Diskutimi për hapjen e negociatave ka bërë që Komisioneri për Zgjerimin në BE, Johannes Hahn dhe Kryeministri i Maqedonisë së Veriut, Zoran Zaev të dalin në një konferencë urgjente për mediat.

Në fjalën e tij, Hahn theksoi se duhet një dritë jeshile për hapjen e negociatave.

“Do doja që ky takim të kishte diçka për të festuar. Maqedonia e Veriut ka bërë hapa të mëdhenj që duhen vlerësuar. Shpresoj që të premten të festojmë. Ju nuk kërkoni asgjë më shumë sesa një dritë jeshile për të nisur negociatat”,tha ai.

Më tej, Hahn tha se besueshmëria e BE-së varet nga vendimi për Shqipërinë dhe Maqedoninë e Veriut.
Por a nënkupton dalja në konferencë vetëm me kryeministrin e Maqedonisë së Veriut, ndarjen e dy vendeve në procesin e negociatave? I pyetur nga mediat për këtë çështje, Hahn tha se do të takohet nesër në mëngjes me Edi Ramën.

“Nuk mund të komentojë qëndrimet e vendeve anëtare, por institucionet e BE kanë bërë rekomandim për të dy vendet”, shtoi Hahn.

Nga ana tjetër, Kryeministri i Maqedonisë së Veriut, Zoran Zaev kërkoi nga vendet e BE-së që t’i japin vendit të tij mundësinë për të çelur negociatat.
“Ne kemi bërë reforma të rëndësishme për gjithë Ballkanin jo vetëm për Maqedoninë e Veriut, ju lutem mendoni për popullin e Maqedonisë”, tha ndër të tjera Zoran Zaev./CNA.AL

Kryeministri i Maqedonisë së Veriut, Zoran Zaev është shprehur se një refuzim për hapjen e negociatave, do të ‘hidhte në erë’ qeverinë Maqedonase.

Në një intervistë për tanjug.rs, Zaev theksoi se Republika e Maqedonisë së Veriut për hir të hapjes së negociatave, ka ndërruar emrin dhe ka bërë marrëveshje me Bullgarinë e Greqinë.

“Në shpresojmë, nuk ka asnjë vend anëtar në BE që ka ndonjë vërejtjeje për ne, nuk ka arsye, problem është diskutimi i BE-së për nevojën e reformave që është shumë e rëndësishme ndaj e pres që reformat mund të fillojnë në BE ndërsa procesi i zgjerimit të fillojë me Maqedoninë e Veriut, dhe me Shqipërinë. Kjo është shumë e rëndësishme që të vazhdohet me impulsin e motivimit ndaj Ballkanit Perëndimor.

Alternativë tjetër për ne nuk ka. Ne nuk mund të heqim dorë nga BE sepse ajo është e ardhmja jonë. Nëse ndodh e kundërta, do të shkatërrohet qeveria dhe do të vijë dikush tjetër që do ta vazhdojë këtë rrugë.

Për anëtarësim në Bashkimin Evropian, ne kemi ndërruar dhe emrin, kemi arritur marrëveshje me Bullgarinë dhe Greqinë, kemi shënuar përparim në marrëdhëniet me Serbinë, me Shqipërinë si dhe me Kosovën, që janë fqinjët tanë”, nënvizoi Kryeministri Maqedonas.

Profesori i së drejtës, Muhamet Kelmendi ka hedhur akuza të forta në drejtim të presidenti të Kosovës, Hashim Thaçi.

Në një intervistë për “Kosova Sot Online”, Kelmendi tha se “Lista Serbe është produkt i drejtpërdrejtë i Hashim Thaçit dhe Ivica Daciçit e Aleksandër Vucicit, por nën ndikimin Morgherinit dhe të BE-së. Natyrisht se kjo Listë është krijuar mbi këtë marrëveshje të fshehtë dhe vepron kryesisht nën dirigjimin dhe udhëheqjen e shtetit serb.

Aleksandër Vucic është krimineli që e udhëheq dhe tërësisht vepron nëpërmjet kësaj, duke mos lejuar unifikimin e shtetit dhe funksionimin e tij. Prandaj de fakto dhe de jure, me marrëveshjen e fshehtë edhe Veriu është nën sundimin e shtetit serb”.

Ndërsa komenton helmimin përmes fletëve të votimit,  Muhamet Kelmendi thotë se nuk duhet të kërkohen edhe më shumë provokime të tjera në Republikën e Kosovës nga ndërhyrja e Serbisë dhe Lista Serbe, për ta përjashtuar nga sistemi politik i Kosovës Listën Serbe, që sipas Klemendit, nuk përfaqëson asgjë tjetër, veçse i shërben si instrument i drejtpërdrejtë Serbisë për destabilizimin e Kosovës.

Profesor Kelmendi madje akuzon Hashim Thaçin, duke deklaruar se Lista Serbe është një produkt i marrëveshjes së fshehtë të Hashim Thaçit me eksponentët e qeverisë së Beogradit, ngase dihet mirëfilli se si u krijua ky subjekt politik serb.

“Në fakt i pari kësaj afere të kryerjes së veprave penale është Hashim Thaçi që e krijoi veriun , pushtetin paralel serb atje, dhe dha pëlqimin për këtë subjekt kriminal. Vepra penale e tyre del kryesisht nga veprimet antikushtetuese dhe nga Kodi Penal i Kosovës. Mbi këtë bazë, këtë listë, jo vetëm që duhet ndaluar juridikisht që të vepron, por edhe penalisht duhet të ndiqet. Dënimet janë nga 5 vjet deti në burg të përjetshëm”, thekson profesor Kelmendi për “Kosova Sot Online”.

Përtej këtyre veprimeve kriminale të Beogradit përmes Listës Serbe, me helmimin misterioz të stafit të KQZ-së-QNR, Kelmendi thotë se ata po kryejnë edhe vepra penale kundër nenit 1 të Kushtetutës, në të cilën del uniteti dhe pandashmëria e territorit.

“Ka edhe shumë vepra të tjera penale. Por si Thaçi, ashtu edhe anëtarët e Listës Serbe, si dhe vet ky subjekt, duhet të dënohen me neni 125 të Kodit Penal të Kosovës, por nuk ka kush për ta bërë. Organet e brishta dhe të korruptuara të Kosovës nuk e bëjnë këtë. Njerëzit e pa denjë dhe frikacakët e prokurorisë dhe të policisë, apo ndoshta AKI, e cila vetëm formalisht ekziston nuk merren me këto gjëra”, ka shtuar për “Kosova Sot Online”, profesori Muhamet Kelmendi.