjë vendim strukturash drejtuese partish opozitare. Duket sikur vendimet merren njeherë pastaj çertifikohen. Ka ndonjë debat? Ka argumente? Heshtje tërësore. Por, a kanë transparencë partitë politike shqiptare, apo të gjitha janë njësoj nga pikepamja e demokracisë së brendshme?
A nuk do të shënohej edhe kjo pikë si një fitore e qeverisë e cila ka interes që gjithçka të përsërisë standartin e vet politik?

9. Nga ajo tavolinë ishin përjashtuar përfaqësuesit e partive të vogla, ato jashtëparlamentare, nuk ishin përfaqësuesit e shoqërisë civile, pra nuk ishte e gjithë jeta shoqërore që qendron jashtë Kuvendit të Shqipërisë?
A nuk ndihet e përjashtuar shoqëria nga përcaktimi i kodit zgjedhor? A nuk ka të drejtë të pyetet? Dhe nëse jepet mesazhi se këtë e dinë pak persona të partive tradicionale, a nuk e zbeh kjo motivimin e elektoratit për të votuar?
Më thoni, nuk do të ishte edhe kjo një pikë në favor të qeverisë?

10. Dhe nëse sikurse thotë tani opozita, sistemi zgjedhor nuk është problem, por fajin e ka thjesht individi, kështu do të vazhdohet të thuhet për reformën e shtetit, të ekonomisë, të shkollës? Kush na siguron që sikurse u tërhoq nga zhbërja e kodit zgjedhor opozita nuk do të tërhiqet nga zhbërja e të gjithë një sistemi që ë çdo orë e ditë i poshtëron qytetarët?

Po fitorja e opozitës?

1. Ajo e çbëri këtë parlament karagjoz dhe kukull. Deputetët që mbetën atje sikurse tryeza u tregoi nuk kanë më jetë politike përpara tyre. Historia e tyre politike u mbyll me turp. Jo sepse kundërshtuan vendimin e djegies të mandateve të partive të tyre, por për lojën e fëlliqur politike që bënë, (me ndonjë përjashtim) duke u hequr si opozitë, e duke bërë lojën e qeverisë. Morën votat e popullit opozitar dhe i përdorën për interesat e tyre meskine. U sollën si kukulla politike. Tani zotëria i hodhi tej, i flaku si limona të shtrydhur. Këtej e tutje cdo parti në pushtet do t’a ketë frikën e kamikazeve politike që djegin mandate dhe e lënë pushtetin të masturbohet me vetveten.

Me tryzën e partive parlamentare për kodin zgjedhor, qeveria fitoi shumë më tepër sesa opozita. Por, kjo ende nuk do të thotë asgjë.

Ndoshta opozita ndjek strategjinë e Torviollit. Pra tërhiqet për ta futur qeverinë në kurthin e votimeve sa më të drejta. ndofta si cdo sipërmarrje që hyn ose rihyn në treg duhet të paguajë një çmim të lartë hyrës për të kapërcyer barrierat e tregut. Ndofta si cdo konkurrent i ri, duhet t’i paguajë një haraç atij që zotëron tregun.

Unë mendoj që dhjetë fitoret e qeverisë lidhen edhe me këta faktorë. Por, duhen ditur, thënë, pranuar, jo anashkaluar me dredhira të nënkuptuara sikur opozita ndodhet nën presionin e partnerëve demokratikë të Shqipërisë.

Por, ndoshta edhe mendon se humbjet e asaj dite do t’i rikuperojë në të ardhmen!

Këtë mbetet ta shohim!

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Aktualitet

Marrëveshje Shqipëri- Greqi/ Fuga: Në gjykatë të shkojë ai që kërkon divorcin

Publikuar

-

Nga

Marrëveshje Shqipëri- Greqi/ Fuga: Në gjykatë të shkojë ai që kërkon divorcin

Akademiku dhe profesori i njohur Artan Fuga ka reaguar përmes një postimi në rrjetet sociale lidhur deklaratën e Ramës në Athinë, për të zgjidhur çështjen e detit me Greqinë nëpërmjet marrëveshjes.  Sipas Ramës mënyra më e mirë e zgjidhjes së kësaj cështjete është me anë të nje pale të tretë, sic është Gjykata.

Ai shkruan se kjo nuk është faza e parë e një marrëveshjeje, pasi në Gjykatë shkojnë ata që ‘divorcohen’.

Akademiku thekson se Shqipëria nuk është Azerbajxhani që ka toka pa fund dhe nuk i duhen 12 milje më shumë apo më pak, pasi bregu shqiptar shto dhe 12 miljet e Greqisë duket si ngushticë e ngushtë në det të hapur.

STATUSI NGA ARTAN FUGA

Peshq grekë dhe peshq shqiptarë!

Cështja e detit të Vlorë – Sarandës, Jonit, pra, ka tërhequr edhe vëmendjen e krijuesve të rinj. Klevis Mehaj në kuadrin e projektit TikTok corruption Albania, që kryhet nga MediaLook Albania me mbështetjen e Agjencisë Zviceriane për Zhvillim dhe Bashkëpunim, na tregon me një gjetje të bukur peshën e madhe të kësaj çështjeje.

Greqia mund të ketë të drejtën të zgjerojë hapësirën detare në 12 milje, sigurisht, hallall i qoftë, por ne duhet të këndojmë të drejtën e saj apo të thurrim hymne që këtë të drejtë prej 12 miljesh e kemi edhe ne?

Edhe sikur mos kemi të drejtë si peshq që jemi! Nuk kam parë deri më sot që një shtet t’i thotë tjetrit : Ke të drejtë të marrësh llokmën që deritani nuk ishte as jotja as timja. Ne sikur jemi Azerbajzhani me toka pa fund dhe nuk na ha qederi për 12 milje më shumë a më pak!

Se në hartë pasi Greqia merr 12 miljet e veta, bregu shqiptar duket si “rrugicat që kërkonin diell”, një ngushticë e shtrembër në det të hapur, kështu ne në histori, ne trimat, në tokë na kanë zbythur deri në breg të detit, na kanë hedhur në det, në det na kanë nxjerrë në breg si peshq të ngordhur nga zbatica, ngelur në të thatë.

Se poqe ashtu në bashkëpunim me Turqinë hajde hedhim beton diku andej nga mesi i detit, krijojmë një copë tokë atje, dhe që andej hajde kërkojmë 12 milje për të vajtur më tutje. Pastaj në cepin e atyre 12 miljeve derdhim beton me hekur Kurum përsëri dhe dalim në Palermo, që andej me këtë metodë shkojmë deri në Algjeri dhe i themi mbretit të Marokut : Mirëmëngjes Lartmadhëri!

Në tokë na thonë se Serbia ka të drejtë të shkëmbejë toka dhe ne na hedhin në det, në det na thonë se Greqia ka të drejtë të marri ujra dhe na shtyjne në tokë. Nuk dimë ku të fusim kokën!

LEXO EDHE:  Aeroporti i Vlorës/ Gjiknuri: 1 mijë vende pune, afati i kontratës...



Greqia me nene formale ka të drejtë të zgjerohet 12 milje mbase nuk e kundërshtoj, por tjetër e drejta eformale dhe tjetër e drejta e faktit. Sepse edhe Qenan K. më thoshte një ditë ka të drejtën e punës sipas diplomës, por faktikisht është thjesht berber. Nga e drejta formale te aplikimi i së drejtës, ka një det të tërë që ndan!

LEXO EDHE:  Aeroporti i Vlorës/ Gjiknuri: 1 mijë vende pune, afati i kontratës…

Ne kemi hallin e detit, këta thonë ligji i luftës!!! Te vjen t’ja plasësh gazit nga zhvendosja semantike e axhendës të debatit dhe shqetësimit popullor. Kush do të bëjë luftë me ligjin e Luftës të kohës të Termopileve!!! Mos na trembni me ndëshkimin e Zotit kur halli është se kush po merr kumbullat e komshiut.

E thotë mirë Klevisi në videon e tij. Nuk është thjesht çështje lufte, është çështje paqeje. Peshqit shqiptarë në det po bëhen gati të ndahen nga gratë e tyre peshq greke, po ndahen familje peshqish, po ndahet gazi në det, molusqet, midhjet, gjithë ajo pasuri që pas njëqind vjetësh stërnipipërit e Skënderbeut do të thonë për ne : As sa peshqit nuk ishin të zotët ata trupeshqit e asaj kohe!

Se në Gjykatë arbitrazhi shkohet, por a e ka Kushtetuta shqiptare që për sovranitetin e territorit bëhet sikur ndahet e divorcohet një çift e pasuria ndahet ke noteri? Kush ja jep të drejtën që çështjet sovrane të zgjidhen kështu kaq kollaj me arbitrazh?

Menjëherë te gjyqi nuk duhet shkuar. Të paktën të bëjmë si te filmat surrogato kur burri që ka të dashur i thotë gruas hajde shkojmë në gjykatë që të divorcohemi. Por, gruaja, kopile, i thotë : ik ore nuk ta jap divorcin! Dhe rrinë ashtu!

Gjykata është një fazë tjetër, jo e para, në gjykatë të shkojë ai që kërkon divorcin, ai që do të ndajë, jo ti, jo ne, mor burrë, ne nuk kemi as përse themi se do shkojmë as nuk deklarojmë ne që hajde shkojmë në Gjykatë. Ne themi që nuk ka nevojë, gjërat janë në rregull. Cfarë kuptimi ka që deklarojmë se shkojmë në gjykatë ne kur po ashtu deklarojmë se peshqit grekë kanë të drejtë 12 milje kundërdrejt peshqëve shqiptarë!!!

Edeh paret e gjyqit t’i paguajë ai që do të nisi gjyqin!

Gjykata na kap për fjale si kapen peshqit me grep dhe na thotë: O peshq çfarë vini këtu, ju e keni njohur të drejtën për peshqit grekë të vijnë t’ju hanë midhjet tuaja!

Jo për gjë por jemi edhe peshq miq! Prishemi ne si peshq për pak ujë me kripë?

Ne shohim thjesht ligjin e Luftës!

 

LEXO TE PLOTE

Opinione

Zoti Basha çlirojeni PD-në nga simbolet, sherbëtorët dhe mendesitë e diktaturës

Publikuar

-

Nga

Zoti Basha çlirojeni PD-në nga simbolet, sherbëtorët dhe mendesitë e diktaturës

Nga Azgan Haklaj

Koha kërkon robespierë e jo robër të komunizmit të konvertuar në demokratë.

Është koha që tritanët e PD- së të hapin krah e jo të imponohen me testament trashëgimie politike për të bijtë.

Për të përmbysur Sulltan Ramën kërkohen ata që kanë kaluar provën e zjarrit

Hapja njëqind për qind e listave dekomunistizon, despihunizon, denepotizon PD- në.

Data 25 prill e vitit 2021 duhet të shënojë fundin e tranzicionit dhe hapjen e faqes se re të demokracisë shqiptare

Jemi deshmitarë të një kohe të vështirë për vendin demokracinë dhe pse jo dhe për të ardhmen tonë.
E kjo për faktin e qartë dhe kokëfortë të shndërrimit të Shqipërisë nga një demokraci në tranzicion, e cila me gjithëse nuk ka patur funksionim përfekt e ka shfaqur defektet e saj gjatë rrugës, nuk mund të përfytyrohej as në ëndrrat më të llahtarshme se do të shndërrohej brenda 7- të vitesh në një neodiktatorë, shteti në narkoshtet, e institucionet e tij në tentakula të partisë shtet, apo e thënë me qartë në zgjatime të gjymtyrëve e kthetrave të ndyra të sektit të “rilindjes”.

Ka 7- të vite që PD- ja dhe opozita e bashkuar e ka kthyer me plot të drejtë Sulltan Ramën dhe kalifatin e tij në tabelë qitje për kriminalizimin e parlamentit dhe pushtetit, krijimin e monopoleve dhe PPP- ve, që në partneritet me krimin e organizuar kanë shkatërruar ekonominë.

Për trafiqet e drogës, shitjen e interesave kombëtare, përfshirjen në skenarët ogurëzi për shitjen e trojeve arbërore.
Në demokraci kur pushteti çmendet është e drejta e opozitës të radikalizojë qëndrimin e saj politik, e në rast se edhe ky hap rezulton jo efikas t’i drejtohet me në fund popullit sovran të ngrihet në këmbë për të mbrojtur rendin kushtetues, lirinë, demokracinë dhe të ardhmen e tij.

Gjatë këtyre viteve opozita e bashkuar e ke thirrur disa herë popullin në protesta e mitingje të fuqishme nëpër sheshet e Shqipërisë kundër përpjekjeve deri në marrëzi të Edi Ramës për instalimin e totalitarizmit.

Presidenti i Repubikês z Ilir Meta ju ka drejtuar popullit për mbrojtjen e kushtetutës dhe ndalimin e puçit kushtetues të qeverisë, me qëllim pushtimin e Presidencës, të vetmit institucion të pathyer nga Sulltani ynë, për ta kthyer Republikën Parlamentare të Shqipërisë në republikë qeveritare dhe parlamentin në zyrë noteriale të saj.

Sovrani dhe Komisioni i Venecias i vunë fre egos së tij për të zaptuar edhe Presidencën.
Koha eci dhe erdhi momenti që Presidenti Ilir Meta të shpallë dt 25 prill të vitit 2021 ditën e zgjedhjeve.
Kjo date është ditë simbolikë e diktaturës të etërve të “rilindasve”.
Kjo datë është pagëzuar si festa e kufirit në regjimin e Hoxhës.
Pikërisht me dt 25 prill opozita e bashkuar e kthyer në mazhorancë morale, me votën plebishitare do t’i vëjë Sulltan Ramës kufirin tek thana.

Por Partia Demokratike dhe opozita e bashkuar para se të shkojnë në këtë mision të madh kombëtar për kthimin e votës së lirë dhe institucionalizimin e saj si gurëthemel i demokracisë dhe shtetit të së drejtës duhet të këmbëngulin me forcën e mazhorancës morale që gëzon për hapjen e listave njëqind për qind, me qëllim që sovrani të zgjedhë vetë përfaqësuesit e tij.

Hapja e listave e ndihmon PD- në dhe aleatët e saj për dekomunistizimin, despihunizimin e denepotizmim dhe daljen në mejdanët e lirisë të robespierëve që do të përmbysin regjimin totalitarë.
Mirë po në Shtepinë tonë të lirisë po ndodhin çudira.



Komunistët e konvertuar në demokratë kërkojnë t’ua lënë testament mandatin të bijëve.
E gjatë gjithë këtyre ditëve i kam denoncuar me fakte.
Është koha që pleqtë politikë të PD-se e opozitës të hapin krahun.
Kur mësova se edhe Tritan Shehu kërkon me insistim ta bëjë djalin deputet mu kujtua kënga e diktatorit, babait të tij shpirtëror Enver Hoxhës, të cilit kur vdiq dhe i’a la trashëgim pushtetin Ramiz Alisë i thurën këngën.

“Kërkush ne mos t’na qajnë hallin
Zoti i shtepisë e ka lanë djalin”.
Tritanët e PD- së akoma e mendojnë Shqipërinë si në kohën e principatave mesjetare dhe vehten si princër të Partisë Demokratike siç ishin në mesjetë Gjergj Kastrioti, Lek Dukagjini, apo Karl Topia.
Tritani ka vendosur që senator e pasardhës i tij në PD e Kuvendin e Shqipërisë të jetë djali i tij.
Tritani, fatos e pioner i Enverit, ish komunist u bë demokrat e madje edhe kryetar i Partisë Demokratike, partisë së idealeve të dhjetorit.

Më vonë kaloj në një parti të re, e u rikthye prapë, por gjithnjë si deputet, sepse nuk mund të rrijë asnjë ditë pa pushtet.
Ai dhe tritanët e tjerë kërkojnë t’ua lënë djemëve të tyre postet si trashëgimi politike, athua së PD- ja është çifligu i tyre.
Sot e mora si shembulli Tritanin, sepse për adashët dhe versnikët e tij kam folur në shkrimet e tjera.
Këta vampirë për të cilët PD- ja është ndëshkuar disa herë duan t’ua lënë testamentet postet djemëve dhe asnjeri vajzave sepse nuk u besojnë dhëndurëve të tyre.
Po i pyes publikisht këta sharlatanë?!
Cili është identiteti dhe fytyra e PD-së.

Ku janë familjarët e Pjetër Arbnorit, Bujar Kaloshit, të kazazëve, blloshmëve, previzëve, lepenicëve etj etj?!
Ku janë qëndrestarët e Partisë Demokratike?!
Ku janë studentët e dhjetorit të parë?!
Po studentët e dhjetorit të dytë?!
Ku janë të përndjekurit politikë?!
Ku janë pronarët.

A do ishte në nderin e PD- së t’i kishte në ekipin e vet pinjollët e tyre ?!
Në vitin 2005 si anëtar i Këshillit Kombëtar të Partisë Demokratike, ish deputet i Kuvendit të Shqipërisë kam përqafuar ndër të parët hapjen e PD- së, por kam qenë kategorikisht kundër transplantit politik që u adaptua më vonë.
U larguan qëndrestarët e PD- së që kontribuan në momentet e saj të vështira dhe mbijetuan bashkësia e tritanëve, të hipotekuar që këlysh tek baballarët e sektit të rilindasve.
Tritani gjatë tre dekadave të qasjes së tij në politikë është munduar të paraqitet me fytyrën e staturën e një politikani të urtë, të një engjëlli, i cili pas betimit të Hipokratit ka bërë edhe betimin e demokratit dhe europianistit të kulluar e amerikanit brilant.

LEXO EDHE:  Reforma për Akademinë e Shkencave/ Fuga: Nuk morën parasysh asnjë propozim

LEXO EDHE:  Nga Artan FUGA/11 teza fillestare për reformimin e arsimit të lartë privat

Madje jo vetëm kaq.
Nga familje shehlerësh, duke u shtirur më katolikë së Papa arriti të hapë edhe Universitetin “Zoja e Këshillit të Mirë”, një institucion i arsimit të lartë që financohet nga Selia e Shenjtë.
Sa për Selinë e Shenjtë të PD- së Tritani nuk është merakosur ndonjëherë për fatin e saj.
Kur aty bëhet festa e fitores ai vjen me lugë në brez e ulet këmbëkryq në sofrën e saj.
E kur partia është në hall struket në ndonjë qoshe e mjaullin me zë të mekur, si ata qenushët frikacakë që struken poshtë krevatit të bariut kur ujku sulmon kopenë e tij.
Tritani e tritanët e tjerë duhet ta kuptojnë se modeli politik i PD duhet të jetë antiopod i Partisë së Punës, të cilës ata i kanë shërbyer me zell.

Partia e etërve e bijëve, e klaneve familjare, të Hoxhës, Kapos dhe Shehut është përmbysur kahane siç shprehen fshatarët e Tiranës.
Z Basha si Kryetar i PD- së, si korife i opozitës së bashkuar dhe kandidat për kryeminister duhet ta këputë këtë nyje gordiane që e mban peng demokracinë shqiptare prej tre dekadash.
Ai duhet të vendosë e t’u kërkojë shqip dhe shkurt të “urtëve” të PD- së:
Hapeni krahun.

Tashmë PD- ja duhet të dekomunistizohet, despihunizohet, denepotizohet.
Ai duhet t’a çlirojë PD- në nga sherbëtorët e diktaturës dhe mendësitë e saj.
Atë që nuk e kanë bërë komisionet Mezini, Bezhani, Halimi, Nishani duhet ta bëni ju z Basha.
E them se nuk e kanë bërë sepse bashkëpunëtorët e sigurimit i kanë mbijetuar katarsis -it, biles edhe së fundmi po e kalojnë komisionin Nishani dhe ky komision është i komprementuar që në ngjizje nisur nga misioni që ka, sepse antarët e tij janë vetë sherbëtor të diktaturës komuniste.
Këtë proces jetik e realizojnë vetëm listat e hapura njëqind për qind.

Për të përmbysur Sulltanin kërkohen ata që e kanë kaluar provën e zjarrit, e jo robërit e komunizmit.
Kovaçi e skuq hekurin në zjarr, e farkëton e përpunon duke ia dhënë formën e duhur, e fut në uje për t’i dhënë temperimin dhe e bën të qëndreshëm e të rezistueshëm.
Komunistët e PD- së janë parafabrikate dhe nuk kanë kaluar kurrë provën e zjarrit.
Ata kanë përfituar me skenare, kurthe, intriga duke u sjellur si kamelaonë.
Ata që kanë kaluar provën e zjarrit i ke në oborrin e PD-së z Basha.

Merre një qiri dhe gjej.
Nuk e kam në gen t’i jap mend askujt dhe të bëj rolin e këshilltarit, sepse në këtë vend të gjithë janë filozofë dhe të zgjuar, por nuk ka dhuratë me të bukur për Shqiperinë në 120- vjetorin e kalimit në amëshim të Rilindasit të madh, Poetit kombëtar, Bilbilit të Gjuhës Shqipe Naim Frashëri se sa të çlirosh PD- në nga Tritani e tritanët dhe fantazmat e komunizmit siç është simboli i Kongresit të Permetit, i cili shembi e zevendësoj shtetin modern shqiptar me pushtetin e sovjetëve të instaluar me dhunë e terror nga kmerët e kuq.

Në vitin 2018- të, vitin Jubilar të Gjergj Kastriotit Unioni Kombëtar i të përndjekurve politikë kërkonte me insistim të hiqej stema e këtij kongresi famëkeq që qëndronte varur në lapidarin e qytetit të frashëllinjëve, në Permet, e cila është hequr me vendim të Parlamentit të Shqipërisë, në vitet 90- të, por pengesë u bë Tritani dhe sejmenët e tij, me arsyetimin se kemi ca të majtë që votojnë për ne.
Ja çfarë mendësie bolshevike ka e çfarë demokrati fallco, makiavelian, utilitar është ish kryetari i PD- së së Shqipërisë, ish deputeti i Qarkut të Gjirokastrës z Shehu, thjesht për një grusht vota të majta që mendon se i merr ia len ende qytetit djep të kulturës shqiptare varur në qafë medalionin e komunizmit.
“Qellimi justifikon mjetin” është filozofia e tij.

I nderuar Kryetar i Partisë Demokratike të Shqipërisë z Basha!
Gjithmonë me ka bërë përshtypje raporti me tre fjalë që Jul Çezari gjenial ia dërgonte Senatit të Romës.
“Shkova, pashë, fitova”.
Këtu gjerat janë të qarta.
Kam folur fort gjatë këtyre ditëve se jemi në kohën e duhur për të marrë masat, për t’u korrigjuar, e për të garantuar fitoren e merituar.

Humbja kësaj radhe nuk ka justifikim.
Fituesi nuk gjykohet.
Por populli ka një shprehje të urtë:
“Me mirë djepi bosh se shejtani brenda”.
Fitoren kësaj radhe e duam pa djallin mes nesh.
Zoti Basha ngadhënjimi juaj fillon tek çlirimi i PD – së nga satanai që e mban peng tash tre dekada.
Çlirojeni PD- në nga oktapodi sllavo- bolshevik, simbolet e fantazmat e komunizmit, sepse shpartallimi i Sulltan Ramës e kalifatit të tij do të jetë shumë i lehtë.

LEXO TE PLOTE

Opinione

Shteti të detyrojë, jo të mashtrojë

Publikuar

-

Nga

Antikorrupsioni si aleat në korrupsionin e Blushit

Nga Ing.Tanush Çaushi

Tashmë kanë kaluar muaj të tërë nga ngjarja e fundit sizmike, tërmeti i Nëntorit 2019.

Kur ngjarja kulmonte në jetën e saj, ekspertë të ndryshëm dhanë mendimin e tyre sesi duhej që të vazhdohej më tutje. Politikanët dhe qeveritarët më shumë se kurrë u bënë njësh me inxhinierët dhe “tani e tutje gjithcka do të rregullohej”.

Po cfarë ndodhi vallë me këtë cështje?

Fillimisht, për të gjithë ata lexues që kanë njohuri të pakta në fushën e sizmikës,

desha t’u shpjegoj disa gjëra të thjeshta:

Cdo shtet, nisur nga studimet që kryen, përgatit kode të projektimit dhe të zbatimit për ndërtesat dhe strukturat inxhinierike për një nivel të caktuar sigurie.

Pra, shteti shqiptar, nisur nga studimet shkencore i detyron projektuesit dhe zbatuesit që të projektojnë dhe zbatojnë objekte me 8 apo nëntë ballë sipas MSK 64.

Kjo do të thotë që apartamenti ku ju banoni ka një siguri të caktuar bazuar në kodet e projektimit në Republikën e Shqipërisë.

Tërmeti i 26 Nëntorit dhe niveli i riskut që ne kemi pranuar

Tërmeti i Nëntorit, zyrtarisht me vlere 6.4 shkalla Richter nuk ishte maksimumi i mundsshëm sipas shkallës së vlerësimit. Po ta konvertosh në shkallën Ballë, ai arrin në 8.4 ballë.

Maksimumi i mundshëm që ne kemi pranuar në projektimin e objekteve në Shqipëri sipas legjislacionit në fuqi është 9-ballë maksimumi, pra deri në afërsisht vlerën 7 të shkallës Richter.

Por sipas studimeve të shumta që janë bërë edhe nga studiues shqiptarë, rreziku për vendin tonë është më i madh sesa 7 shkalla Richter, ai shkon deri në 7.5 Richter. Dhe kjo vlerë mund të jetë edhe më e madhe sepse jemi në kushtet që nuk kemi bërë studime më të detajuara dhe investime në këtë fushë.

Dëmet e 26 Nëntorit ishin minimale në raport me pasojat që mund të sillte zbatimi i legjislacionit në fuqi. Ishte pikërisht vizioni i projektuesve dhe përgjegjshmëria që në shumicën e objekteve janë aplikuar normat europiane dhe hartat e përditësuara nga shkencëtarët.

Kjo, të dashur lexues na ka shpëtuar deri tani.

Çfarë ndodh nëse riskohemi me një fatkeqësi të tillë natyrore?…

Sipas ligjit në fuqi, askush nuk mban përgjegjësi sepse kaq është niveli i sigurisë që kemi pranuar për objektet tona.

Është ende në fuqi ligji i vitit 1980 edhe pse 4 sizmologë të njohur shqiptarë me në krye Sulstarovën kërkuan përditësimin e hartave të rrezikut sizmik duke e rritur sigurinë në 7.5 Richter.

Ajo që do të ndodhë me shtëpinë tuaj nëse kalohet risku sizmik do të jetë shembja e objektit dhe humbja e pasurisë dhe jetës suaj.

LEXO EDHE:  Përfundon mbledhja e Këshillit Politik/ Gjiknuri akuza PD-së: Devijoi bisedën, i është kthyer skemës së KQZ

LEXO EDHE:  Aeroporti i Vlorës/ Gjiknuri: 1 mijë vende pune, afati i kontratës...

A nuk mjafton kjo për t’u alarmuar politika dhe shoqëria dhe për të sanksionuar norma të reja të sigurisë?!..

Çfarë pritet të ndodhë?…

Ndoshta do të jetë me pasoja tepër fatale për të gjithë ne që jetojmë nën një risk të tillë, por tërmeti është një ngjarje që propabilitetin e të ndodhurit e ka 1, pra ai do të ndodhë një ditë.

A po përgatitemi ne për ngjarjen e ardhshme, e cila mund të jetë më fatale se e ndodhura?

Unë mendoj që tashmë e kemi harruar 26 Nëntorin 2019 dhe kemi mbetur tek papagalli i humorit ku shkruhet:



“Pendët i janë rralluar,

flatrat i kanë rënë,

shumë fjalë ka mësuar,

po pak janë për të qënë!”

Nga del ky përfundim? Pikërisht nga fakti se nuk po shohim masa konkrete për t’u zbatuar ato që u premtuan.

Normat e projektimit sizmik janë po ato të vitit 1980.

Pyetjet e zotit Tërmet

Të dashur lexues, më e keqja nuk ka kaluar dhe nuk kalon asnjëherë. Ne kemi qenë dhe do të jemi vend sizmik me Risk shumë të lartë.

Zoti tërmet përsëri do të trokasë në dyert tona dhe nuk do të na pyesë shumë për fondet që po harxhojmë për qoka politikanësh. Përkundër zoti Tërmet do të na pyesë duke na kapur veshin apo frymën:

– Nisur nga paralajmërimi i fundit që u bëra a ndërtuat me rregulla të përditësuara anisizmike?

– A e ndryshuat legjislacionin e ndërtimit apo mbetet tek fjalë dhe mashtrimet?

– Meqënëse potencialet shkencore i keni dhe gjasme i pyetët a po kryeni studime për ngjarjen tragjike të tërmetit?

– A po përdorni pajisje shuarese antisizmike dhe modifikuese në ndërtesat e larta?

– A më moret seriozisht apo me hoka e tallje?

Do flasim përsëri dhe do shkruajmë me shpresën se dikush dëgjon zërin e shkencëtarit e të qytetarit të thjeshtë.

Si drejtues, jo si mashtrues…

Domosdo, ta dëgjojë dhe ta zbatojë si drejtues serioz dhe jo si kameleoni mashtrues! Kjo sepse:

Është koha dhe ka kaluar që të kujtojmë tërmetin dhe të investojmë edhe në studime të reja.

Është koha, ndonëse të vonuar, të vendosim në ligj edhe pajisjet antisizmike, siç jane shuarësit.

Është koha dhe po kalon që të mos harrojmë, por të kujtojmë viktimat e kësaj fatkeqësie natyrore.

Është koha, por jo si papagalli, të ngremë nivelin e sigurisë.

Është koha ta marrim tërmetin seriozisht duke paraparë pasojat e tij fatale…

Nëse do të bëjmë vetëm në vend numero, si kemi bërë deri sot, atëherë lufta jonë me termetin është e humbur pa nisur.

LEXO TE PLOTE