Connect with Us

Pse Irani po shmang viktimat në radhët e amerikanëve?

Blog

Pse Irani po shmang viktimat në radhët e amerikanëve?

Publikuar

-

Nga Nick Paton Walsh, “CNN”

* Bejrut, Liban – Sulmet me raketa të Iranit kundër bazave në Irak, ku ndodhen trupat amerikane, nuk ishin një reagim që synonte të vriste sa më shumë amerikanë. Irani do ta ketë ditur me siguri, se në orët e para të mëngjesit trupat amerikane janë normalisht në gjumë, dhe shanset për të shkaktuar viktima janë më të ulëta.

Gjithashtu, Teherani e di se SHBA-ja zotëron një mbrojtje ajrore të fuqishme, e cila ka të ngjarë të ketë qenë në një gatishmëri të lartë. Teherani duhet ta ketë kuptuar se raketat e lëshuara prej tij, do të ndeshin përballë një teknologji të tillë.

Sulmet raketore nuk kanë asnjë domthënie, nëse qëllimi i Teheranit ka qenë vërtet vrasja në masë e trupave amerikane, siç disa kishin premtuar disa zyrtarë iranianë. Ato kanë gjithsesi kuptim, nëse interpretohen si zbatim i urdhrit të Liderit Suprem të Iranit Khamenei, për të goditur hapur bazat ushtarake amerikane, si kundërpërgjigje ndaj vrasjes së gjeneralit Kasëm Sulejmani.

Por udhëzimet e Khameneit ishin konfuze kur raportuan për herë të parë. Kjo pasi SHBA-ja do të dominonte me siguri në një konflikt të drejtpërdrejtë ushtarak. Atëherë, a po urdhëronte Udhëheqësi Suprem një shfaqje force boshe?

Pluhuri që shkaktuan këto sulme ende nuk është pastruar, dhe madje edhe në kohën më të mirë motivet e Iranit mund të jenë të errëta. Por ekzistojnë 3 shpjegime të mundshme për këtë veprim. Së pari, që Khamenei është jashtë realitetit mbi atë që mund të arrijë ushtria e tij, duke e mbivlerësuar efektivitetin e sulmeve, të cilat më pas dështuan. Dhe kjo do të ishte e habitshme, duke pasur parasysh përfshirjen dhe njohuritë e tij mbi çështjet ushtarake iraniane.

Së dyti, edhe në këtë sulm “triumfoi” moderimi. Dhe ky sinjal kryesisht bosh – goditja natën dhe me një numër të vogël raketash e bazave ushtarake – siguron një shmangie nga përshkallëzimi i mëtejshëm i situatës, të cilën mund ta dëshirojnë tek e fundit që të dyja palët. Teherani dhe Uashingtoni, nuk kanë shumë për të fituar nga një luftë e zgjatur mes tyre.

LEXO EDHE:  Vizita e 9 kongresmenëve amerikanë në Tiranë/Reagon Ambasada e SHBA

Së treti, kjo mund të jetë një dredhi e Iranit, për të nxitur tek SHBA-në në ndjejë të rreme sigurie – që Irani është ushtarakisht i dobët dhe ka bërë një figurë të keqe – ndërsa në prapaskenë po orkestrohet një përgjigje asimetrike më e rëndë.

Kjo do të kërkonte një plan shumë strategjik, nga një qeveri iranian e përçarë midis krahut të konservatorëve të linjës së ashpër rreptë dhe të moderuarve. Dhe kjo nënkupton se Teherani ishte relativisht i sigurt, se asnjë amerikan nuk do të lëndohej në këtë sulm raketor.

Nëse sulmet në Irak janë në fakt qëllimi i plotë i përgjigjes që paralajmëroi Irani, ato mbartin me vete një rrezik tjetër:që administrata Trump do të mendojë se veprimi i tyre javën e fundit, i ka dhënë frytet e veta, dhe se Irani është zhdukur nga skena.

Kjo do të rrezikonte veprime të mëtejshme joracionale nga Uashingtoni, ndoshta jo vetëm kundër Iranit, por dhe armiqve të tjerë. Gjithashtu, ajo e bën Iranin të duket i dobët, gjë që mund të forcojë rivalët e tjerë rajonalë të Teheranit.

Përgjigja e Iranit ndaj vrasjes së Sulejmanit, do të ishte gjithmonë e vështirë të parashikohej. Por nëse goditjet e mbrëmshme janë në fakt tërësia e hakmarrjes së Teheranit nda SHBA-së, shumë pak analistë do të kishin parashikuar një reagim kaq të shpejtë, dhe kaq ushtarak në natyrën e tij./ Përshtatur nga CNA.al

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Blog

Ekspertët: Si të ajrosni ambientet e brendshme, për të parandaluar përhapjen e Covid-19

Publikuar

-

Nga

Ekspertët: Si të ajrosni ambientet e brendshme, për të parandaluar përhapjen e Covid-19

Pjesa më e madhe e rasteve të transmetimit të SARS-CoV-2, ndodh në ambientet e brendshme, pasi aty përqendrohet në ajër shumica e grimcave që përmbajnë koronavirusin e ri. Mënyra më e mirë për të parandaluar përhapjen e virusit në një shtëpi apo biznes, do të ishte mbajtja larg e njerëzve të infektuar.

Por kjo është e vështirë të bëhet, në kushtet kur rreth 40 për qind e rasteve janë simptomatikë, dhe njerëzit asimptomatikë mund të përhapin ende koronavirusin tek të tjerët. Maska mund të bëjë goxha punë, duke mos e lejuar përhapjen e virusit në ajër.

Por nëse një person i infektuar ndodhet brenda një ambienti, në mënyrë të pashmangshme
një virus do të lëshohet në ajër. Dhe kur kjo ndodh ju keni dy mundësi:të sillni ajër të pastër nga jashtë, ose të largoni virusin nga ajri që gjendet brenda ndërtesës.

Hapësira e brendshme më e sigurt, është ajo që ka vazhdimisht shumë ajër të jashtëm, që e zëvendëson ajrin e ndenjur brenda. Në godinat tregtare, ajri i jashtëm zakonisht pompohet përmes sistemeve të ngrohjes, ventilimit dhe ajrit të kondicionuar (HVAC). Nëpër shtëpi, ajri i jashtëm futet përmes dritareve dhe dyerve të hapura, përveç atij që depërton nëpër vrimat e vogla apo tubacionet e ujit. Inxhinierët e mjedisit përdorin një njësi të quajtur kursi i shkëmbimit të ajrit. Ai përcakton sasinë e ajrit të zëvendësuar brenda një ndërtese gjatë një ore. Ndërsa shkalla e saktë varet nga numri i njerëzve dhe madhësia e dhomës, shumica e ekspertëve këshillojnë 6 ajrosje për një dhomë me përmasa 3.3 me 3.3 metra me 3-4 njerëz brenda.



Ndërkohë një studim i vitit 2016 që sugjeron që 9 ajrosje çdo orë, e zvogëlonin ndjeshëm përhapjen e SARS, MERS dhe H1N1 në një spital në Hong Kong. Shumë godina në SHBA, por jo vetëm, nuk plotësojnë nivelet e rekomanduara të ventilimit. Por fatmirësisht, ajrosja është diçka e lehtë për t’u bërë.
Një fillim i mirë, është mbajtja hapur e dritareve dhe dyerve. Vendosja e një aspiratori në një dritare ku fryn shumë, mund të rrisë shumë shkëmbimin e ajrit nga brenda jashtë dhe anasjelltas. Në godinat që nuk kanë dritare, mund të ndryshohet sistemi i ventilimit mekanik për të rritur sasinë e ajrit që pompohet. Por si ta dimë nëse dhoma ku jemi ka një shkëmbim të mjaftueshëm të ajrit? Sa herë që e nxjerrim frymën, çlirojmë në ajër dioksid karboni, CO2. Meqenëse koronavirusi përhapet më shpesh përmes frymëmarrjes, kollitjes apo të folurit, ju mund të përdorni nivelet e CO2 për të parë nëse dhoma është apo jo e ajrosur sa duhet.

LEXO EDHE:  Covid-19 shqetëson amerikanët/ Numri i të infektuarve në trend rritjeje

LEXO EDHE:  Vizita e 9 kongresmenëve amerikanë në Tiranë/Reagon Ambasada e SHBA

Në ambiente të jashtme, nivelet e CO2 janë pak më shumë se 400 pjesë për milion (ppm). Një dhomë e ventiluar mirë, duhet të ketë një normë rreth 800 ppm të CO2. Çdo shkallë më e lartë, është një shenjë se ambienti mund të ketë nevojë për më shumë ventilim.

Vitin e kaluar, studiuesit në Tajvan raportuan mbi efektin e ventilimit gjatë epidemisë së tuberkulozit në Universitetin e Tajpeit. Shumë nga klasat dhe kishin nivele të CO2 mbi 3000 ppm. Kur inxhinierët përmirësuan qarkullimin e ajrit, duke e ulur nivelin e CO2 nën 600 ppm, epidemia u zhduk plotësisht.
Sipas hulumtimit, shtimi i ventilimit uli me 97 për qind normën e transmetimit të sëmundjes. Prandaj gjithçka fillon nga blerja në internet e një aparati për matjen e nivelit të CO2. Aparatet më të mirë kushtojnë 100 dollarë. Por nëse nuk keni mundësi, kujdesuni të paktën që të ajrosni vazhdimisht ambientet ku qëndroni./Përshtatur nga CNA.al

LEXO TE PLOTE

Blog

Populizmi i të djathtës, është rruga e duhur për ecjen përpara të Amerikës

Publikuar

-

Nga

Populizmi i të djathtës, është rruga e duhur për ecjen përpara të Amerikës

Nga Ely Osborne “American Greatness”

Për një kohë shumë të gjatë, Partia Republikane i ka shpërdoruar fuqitë e saj politike. Edhe pse askush nuk do ta mësojë këtë nga lajmet e mediave kryesore, apo nga mediat sociale, Amerika mbetet përgjithësisht një vend “i qendrës së djathtë”.

Kultura popullore përhap vlerat progresive dhe mendimin liberal. Gjithsesi, një sondazh
i Gallup në vitin 2019, zbuloi se 72 për qind e amerikanëve e klasifikonin veten si “konservatorë” ose “të moderuar”. Ndërkohë, shtresa e mesme vazhdon që të zvogëlohet, ndërsa të ardhurat për më të pasurit vazhdojnë të rriten.

Qendra “Pew Research” zbuloi se për herë të parë në mbi 50 vjet, shtresa e mesme nuk përbën më shumicën e popullatës amerikane. Të ardhurat e kësaj shtrese, ka rënë nga rreth 60 në gati 40 për qind gjatë së njëjtës periudhë.
Sipas Byrosë së Analizave Ekonomike, sektori i prodhimit jepte gati 30 për qind të PBB-së nominale në vitet 1950, ndërsa tani përbën vetëm rreth 10-15 për qind. Dhe kjo e dhënë është e rëndësishme, pasi sugjeron se një pjesë e konsiderueshme e vendit në mesin e shtresës punëtore dhe asaj të mesme, mund të ketë pikëpamje të moderuara deri konservatore, por pa pasur një përfaqësim të vërtetë.
Që të dyja partitë i kanë lënë pas dore këta amerikanë. Demokratët i kanë braktisur njerëzit e shtresës punëtore, në këmbim të joshjes përmes politikës së identitetit të elitave në Hollivud, ato akademike, dhe kompanive të mëdha të teknologjisë në Silicon Valley.

Republikanët i kanë shpërdoruar dekadat e fundit, duke hartuar marrëveshje të “tregtisë së lirë”, dhe duke rindërtuar vendet anembanë globit, në një kohë kur shumë amerikanë të shtresës së mesme humbën vendet e tyre të punës, dhe panë shpërbërjen e komuniteteve të tyre.
Kapitalizmi është diçka fantastike, por pse një drejtues i një kompani të madhe duhet të fitojë miliona dollarë në ditë, ndërsa taksapaguesit amerikanë i subvencionojnë punonjësit e tyre përmes tollonave ushqimorë, dhe programeve të tjera të rrjetit të sigurisë sociale? Për më tepër, pse një kompani kineze, që shfrytëzon punën e fëmijëve, duhet të lejohet të shesë mallrat e saj në SHBA pa paguar asnjë taksë, ndërsa shitësit tanë ambulantë paguajnë si taksa një të tretën e fitimeve të tyre?

E përse cilësohet e drejtë të dërgosh dhjetëra miliarda dollarë në vende të tjera, por është “liberale” ta investosh të njëjtën shumë parash mbi sistemin arsimor amerikan, kujdesin shëndetësor, apo transportin publik? Pse më të pasurit fitojnë më shumë gjatë një pandemie, ndërsa më të varfrit duhet të zgjedhin midis pagimit të qirasë së shtëpisë dhe blerjes së ushqimeve për të mbushur barkun me bukë?
Këto pyetje nuk kanë marrë kurrë përgjigje. Dhe Partia Republikane duhet t’i adresojë tashmë këto shqetësime, duke iu rikthyer vlerave të populizmit të krahut të djathtë. Ajo duhet ta mbështesë sloganin “Amerika e Para” përmes politikave si mbrojtja e duhur e kufijve, kufizimi i emigracionit, mbajtja e burimeve në shtëpi në vend të dërgimit të tyre jashtë shtetit, dhe promovimin e industrisë amerikane.



Duhet pranuar se punët në industri, garantojnë stabilitet në strukturën ekonomike dhe sociale të vendit. Politikanët përmendin “përvojën” dhe “arritjet” e tyre si arsye për t’u rizgjedhur në detyrë. Por cilido që ka jetuar në Amerikën e shtresës së punëtoreve, e di se lidershipi i 30 viteve të fundit ka dështuar. Partia Republikane duhet të mbrojë mënyrën amerikane të jetesës, duke ndërtuar lagje të sigurta përmes mbështetjes së ushtrisë, zbatimit të ligjit dhe zbatimit të plotë të Amendamentit të Dytë, ndërsa duhet të promovojë vlerat judeo-kristiane të të qenit pro-jetës dhe familjes.

LEXO EDHE:  Nis lufta me Korenë e Veriut?!/SHBA nxjerr ushtrinë në front, ja masat (Video)

LEXO EDHE:  Nis lufta me Korenë e Veriut?!/SHBA nxjerr ushtrinë në front, ja masat (Video)

Liria është thelbësore për mbijetesën e republikës, por është po aq e rëndësishme që fëmijët të rriten në familje të qëndrueshme, dhe ku t’u mësohet dallimi mes së drejtës dhe të gabuarës. Republikanët duhet të refuzojnë korrupsionin, por të refuzojnë të ndikohen edhe nga kompanitë e mëdha të teknologjisë dhe Uoll Striti.
Ata duhet të ndalin përpjekjet për të kënaqur gjigantët e mediave sociale, kompanitë shumëkombëshe dhe kompanitë farmaceutike. Ndërkohë, duhet të luftojnë për të mbrojtur të drejtat e lirisë së fjalës për qytetarët amerikanë në platformat e tyre, dhe të sigurohen që zgjedhësit e tyre të vazhdojnë të kenë punë cilësore në lagjet e tyre.

Janë njerëzit e thjeshtë ata që i çojnë republikanët në postet e larta dhe jo elitat, dhe politikat e tyre duhet ta pasqyrojnë këtë fakt. “Xho Smith”, që ka bashkëshorten të ndërvarur nga droga dhe që së fundmi e humbi vendin e punës, nuk i intereson aspak që një shkollë u rindërtua në një vend diku në botë.
Ai madje nuk di as të përdorë si duhet internetin për të parë dokumentarin e “Netflix”, ku elita amerikane ligjëron mbi politikën e identitetit dhe “privilegjin” e tij. Ai është fokusuar vetëm tek pamundësia për të ushqyer vajzën e tij të vogël, dhe nuk arrin ta kuptojë se përse qendra e më e afërt e rehabilitimit, që është 1 orë larg shtëpisë së tij, i ka gjithnjë vendet e zëna për 3 muajt e ardhshëm.

Dhe kjo është një histori shumë e njohur për shumë njerëz. Duket sikur klasa politike në pushtet, është tërësisht e shurdhër ndaj ankesave të njerëzve të zakonshëm. Republikanët duan të luajnë me “manualin”e vjetër, të cilin demokratët e kanë braktisur prej kohësh. Ndërsa republikanët shqetësohen për “procedurën”, demokratët planifikojnë të anulojnë rregullat në fuqi, të zhdukin Kolegjin Zgjedhor, dhe të marrin nën kontroll sistemin gjyqësor, teksa na japin leksione mbi Kushtetutën, ndërsa e zbatojnë agjendën e tyre radikale në kurriz të amerikanëve të zakonshëm.

Nuk është më e pranueshme që republikanët të jenë “demokratë të moderuar”, dhe dalëngadalë t’i lëshojnë terren të majtës. Është kjo arsyeja pse tani më shumë se kurrë, duhet të themelohet një krah i ri i të djathtës, që të frenojë turmën e liberaleve, dhe ta drejtojë këtë vend në drejtimin e duhur.
Amerika është një vend që ia vlen të mbrohet, dhe ka ardhur koha që një gjeneratë e re patriotësh të luftojnë kundër lëvizjes progresive që po përpiqet të marrë peng vendin. Presidenti Donald Trump, e ka ndryshuar ndjeshëm lidershipin e Partisë Republikane, por ai nuk do të jetë gjithmonë president.

Nëse Partia Republikane i kthehet sërish tregtisë të lirë dhe luftërave të kota me synim ndryshimin e regjimit, ajo do të zhduket për fare, dhe nëse ndodh kjo, e meriton atë fund. Në dekadat e shkuara përpara Trumpit, njerëzit e shtresës punëtore do të mbështesnin verbërisht demokratët, dhe republikanët nuk do të shqetësonin ndonjëherë për adresimin e shumicës së këtyre çështjeve. Por kohët po ndryshojnë, dhe ky është shansi i fundit që Partia Republikane ta shpallë veten si partia e njerëzve të zakonshëm, dhe të qeverisë ashtu siç e dëshiron mbështetjen e tyre./Përshtatur nga CNA.al

LEXO TE PLOTE

Blog

George Soros, babai i prapaskenave botërore?

Publikuar

-

Nga

George Soros, babai i prapaskenave botërore?

Bashkëpunëtor i nazistëve, spekulator, nxitës i shkëmbimit të popullsisë: cila është e vërteta për pretendimet lidhur me miliarderin dhe filantropin Soros?

Ai është një nga drejtuesit e “prapaskenave botërore”. Ai financon një rrjet global bashkëpunëtorësh. që e quajnë veten gazetarë, aktivistë të shoqërisë civilë ose aktivistë të të drejtave të njeriut – por që në të vërtetë ata janë agjentët e tij. Ai gjithashtu i drejton si marioneta politikanë të rëndësishëm dhe me ndikim. Qëllimi i tij është t’u vjedhë popujve të tërë të identitetin e tyre kulturor dhe kombëtar, të skllavërojë vende të tëra dhe t’i detyrojë të qëndrojnë në skllavëri të përjetshme. Me spekulimet e tij ai ka zhytur tashmë miliona vetë në katastrofë. Dhe tani ai planifikon një ndryshim të popullsisë në Evropë – vendasit e krishterë duhet të zëvendësohen nga migrantët myslimanë. Kushdo që e kundërshton këtë plan përballet me fushata ndërkombëtare si gënjeshtar dhe shpifës.

Njeriu, për të cilin thuhen të gjitha këto është miliarderi dhe filantropi me origjinë hungarezo-hebreje George Soros, i cili feston sot (12 gusht 2020) nëntëdhjetëvjetorin. Që nga mesi i viteve 1980, ai ka shpenzuar miliarda dollarë për mbështjetjen e demokracisë dhe të projekteve edukative përmes fondacionit të tij “Shoqëria e Hapur”. Dhe ka bërë shumë armiq në mbarë botën.

Teoritë konspirative për Sorosin as nuk do t’ia vlenin të përmendeshin, nëse ato do të ngriheshin vetëm nga ekstremistët e ekstremit të djathtë që kanë pak ithtarë. Por pretendimet e renditura më lart ngrihen prej vetë Viktor Orbánit, kryeministrit nominalisht demokrat të qeverisë së një vendi të BE-së.

Figurë e urryer në Evropën Lindore

Dhe Orbáni nuk është i vetëm. Pothuajse kudo në Evropën Lindore, George Soros është bërë një nga figurat më të urryera vitet e fundit. Shpesh janë politikanë të qeverisë që e konsiderojnë Sorosin si armik. Për shembull, partnerët e koalicionit nacionalist të kryeministrit bullgar, Bojko Borisov aktualisht po akuzojnë filantropin e pasur për organizimin e protestave mbarëkombëtare kundër qeverisë së vendit.

Sidoqoftë asnjë politikan nuk shkon aq larg sa Viktor Orbáni me akuzat e tij. Në qershor, për shembull, kryeministri hungarez theksoi në një nga intervistat e tij javore në stacionin publik të afërt me qeverinë “Kossuth-Rádió” se ai nuk ishte dikush që dyshonte kudo për komplote – por ato ekzistonin. Si p.sh. Sorosi kundër Hungarisë.

Shumica në Hungari i besojnë Orbánit

Sondazhet në Hungari tregojnë se sa të forta janë rrëfimet për Sorosin: një shumicë e madhe e hungarezëve e konsiderojnë miliarderin Soros si një figurë tejet negative që ushtron ndikim të dëmshëm në vend. Madje shumë hungarezë u besojnë pretendimeve të rreme dhe të shpikura rreth Sorosit. Para zgjedhjeve parlamentare hungareze në vitin 2018, rreth dy të tretat e votuesve ishin të bindur, se miliarderi amerikan do të kandidonte për një parti me emrin e tij – megjithëse kjo parti nuk ekziston dhe Soros kurrë nuk ka marrë pjesë në ndonjë zgjedhje në Hungari dhe as nuk ka bërë fushatë në Hungari .

Cilat janë trillimet kryesore rreth Sorosit? Dhe çfarë ka të vërtetë në to?

Bashkëpunëtor i nazistëve

George Soros lindi në Budapest në 12 gusht 1930 në një familje të pasur hebreje. Familja e tij i mbijetoi Holokaustit me dokumente të falsifikuara dhe pjesërisht në ilegalitet. Mediat hungareze të afërta me qeverinë raportojnë në mënyrë të përsëritur për “spekulatorët që bashkëpunuan me nazistët” dhe që zhytën në katastrofë ose mashtruan hebrenjtë e tjerë.



Në fakt Sorosi, i cili ishte asokohe një i ri 14 vjeçar arriti të mbijetonte vetëm duke u maskuar si nip i një zyrtari të Ministrisë së Bujqësisë, i cili ndër të tjera ishte përgjegjës për inventarizimin e pronave të konfiskuara prej hebrejve. Vetë Sorosi ka treguar për këtë në një intervistë me CBS në vitin 1998 – megjithatë ai nuk ka thënë se i kishte ndihmuar në ndonjë mënyrë zyrtarit në fjalë, por se ishte një fëmijë që donte të mbijetonte.

LEXO EDHE:  Familja Cali qe u perplas me deputetin socialist Prenga i drejtohet Ambasades te SHBA-se/ Po pengohet zbardhja e së vërtetës

LEXO EDHE:  SHBA zgjedh Greqinë shtyllë strategjike në Ballkan, kundërshton gazsjellës të dytë për Turkish Stream

Sidoqoftë historia për Sorosin si bashkëpunëtor i nazistëve në qarqet e lidhura me qeverinë hungareze vazhdon të përsëritet me kokofortësi në Hungari.

Spekulatori që ka zhytur miliona vetë në mjerim

George Soros ka qenë një nga shpikësit e strategjive të investimeve me rrezik të lartë dhe suksesi i tij më i madh, që e bëri të famshëm në mbarë botën, ishte spekulimi financiar kundër paundit britanik, përmes së cilës një firmë që ai manaxhonte arriti  në vitin 1992 të fitonte gati një miliardë dollarë në një kohë shumë të shkurtër. Kjo është arsyeja pse Soros konsiderohet në Hungari si një spekulator që zhyt miliona njerëz në mjerim.

Në fakt zhvleftësimi i paundit britanik më 16 shtator 1992 ka një histori komplekse, e cila shkaktoi mospërputhje politike, sociale dhe ekonomike shumë kohë përpara, se Sorosi dhe investitorët e tjerë të fitonin para nga ajo. Vetë Soros ndërkohë është shndërruar në një nga kritikët më të mprehtë të kapitalizmit modern financiar dhe bën thirrje për rregullim të rreptë të tregjeve financiare.

Skizofren

Meqenëse ai vazhdoi të fitonte miliarda përmes transaksioneve të aksioneve në bursë deri sa u tërhoq privatisht për të dalë në pension, shumë kritikë të moderuar e akuzojnë atë për skizofreni. Po ashtu ai është kritikuar se fondet me të cilët punon Soros janë të regjistruar në parajsa fiskale ose se ai nuk ndjek një strategji investimesh të qëndrueshme si Fondi Shtetëror Norvegjez. Por Sorosi e ka dhuruar pjesën më të madhe të pasurisë së tij private në fondacionet e tij bamirëse. Një nga motot e tij është: “Më pëlqen të fitoj shumë para dhe pastaj t’i shpenzoj për qëllime të mira”.

A planifikon Sorosi një shkëmbim të popullsisë në Evropë?

Që nga kriza e refugjatëve në vjeshtën e vitit 2015 qeveria hungareze pretendon se George Soros synon të sjellë miliona refugjatë muslimanë në Evropë dhe se ai po planifikonte një shkëmbim të popullatës. Kryeministri Orbán e quan këtë “Planin e Soros” dhe tashmë ka organizuar disa “konsultime kombëtare” për këtë.

Pretendimet bazohen kryesisht në një artikull të shkruar nga vetë Sorosi për krizën e migracionit në shtator 2015, në të cilin ai bën thirrje, mes të tjerash, për një pranim të rregullt dhe të shpërndarë në mënyrë të drejtë të një milionë refugjatëve në vit. Ai më vonë u shpreh për 300,000 në vit dhe bëri gjithashtu thirrje për një mbrojtje më të mirë të kufijve të jashtëm të BE-së – këtë të fundit e kërkon edhe Orbáni.

Detajet e “Planit të Sorosit” që prezanton pa pushim qeveria Orbán janë thjesht gënjeshtra: dënime më të buta për migrantët kriminelë, dhjetëra mijëra euro ndihma sociale për refugjatët ose shpërndarje të detyruar të migrantëve në mbarë Evropën – të gjitha këto janë kërkesa që Sorosi nuk i ka bërë kurrë./DW

LEXO TE PLOTE