Connect with Us

Zv/ministri i Shëndetësisë jep dorëheqjen pas mitëmarrjes së kapur nga FIKSI

Bota

Zv/ministri i Shëndetësisë jep dorëheqjen pas mitëmarrjes së kapur nga FIKSI

Publikuar

-

Zëvendës-ministri i Shëndetësisë në qeverinë e Maqedonisë së Veriut, Asim Musa u detyrua të martën të njoftojë dorëheqjen nga posti pasi u shfaq mbrëmë në emisionin Fiks Fare të televizionit Top-Channel, ku negocionte me disa individë rreth një operacioni që duhej kryer kundrejt një çmimi prej një mijë eurosh.

Zoti Musa duket në video duke shpjeguar çmimet për shtetas të huaj që do të paguanin në spitalin e qytetit të Strugës, ku ai më parë kishte qenë drejtor dhe vazhdonte të ushtronte profesionin e mjekut – kirurg.

Zoti Musa në fillim refuzon, siç duket në video-regjistrim, të pranojë paradhënien e ofruar, por në fund pranon një banknotë prej pesëdhjetë eurosh “për kafe”, siç dëgjohet duke thënë ai vetë.

Zëvendësministri Musa në një konferencë për median tha se do të japë dorëheqje nga posti ndërkohë që e quajti “grackë për qëllime spektakli” atë që i kishin bërë bashkëpunëtorët e Fiks Fare.

“23 vite rrjesht jam në shërbim të qytetarëve, jo vetëm të vendit tonë por edhe më gjerë. Me ndershmëri dhe përkushtim. Shpesh nuk kam kursyer as rehatinë familjare për t’iu dalë në ndihmë qytetarëve. Fatkeqësisht, përpjekja ime për t’iu ndihmuar qytetarëve u shndërrua në grackë për spektakël inekzistent mediatik me qëllim të dëmtimit të figurës, personalitetit tim dhe punës sime profesionale. Unë e njoftoj “pacientin” se ndërhyrja për qytetarët e huaj pa siguracion shëndetësor në vendin tonë është private dhe e njoftoj për koston e mundshme të shërbimit shëndetësor për të gjithë procedurën. Ndërsa këta “pacientë” vazhdimisht përpiqeshin të krijojnin kurth me çfarëdo forme të mundshme, siç e shikoni në video”, tha zoti Musa.

Sipas Fiks Fare, nga ana tjetër, kanë qenë disa qytetarë të cilët i janë drejtuar emisionit investigativ duke akuzuar Asim Musën për kryerje operacionesh kundrejt ryshfetit, ndonëse mban postin e zëvendës-ministrit.

Klinika e Nefrologjisë në Strugë ku kishte qenë i angazhuar doktor Musa nuk iu përgjigj të martën pyetjeve të Zërit të Amerikës në lidhje me çmimet që një shtetasi të huaj do t’i duhej të paguante për një operacion të caktuar dhe as për kontrollet mjekësore. Një punonjës i spitalit tha me telefon se drejtori nuk ishte të martën në zyrë ndërsa për t’iu përgjigjur pyetjeve nevojitej leje nga Ministria e Shëndetësisë.

Ndërkohë, ministri i Shëndetësisë Venko Filipçe u tha gazetarëve se gjithkund ka ndëshkime për vepra të këtilla dhe se ministria është përpjekur që t’i stimulojë mjekët përmes rritjes së pagave për shmangien nga korrupsioni.

Prokuroria në Strugë ka hapur hetime dhe sipas një zëdhënësi të saj, përmes bashkëpunimit ndërkombëtar do të kërkojë regjistrimet origjinale, teksa do të merret në pyetje edhe zëvendësministri Musa.

Bashkimi Demokratik për Integrim, partia ku bën pjesë zëvendësministri i Shëndetësisë e ka përshëndetur vendimin e tij për dorëheqje. Deputeti Artan Grubi është shprehur për median se “përkushtimi i partisë është i pakompromis në luftën kundër korrupsionit”.

Aleanca për Shqiptarët, ndërkohë, përveç përgegjësisë morale kërkon edhe përgjegjësi ligjore në lidhje me rastin e Asim Musës.

Korrupsioni në shëndetësi dhe në gjyqësorin e Maqedonisë së Veriut është një çështje shqetësuese që jo rrallë e kanë ngritur edhe organizata ndërkombëtare. Po ashtu, një nga kapitujt e bisedimeve për integrimn e vendit në Bashkimin Evropian është pikërisht lufta kundër korrupsionit dhe sundimi i ligjit./VOA

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Bota

Japoni, evakuohen nga anija shtetasit amerikanë

Publikuar

-

Nga

Të dielën pasagjerët amerikanë që ndodheshin në karantinë në një anije në brigjet e Japonisë që prej datës 3 shkurt, janë evakuuar. Shtetasit amerikane në bordin e anijes “Diamond Princess”, e cila njoftoi për 355 persona të infektuar, u evakuuan nga anija dhe u nisën drejt SHBA-së me avionë çarter, ku gjasat janë të qëndrojnë në karantinë edhe për katërmbëdhjetë ditë të tjera.

Më herët zyrtarët kinezë njoftuan të dielën se numri i rasteve të reja të personave të prekur me koronavirus është ulur për të dytën ditë me radhë. Komisioni kinez i Shëndetësisë konfirmoi 1.843 raste të reja, që përfaqësojnë një rënie kahasuar me dy ditë më parë kur Kina njoftoi më shumë se 7.500 raste.

Numri i vdekjeve nga virusi në territorin e Kinës arriti në 1.665, me 142 vdekje të raportuara të dielën. Por Organizata Botërore e Shëndetësisë paralajmëroi të dielën se është “e pamundur të parashikosh se çfarë drejtimi do të marrë epidemia”. Duke folur në konferenca e Sigurisë në Mynih, shefi i OBSH-së Adhanom Ghebreyesus u bëri thirrje qeverive të punojnë me këtë organizatë për të informuar në mënyrën e duhur publikun për rreziqet që paraqet virusi, por pa shkaktuar histeri në publik siç tha ai.

Ndërkohë publikimi nga mediat shtetërore kineze të një fjalimi të mbajtur 3 shkurt nga Presidenti Xi Jinping ka ngritur pikëpyetje të reja.
Publikimi i fjalimit të shtunën ishte një përpjekje e dukshme për të demonstruar se Partia Komuniste kishte vepruar me vendosmëri që në fillim ndaj situatës, por nxiti gjithashtu kritika mbi arsyen se pse publiku nuk u njoftua më herët.

Zyrtarët lokalë kinez janë kritikuar mbi mënyrën se si e kanë menaxhuar situatën pas shpërthimit të virusit, ndërsa përfshirja e presidentit ishte minimizuar, deri tani. Zyrtarë të Huanit, qyteti ku u shfaq për herë të parë virusi si dhe të provincës Hubei u shkarkuan nga detyra për shkak të asaj që u tha se ishte një përgjigje jo e duhur ndaj situatës emergjente të shkaktuar nga virusi./VOA

LEXO TE PLOTE

Kosova & Rajoni

Shpërndahet Kuvendi/ Maqedonia e Veriut shkon në zgjedhje të parakohshme

Publikuar

-

Nga

Sot u shpërnda Kuvendi i Maqedonisë dhe vendi do të shkojë në zgjedhje të parakohshme parlamentare që do të zhvillohen më 12 prill.

Sipas “INA”, për shpërndarjen e parlamentit pro votuan 108 deputetë, asnjë kundër dhe asnjë abstenim.
Me këtë vendim, Maqedonia e Veriut edhe zyrtarisht shkon në zgjedhje të reja parlamentare të parakohshme që do të jenë më 12 prill.

Zgjedhjet do të organizohen nga Qeveria teknike me mandat 100 ditësh. Përbërja e deritanishme parlamentare e përbërë nga 120 deputetë, ishte e dominuar nga LSDM, VMRO-DPMNE, por edhe nga partitë shqiptare BDI, ASH, Lëvizja BESA, Alternativa, PDSH, etj.

LEXO TE PLOTE

Bota

Sulmohen me tre raketa bazat ushtarake afër Ambasadës Amerikane

Publikuar

-

Nga

Baza ushtarake amerikane në Baghdad të Irakut është sulmuar me 3 raketa.

Sipas mediave ndërkombëtare, nuk ka asnjë të lënduar nga baza që ndodhet afër me Ambasadën Amerikane.
Raportohet se deri tani askush nuk ka marrë përgjegjësi për ngjarjen, ndërsa ky është sulmi i fundit nga shumë të tillë që kanë patur objektiv trupat e koalicionit SHBA-Irak.

Në fillim të këtij viti SHBA vrau me një sulm ajror me anë të një droni gjeneralin iranian Qassem Solemaini, ndërsa Irani u përgjigj me dy raketa balistike afër bazës ushtarake amerikane në Irak, ku mbetën disa të plagosur./CNA.al

LEXO TE PLOTE