Kryetari i Partisë Republikane, Fatmir Mediu është i ftuar mbrëmjen e sotme në Syri tv ku tha se kryeministri Edi Rama do bëjë çdo gjë për të manipuluar zgjedhjet.

“Rama ka për qëllim vetëm pushtetin dhe paratë. Ai do bëjë çdo gjë që është e mundur për të vjedhur zgjedhjet”.

“Në çdo qendër votimi, opozita duhet të identifikojë votuesit e saj dhe të garantojë që do të votojnë. Opozita duhet të frenojë manipulimin me qytetarët.

Opozita duhet të ketë një ofertë të qartë dhe të absorbueshme.Unë po përpiqem që të jem pjesë e një koalicioni që garanton fitoren. PR e ka marrë gjithmonë mandatin e deputetit në Tiranë pa PD, e ka marrë në Elbasan, në Durrës. Unë nuk them se kjo përsëritet gjithmonë.

Padyshim që shqiptarët janë kundër kësaj qeverie dhe kundër këtij njeriu banal, por beteja nuk është e lehtë. Shqiptarët janë kundër, opozita duhet të jetë në krahun e tyre,” tha Mediu.

Analistët Andi Bushati dhe Baton Haxhiu komentuan në emisionin “Shock” të Euronews Albania deklaratën e kryeministrit Edi Rama se është pranë premtimit të tij për hapjen e 300 mijë vendeve të punës.

Nën moderimin e gazetares Bruna Çifligu, dy analistët ndanë qëndrime të kundërta, ku Bushati tha se Rama ka dështuar, ndërsa Haxhiu tha se në tërësi gjërat kanë ecur mirë, por dy fatkeqësitë e fundit kanë përkeqësuar situatën.

Bushati tha se në tërësi qeveria e Ramës ka dështuar në të gjitha pikat kryesore të ekonomisë. Sipas tij kjo ndodhi pasi ekipi i tij qeverisës “kaq di të bëjë” dhe “kjo pa-aftësi” e ka zhytur në një pabarazi më të madhe vendin mes të pasurve dhe të varfërve. Bushati e konsideroi deklaratën për rreth 225 mijë vende pune të hapura, si deklaratë të pavërtetë. Ai tha se shifrat e përmendura janë kryesisht prej formalizimit dhe jo hapjes së vendeve të reja pune.

Haxhiu u mundua ta justifikojë se gjatë dy viteve të fundit vendi ka kaluar “dy fatkeqësi” si tërmeti dhe pandemia që sollën situata të vështira. Ai kujtoi duke iu referuar deklaratave të institucioneve ndërkombëtare të ekonomisë se Shqipëria ka pasur rritje të vazhdueshme ekonomike gjatë qeverisjes së Edi Ramës.

Haxhiu replikoi duke thënë se me formalizimin e rreth 225 mijë vendeve të punës është shënuar një arritje, se  “juridikisht vendet e punës nuk kanë qenë” dhe se në njëfarë mënyre premtimi është arritur. Ai tregoi se ishte i mendimit se gjatë qeverisjes së Ramës shtresa e mesme është rritur dhe hodhi poshtë pretendimet e Bushatit se ka pasur një theksim të pabarazisë.

Bushati replikoi duke këmbëngulur se shtresa e mesme nuk është rritur fare dhe se aktualisht “më shumë taksohet truri se sa kapitali”. Ky pretendoi se qeveria ka tatuar me 23% të pagës profesionet e lira si inxhinierët, dhe këmbënguli se “një oligark paguan sot taksa më pak se një inxhinier, apo shkencëtar”.

Haxhiu e justifikoi mënyrën e taksimit me faktin se drejtuesit e sipërmarrjeve të mëdha kanë përgjegjësi më të mëdha, si për shembull punësimin e mijëra punonjësve dhe kjo duhet vlerësuar më shumë se sa prodhimet, apo produktet individuale.

Debat të fortë nxiti edhe çështja e borxhit publik, ku Bushati kujtoi se në kohën kur ishte në opozitë Rama, Shqipëria e kishte borxhin publik rreth 70% ndërkohë që sot ky borxh ka kaluar 80%.

E kush nuk ka dëgjuar për platformën ZOOM këto kohë!

Në kohët që jetojmë, udhëheqës qeverish, anëtarë të organeve drejtuese të organizatave ndërkombëtare, individë që i bashkon anëtarësia në borde dhe ente, por që pandemia i ka mbyllur në kufijtë e shteteve ku jetojnë ose të qyteteve ku banojnë, nuk mblidhen dot në të njëjtën godinë për të diskutuar e vendosur.

Të gjithë si me magji i bashkon ZOOM!

Në pak minuta, të barabarta me kohën që i duhet secilit prej nesh që të spostohemi nga një dhomë në tjetrën, apo nga një zyrë në tjetrën, të gjithë shfaqen përballë njëri tjetrit!

ZOOM është platforma që lidh njerëz në shtete të ndryshme, apo në qytete të ndryshme dhe i bën të ndihen sikur gjenden në të njëjtën godinë e që mund të diskutojnë mes tyre. Njësoj siç do kish ndodhur nëse do u duhej thjesht të spostoheshin nga zyrat e veta, drejt asaj zyres më të madhe diku në fund të korridorit të katit VIP e që quhet gjithmonë “sallë mbledhjesh”!

Kush shpiku platformën kishte në mend pikërisht këtë!

Dhe këtë platformë shfrytëzojnë sot gjithë dynjaja me mend në kokë, këndej e andej botës, që nuk udhëtojnë dot por që u duhet të takohen sidoqoftë.

Por në këtë anën këndej, në zyrat e këtij shteti që quhet Shqipëria jonë, në zyrat e KQZ, ka ca dit që zyrtarë që punojnë në të njëjtat ambjente zyrash, që takohen 30 herë në ditë me njëri tjetrin, po përdorin ZOOM për t’u mbledhur 1 herë në ditë e parë veten në televizor!

Po ndodh në KQZ!

Nuk është batutë!

Nuk është Turi i famshëm i barkës që na plasi shpirtin ngaqë ish shumë i lëvizur.

Kjo që tregojmë po ndodh rregullisht në takimet që i pari i Komisionerëve të Shqipërisë, organizon me Sekretarin e vet të Përgjithshëm dhe një ose dy drejtorë të tjerë të tij!

Përfytyroni pak se çdo të ndodhte nëse gjithë titullarët e institucioneve qendrore ose të pavarura, një herë në ditë, për orë të tëra, do rrinin në ZOOM, duke ndenjur secili te zyra e vet, (me distancë ajrore 3-15 metra nga njëri tjetri), duke diskutuar veprimtarinë e zakonshme të institucioneve të cilave u përkasin!!!!

Imagjinoni sikur epidemia e çuditshme që ka kapur zyrtarët e KQZ, të kapte gjithë zyrtarët kudo ne botë!

Do linin pa ZOOM ata të tjerët!

Ata që nuk udhëtojnë dot, e që për këtë shkak nuk gjenden dot në të njëjtën godinë, nuk do gjenin dot “karrike” as në ZOOM!

Nuk dihet se çfarë diagnoze ka sjellja e zyrtarëve të KQZ gjatë orarit të tyre të punës! Mbase dikush që u do të mirën mund t’i kthjellojë pak ata djemtë fulltime në KQZ. Nëse Sekretari i Përgjithshëm nuk u hap telefonin, të sqarojnë të paktën të parin e Komisionerëve të Shqipërisë!

Ai nuk e meriton që nga kryetar i Komisionit Qendror të Zgjedhjeve, siç ka qenë dikur, të katandiset sot me shfaqjet në ZOOM si Kryetar i Sekretarit te vet të Pergjithshëm./CNA.al