Connect with Us

Nga Mero Baze/ “Pazari” që nuk bëhet pa opozitën parlamentare

Opinione

Nga Mero Baze/ “Pazari” që nuk bëhet pa opozitën parlamentare

Publikuar

-

Të gjitha palët, përveç shumicës, po përgjojnë se kush do jetë pazari me shumicën dhe kujt do t’i jepet ky pazar. Partia Demokratike po përpiqet t’i mbajë gjallë ende mbështetësit e vet me gënjeshtrën e radhës, që do ketë zgjedhje shumë shpejt, dhe do të jenë edhe parlamentare, edhe lokale. Tani jo se ata të dëshpëruarit e besojnë atë që u thotë Basha, por janë gati t’ia thonë dhe vetes që duan një pazar që të mos shkrihen fare.

LSI dhe aleatët e PD, duken edhe më të tërbuar. Ilir Meta pasi shpëtoi një mace që në pikë të mëngjesit, në drekë u kujtua të shpëtonte demokracinë dhe botoi një fjalim të tij të vitit 2008, kur ishte kundër pazarit Rama- Berisha për ndryshimet kushtetuese. Në fakt, është e vetmja periudhë kur LSI ishte me të drejtën, por që më pas, kur bëri koalicion me Berishën, e deri më sot, është mbrojtësja më e madhe e sistemit elektoral që prodhoi marrëveshja Rama- Berisha.

Por në gjithë këtë histori ku flitet për marrëveshje të mundshme për ndryshime në Kodin Elektoral për ndryshime kushtetuese etj, të gjithë harrojnë që faktori i vetëm politik që i bën të mundshme ato, është opozita parlamentare.

Gjuha e baltës që Lulzim Basha vazhdon të përdorë ndaj tyre dhe nënvleftësimi që Rama shpesh bën sikur i ka të sigurtë, mund të zhbëjnë çdo pëprjekje për reforma, nëse i anashkalon ata.

Fakti që SHBA dhe Bashkimi Europian i respekton ata dhe mban të hapur komunikimin me ta, ka të bëjë mes të tjerash me faktin se në këtë vend nuk bëhet dot asgjë, nëse nuk duan ata.

Lulzim Basha mund të ulet në tryezë me Edi Ramën, mund të marrë çfarë do ai, apo çfarë do Edi Rama, por ndryshimet do bëhen në Parlament, dhe ato janë në dorë të Rudina Hajdarit dhe grupit të opozitës parlamentare.

LSI dhe aleatet e tjerë të vegjël të PD, mund të kenë kërkesa për ndryshim sistemi, por para se të ulen e t’i bëjnë qejfin njëri- tjetrit, është mirë të ulen e të pinë kafe me depuetët që kanë në Parlament. Biles po ta kishin bërë më parë, mund të shpëtonin dhe shkarkimin e presidentit.

Nëse ka sot një faktor real parlamentar që ka në dorë ndryshimet elektorale dhe kushtetuese e mbi të gjitha, dhe afrimin apo jo të zgjedhjeve parlamentare, se ato lokale janë më 2023, kjo është opozita parlamentare.

LEXO EDHE:  Luli lë Metën të vetëm në betejë

Opozita parlamentare është e vetmja që mund të ndalë një marrëveshje “Rama-Basha 2” dhe jo postimet e Ilir Metës me qen, mace, Çim Pekën dhe me brekë nëpër male.

Opozita parlamentare është e vetmja që mund të diktojë shumicën për një reformë elektorale më të ndershme, për t’i hapur rrugë vetes të hyjë në politikë.

Opozita parlamentare është e vetmja forcë reale që mund të kthehet në urë komunikimi mes opozitës së rrugës dhe qeverisë.

Përpjekja për ta injoruar atë dhe për të bërë lidhje të shkurtër mes dy palëve, mund të rezultojë një dështim.

Para se Lulzim Basha t’i çojë emisarë Edi Ramës, është mirë të thërrasë për kafe deputetët e listës së tij, që i kanë hyrë në Kuvend, e të pajtohet me ta. I duhen më shumë se Fatmir Mediu, Dash Shehi e Nard Ndoka, se pa ata nuk bën dot realitet asnjë ëndërr për ndryshime dhe për zgjedhje.

Para se të gënjejë të vetët, që zgjedhjet do bien nga qielli, apo nga ndonjë i dërguar, është mirë të ulë kokën e t’u kërkojë ndjesë për fyerjet atyre që kanë në dorë sot fatin real të opozitës, për ta rikthyer në sistem.

Ata nuk janë të shantazhueshëm si qeveria. Nuk janë të kapur. Nuk janë të detyruar të dëgjojnë dhe fyerjet e PD, dhe t’i shërbejnë asaj. Ata në fakt janë pjesa më e lirë e politikës shqiptare.

Llogaritë e bëra për pazare me Edi Ramën, janë “pazare pa hanxhinë”.

E vetmja parti opozitare që ka një deputet në Parlament është “Bindja Demokratike”. Të tjerët janë ose duke bërë një parti të tyre, ose disa prej tyre, duke mbështetur “Bindjen”. Por asnjë nuk po shoh ta ketë kokën nga PD, përveç Lefter Maliqit.

Ndaj është mirë që para se të ëndërroni për pazare apo marrëveshje, të bëheni të urtë, të pranoni opozitën që keni çuar vet në Parlament, dhe kur të pajtoheni me ta, të keni fuqinë e duhur për negociata.

Tani keni vetëm çelsat e kashtës./CNA.al

 

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Opinione

Nga Arian Galdini/ Edhe njëherë për lavdinë e dhjetorit dhe rënien e dhjetoristëve!

Publikuar

-

Nga

Shumë është shkruar e shumë është folur për dhjetorin, dhjetorët e dhjetoristët, vit pas viti në Shqipërinë e këtyre 29 viteve tranzicion dhe protodemokraci langaraqe.

Duke qenë se prej tërmetit vetëm këtë vit nuk pamë të ripërseritet rituali gati-gati i bezdisshëm kur televizionet e gazetat na rikujtojnë ato ditë të ladvishme të dhjetorit ’90 e do të na përdëllejnë me histori e kujtime protagonistësh apo expo-protagonistësh të atyre ditëve të rëndësishme për historinë moderne të vendit tonë, qëllimi im nëpërmjet këtyre rradhëve është që tu hedh një sy e ti qëmtoj nga një këndvështrim kritik ritualet e përvitshme, duke hapur kësisoj edhe një debat të madh publik, të thellë, të sinqertë e plot kurajo politike dhe intelektuale për dhjetorin dhe dhjetoristët.

Në fakt, që reflektimi të jetë i plotë nevojitet që në udhëtimin tonë meditativ ti përshkojmë të 2 dhjetorët e rëndësishëm të këtyre 29 viteve, dhjetorin ’90 dhe dhjetorin ‘98.

Për dhjetorin e tretë të 2018, le të flasin e shkruajnë forumsat e Organizatës Politite, VV, Lal Erit, LRI dhe FRPD.

Vija arsyetative që ne do të ndjekim më poshtë do të jetë pak a shumë nën këto dritëhije:

– Dhjetori ‘90 apo misioni i papërfunduar.

– Dhjetori ‘98 mundësia për të përmbushur dhe përmbyllur suksesshëm misionin e rrëzimit të vazhdimësive të komunizmit të shprehura nëpërmjet mentaliteteve të udhëheqësive dhe elitave bllokuese të tranzicionit, si edhe ndërtimit të një demokracie perëndimore reale, të sinqertë që nuk flet nëpërmjet indikatorëve por nëpërmjet shprehive, traditave, akteve, ligjësive dhe qytetarizimit.-

Dhjetori ‘90

Shumëkush ndër ne e ka fortësisht dhe drejtësisht të ngulitur në kujtesë dhjetorin ‘90 i cili në këto 29 vite ia ka dalë mbanë të krijohet dhe stabilizohet si një koncept themelor politik, madje tashmë mund të flitet se ka marë njohje ajo që njihet si fryma e dhjetoristëve.

Nën këtë frymë, pothuajse çdo vit, çdo dhjetor, nga forca të djathta apo të majta politike ose edhe nga grupime jo politike, ka pasur përpjekje për ritakim, ripërsëritje, apo tejkalim të atij momenti historik që solli dhjetori ’90, por ka qenë krejt e pamundur.

Sidoqoftë, bash 8 vite pas atij dhjetori historik u ndërmor një lëvizje e cila për fat të keq me qëllim apo krejt padashje është lënë ose ka kaluar në harresë.

Lëvizja e studentëve të dhjetorit të vitit ’98, nuk përkujtohet publikisht, ndërkohë që ai i vitit ’90, ka marrë dhenë dhe është mistifikuar.

Madje gazetarët dhe analistët e majmur të ketyre 30 viteve, pikërisht ata që e vrasin çdo ditë e çdo natë “dhjetorin 90”, duke u shërbyer një grushti politikanësh plaçkaxhinj, oligarkësh dhe krimit, na përdëllehen për dhjetorin e 2018, si një ngjarje e pazakontë, vetëm e vetëm sepse për elitat tona të ketyre 3 dekadave, ajo çka ndodhi prej studentëve, me studentët, në dhjetorin 2018, ishte në fakt nën kontrollin e plotë të Elitave 30 vjeçare politike.

Historitë personale dhe jo personale të protagonistëve të dhjetorit ’90, gëlojnë tashmë nëpër shkrime gazetash, libra me ose pa bashkautorë, kronika të pafundme lajmesh.

Lufta për dhjetorin ’90, është shndërruar në një luftë për pushtet e prestigj.

Turravrapi deri në marrje fryme të atyre që gulshojnë për të zënë një vend në histori është i pakrahasueshëm dhe i pangjashëm me asnjë rast e vend tjetër.

Të majtë e të djathtë shqyejnë copën e tyre të historisë ca mbi dhjetorin e vertetë e shumica mbi dhjetorin e majmë të krijuar vetë e çlirshëm prej tyre vit pas viti.

Madje na janë mësuar sytë të shohim herë pas here në data të caktuara kalanderike ata që njihen tashmë si komuniteti i dhjetoristëve ‘90, të cilët pushtojnë median sa majtas aq edhe djathtas.

Duket gati-gati qesharake, por këtyre ju duhet të presin 12 shtatorin, 8 dhjetorin dhe 20 shkurtin që të nxjerrin kokën e thonë ndonjë gjë nëpër media.

Me një veshtrim të imët dhe një matematikë e gjeografi të vogël idividësh të ekspozuar si dhjetoristë ‘90, del se shumë prej tyre kanë qenë krejt të paqartë në atë që po bënin në atë dhjetor që e shenjtërojnë sot deri në mërziti.

Madje për të mos u bërë kategorik e gabimisht përgjithësues por specifikisht duke dëgjuar dëshmitë kundërshtuese apo shumëngjyrëshe të të ekspozuarve me leje si dhjetoristë ‘90, lexon herë nën rreshta e herë drejtpërdrejtë se një pjesë e mirë prej tyre rezulton të kenë qenë të përcaktuar nga “të tjerët”.

Ndërkohë, kemi përshtypjen madje bindjen se ata që mungojnë në media dhe në jetën aktive politike e vendimmarrëse, ata që u mohoet historia, apo që u mohoet mundësia për të folur të vërtetat e lëvizjes së dhjetorit ’90, ashtu si kanë ndodhur realisht, si janë jetuar e përjetuar realisht, pa interpretime politike, apo korrektime të mëvonshme për përditësim me politikat e ditës, duhet të kenë qenë heronjtë e vërtetë e janë bash ata që i kanë bërë aktet më fisnike.

Por dikush mund të thotë se ky është një gjykim krejt subjektiv.

Edhe këtë merak dua që tia heq çdo lexuesi duke ia pohuar këtë dyshim.

Jam krejt subjektiv në vlerësimin tim.

Por a nuk ju bën përshtypje karriera e disa ekspo-dhjetoristëve ‘90, që nuk kanë treguar kurrë se si e morën kurajon të kundërshtonin sistemin më të egër në Europë?

A nuk ju bën përshtypje fakti se secili prej tyre vrapon zellshëm dhe zvaranikisht që lejen për të shpallur veten hero ta kërkojë nga Lideri Politik, apo Liderat e Partive sipas interesave, rreshtimit, dhe rastit, dhe jo nga ngjarja që ai apo ajo kanë krijuar apo marë pjesë?

A nuk ju bënë përshtypje që ndërkohë zhgërryhen e turfullojnë nëpër studio se ishin heronjtë e dhjetorit ’90, dhe sapo dalin nepër kafene shprehen se ata vetë nuk dinin se ç’po ndodhte në “qytetin “e tyre?

A nuk na thonë këta njerëz se si e arritën pajtimin e tyre të pashprehur me elitën më të egër politike komuniste, kur kjo e fundit ende edhe sot e kësaj dite ndonëse me skalionet apo brezat e dytë, tretë apo të katërt, gëzon shendet të plotë ekonomik e politik, nën trajtën e re të një elite skandalozisht bllokuese të periudhës së tranzicionit apo postkomunizmit 30 vjeçar?

Madje, madje për ironi të fatit, vetë ekspo-dhjetoristët ‘90, na e thonë në media apo tribuna si çirakë të politikës apo me mandate të tëhuajëzuara të politikës, se ish-bllokmenët të rinj dhe të vjetër janë akoma në veprimtari të plotë politike, ekonomike dhe mediatike prej 29 vitesh edhe sot e kësaj dite…

Dhjetori ‘98

Tani le të shohim ç’ka ngjarë me dhjetorin 98.

Kemi parë me shumë gëzim se shumica prej tyre nuk kanë arritur të jenë askund në politikën e madhe.

Nuk janë shpërblyer, nuk janë konsideruar, nuk janë vlerësuar, madje janë lënë në harresë dhe neglizhim total.

Fisnikëria e tyre ka qenë e madhe sepse nuk kanë rendur ta shesin fotografinë historike të dhjetorit ’98, për të kërkuar shpërblime, konsiderata apo vlerësime nga politika e ditës.

Përjashtim kanë bërë disa emërime sporadike individësh në pozicione të larta shtetërore, por jo për shkak të pjesëmarrjes së tyre në lëvizjen studentore të dhjetorit ‘98, por për arsye të tjera, jashtë dhjetorit ‘98.

Këto emërime nuk janë aspak përfaqësuese, ngase edhe vetë të emëruarit nuk denjojnë e as kanë pikë dëshire ta konsiderojnë emërimin e tyre si burim e rrjedhojë të vlerësimit dhe negocimit me lëvizjen dhe pjesëmarrësit në lëvizjen studentore të dhjetorit ‘98.

Kësisoj përsias plot ngazëllim se dhjetoristët ‘98, ose shumica prej tyre kanë pasur një distancë shumë të madhe me elitën komuniste dhe post-komuniste dhe e vetmja pikë takimi i tyre me të është ajo çka mund të quhet qoshetakimi me ish-elitat komuniste dhe elitat e reja bllokuese post-komuniste të transponduara në kryesinë e Partisë Demokratike të viteve ’90 – ‘98.

Lëvizja Studentore e Dhjetorit ’98, u konfigurua si një lëvizje e sinqertë që u bazua plot ndërgjegje e kthjelltësi tek figura legjendare e Azem Hajdarit i cili ishte ekzekutuar pabesisht dy muaj më pare, para oborrit të PD-së.

Nga arsyetimi i të qenurit vetë drejtpërdrejtë dëshmitar dhe drejtues kryesor në ngjarje më duhet të them se e sigurtë është edhe marrëdhënia dhe mirëbesimi që dhjetoristët ‘98 kishin tek Sali Berisha ndërsa ia nisnin përpjekjeve të tyre për ta ngritur në këmbë këtë lëvizje studentore.

Por nuk mund të flasim reciprokisht për po të njëjtat ndjesi dhe qëndrime nga ana e Sali Berishës dhe e Kryesisë së PD, për ne studentët e asaj kohe.

Thjesht nuk e dimë dhe nuk kemi se si ta verifikojmë përveçse duke hapur këtë debat që synon ky shkrim.

Nëse Kryesia e PD dhe Lideri i saj atëherë Sali Berisha, kanë qenë apo jo të sinqertë në atë çfarë ata kanë bërë, kjo është për t’u ekzaminuar.

Por fakti është se dhjetoristët e ’98, i kanë qëndruar në krahë, i janë gjendur në momentet më të vështira dhe e kanë mbrojtur këtë lidership të PD asokohe dhe sidomos vetë drejtpërdrejt dhe nominalisht Sali Berishën, edhe pse atëherë në dhjetorin ’98, të gjithë pjesëmarrësit dhe drejtuesit e lëvizjes e kishin vetëdijen e plotë se Sali Berisha ishte i izoluar politikisht brenda dhe jashtë vendit.

Asokohe u vendos mirëbesimi tek Sali Berisha dhe u vendos madje edhe ndërmarrja e grevës së urisë të 120 studentëve, që afërmendsh ndihmonte rikthimin e Sali Berishës në skenë si faktor determinant në politikën shqiptare atë dhjetor të ‘98.

Mes dy dhjetorëve

-(Paraprakisht sqaroj këtu se qëllimisht kam ndërfutur termin ekspo-dhjetoristët ’90, për ta bërë të qartë dallimin mes atyre që kanë qenë heronjtë e vërtetë dhe fisnikë të atij dhjetori të lavdishëm, të cilët i nderoj thellësisht e u ndihem pafundësisht mirënjohës, dhe atyre që e përdorin dhjetorin me leje e sipas nevojave të partisë apo për një copë bukë të ngjyer me pak karrierë zvarraniku)-

Gjatë vjeshtës së vitit 1998, e majta në pushtet e asaj kohe tallej me çdo lëvizje politike të prejardhur nga Oborri i PD.

Në atë kohë ishte shndërruar në demode, dhe anti-trendy që një i ri të shprehej se ishte me PD.

Heroi i dhjetoristëve ‘90, legjendari Azem Hajdari ishte vrarë.

LEXO EDHE:  Asambleja e PS shkarkon tre anëtarë/ Po në PD, kush do shkarkohet?

LEXO EDHE:  Departamenti i Emigracionit dhe Diasporës i PD takime emigrantët në Greqi

Shumë miq të tij, përsa ai ishte gjallë e mohuan, përbaltën, shitën, rrëzuan dhe kurrë s’kishin arritur t’a mbronin sa ishte në jetë, sepse e kishin pasur të ndaluar apo nuk dinin, apo thjeshtë nuk e kuptuan.

Por pas vdekjes së Azemit, rendën ekraneve, gazetave, tribunave, proçesioneve, të thonë se ai ishte gjallë, se ai ishte Lideri i tyre, Heroi i tyre i nga Pasvdekja etj, etj.

Sërisht u shfaqën plot vrull e përgjërime ekspo-dhjetoristët ‘90, të cilët gjetën strehën e tyre politike poshtë arkivolit të të ndjerit Azem Hajdari.

Histori njerëzore, por me keqardhje dhe vërtetësi duhet thënë se është një histori njerëzorësh ziliqarë, të vegjël nga ana morale, të pazotë politikisht për të marrë përgjegjësi e për tu shndërruar në lidera të natyrshëm, burimorë.

Histori njerëzish që të bëjnë hero dhe të pranojnë si lider vetëm pasi vdes.

Dhe pse?

Sepse i vdekur iu duhesh më shumë.

Ndërkaq, ndërsa në atë shtator-dhjetor ’98, ndodhte kjo histori tragjikomike ekspo-dhjetoristësh ‘90, disa djem e vajza, ndër më guximtarët dhe më idealistët e brezit të tyre, morën përsipër të bënin një lëvizje të re politike nën modelin e pararendësve të tyre që kishin ende aureolën e heronjve të viteve ‘90.

Si dëshmitar i atyre kohëve e zhvillimeve unë them se asokohe, ndonëse të përfshirë në aksionin për ngritjen në këmbë të lëvizjes studentore të dhjetorit ‘98, ne besonim se ajo histori e jashtëzakonshme e dhjetorit ’90, nuk mund të përsëritej dot më kurrësesi, madje aq më pak nga ne.

Edhe në ditët e sotme besoj se nuk mund të përsëriten përmasat e asaj lëvizje duke patur këtu parasysh mbështetjen popullore, emocionalitetin, idealizmin dhe bindjet e larta, kontekstin politik, kontekstin ndërkombëtar, peshën historike të momentit etj.

Por tani ndërsa shkruaj këto radhë, them se e kam një ndryshim në atë që mendoj.

Nëse atëherë besonim se djemtë e vajzat e Dhjetori të Parë, atij ‘90, ishin shumë “gjigantë”, të pakapshëm në atë çfarë ata bënë, sepse ishin të tillë dhe historia ua rezervoi këtë fat, sot rezervojmë të drejtat e plota të mendojmë ndryshe.

Dhjetori i Parë, si komunitet dhjetoristësh, në këto 29 vite, ka arritur të prodhojë vetëm një Hero, një Lider.

Dhe ky Hero ka ndërruar jetë fizikisht.

Dhe ky Hero, ky Lider u pranua si i tillë vetëm pak ditë gjatë ditëve të stuhishme të dhjetorit ‘90, por që më vonë u mohua, u linçua dhe u godit pafundësisht passhpine.

E më pas u ripranua si Hero dhe Lider vetëm pas vdekjes.

Të tjerë heronj dhe lidera të vërtetë të atij dhjetori ‘90, u detyruan të largohen nga Shqipëria, ndonjërin e thyen moralisht e shpirtërisht me pabesi e rrethime helmi dhe negativiteti, dhe e katandisën të vuajë burgjeve të Shqipërisë, ndërsa të tjerëve u është qepur goja apo hequr mundësia.

Ata që flasin e duken kudo janë vetëm ekspo-dhjetoristët ’90, që dalin në skenë vetëm në disa data kalendarike kur Pushtetet dhe Politika ka nevojë për shërbimin e rithirrjes së “legjitimitetit historik” nga të ashtuquajturit burimorët e dhjetorit ‘90.

Expo-dhjetoristët e parë e kanë vetëdënuar me vdekje shpirtin e tyre, politikisht përsa i takon lidhjes që ata kanë me parimet e dhjetorit ’90, të cilat shumica e shqiptarëve i besoi, beson e ndjek me sinqeritetin më të madh. Ata kanë keqpërdorur këdo, të gjallë dhe të vdekur, me të vetmin qëllim atë të një suksesi mjeran politik.

Ata as janë bërë dhe as nuk kanë për t’u bërë ndonjëherë të parë. Ata thjeshtë janë dhe ngelen në funksion dhe vegla qorre të legjitimitetit të munguar të elitës së vjetër dhe elitave të reja bllokuese postkomuniste. Ata rrinë në pritje që dikush mos t’ju hyjë në pjesën e dhjetorit të tyre. Ata kanë dalë në shitje të gjithë.

Shesin fotografinë historike të dhjetorit ‘90, tek blerësi i rradhës ndër Liderat dhe Pushtetarët Politikë.

Por njerëzit jashtë, qytetarët e thjeshtë, njerëzit që mendojnë e reflektojnë si qytetarë të përgjegjshëm, e kanë kuptuar që ai dhjetor nuk ka ndodhur krejt ashtu si thuhet nga ekspo-dhjetoristët ’90, të cilët janë shndërruar në shpirtra të vdekur të marë me qera nga Ciçikovët e Udhëheqësive politike shqiptare, gjatë datave kalendarikisht të njohura tashmë.

Ndërsa edhe pse mund të rrezikojmë të konsiderohemi të njëanshëm, ne gjithësesi besojmë fort se dhjetoristët e dytë, dhjetoristët e ‘98 ishin më të sinqertë, më të drejtpërdrejtë, më të vetëdijshëm, më politikë.

Ata përkrahën liderin politik të asaj kohe Sali Berishën kur të gjithë e kishin harruar.

Dikush mund të thotë se ai ua hodhi sepse vetëm ai përfitoi.

Kjo është pjesa që i takon drejtpërdrejt vetë Sali Berishës dhe ndërgjegjes së tij, që të vendosë e përcaktojë se si është sjellë e se si do të vazhdojë të sillet me ata që i qëndruan pranë kur të gjithë e lanë, apo me ata që e ndihmuan në ditë të vështira për të mbijetuar e për tu ringritur.

Por me siguri mund të themi se dhjetoristët e dytë ishin më të pjekur politikisht dhe më të sinqertë.

Qëllimin e kishin të qartë dhe qëndruan për të.

Dhjetoristët e vërtetë ’90, bënë histori të madhe, të jashtëzakonshme që transformoi Shqipërinë.

Por Expo-dhjetoristët e ‘90 rendin t’ua imponojnë shqiptarëve idenë e madhe të tyre sipas porosive, ndërkohë që dhjetoristët ‘98 bënë histori edhe pse përkohësisht ndokush mendoi se ua vodhi, mohoi apo zhyti në harresë.

Dhjetoristët e ’98, po rriten dalëngadalë në politikë por të sigurtë.

Pa barrë të madhe në ndërgjegjien e tyre sepse kurrë nuk morën atë që ndoshta u takonte.

Kështu që nuk mund tu kërkojë llogari askush për ndonjë pjesë të supozuar si të marë.

Ka dhe shumë arsye të tjera për të menduar se Dhjetoristët e ’98, ishin më politikë.

Së paku kishin mundësi për të zgjedhur më shumë, por ata zgjodhën sakrificën për atë që besonin.

Si grup të rinjsh studentë nga Fakultete të ndryshme në vitin 1998 pas vrasjes së deputetit Azem Hajdari filluan një Lëvizje Studentore pothuajse në të gjitha Universitetet e Shqipërisë, por kryesisht të përqendruar në Universitetet e Shkodrës dhe Tiranës.

Kjo Lëvizje Studentore e Dhjetorit ’98, vinte me një frymë të re dhe ambicie të qartë që synonte përmbylljen e një proçesi të papërfunduar të rendjes së Shqipërisë drejt lirisë, demokratizimit, zhvillimit të ekonomisë dhe integrimit Europian, proçes ky i cënuar dhe gjymtuar rëndë nga viti i vështirë 1997, si dhe nga vrasja e liderit të studentëve dhe të pluripartitizmit shqiptar z.Azem Hajdari.

Misioni i studentëve shqiptarë në dhjetorin ‘98, ishte pikërisht mbrojtja e fitoreve të arritura deri atëherë nga fryma dhe shpirti demokratik e liridashës i shqiptarëve.

Lëvizja studentore e dhjetorit ’98, ishte një lëvizje maturie të madhe qytetare e cila synonte të ngrinte brezin e dijes nga auditoret e tronditura prej ngjarjeve të rënda dhe vështirësive me të cilat po përballej vendi ynë, e ta vendoste në udhën e lirisë dhe të paqes për të rikuperuar e rivendosur stabilitetin politik ku të mbizotëronte mirëkuptimi, mirëbesimi dhe bashkëpunimi mes paleve politike në Shqipëri.

Lëvizja studentore e dhjetorit ’98, ishte nje akt politik dhe qytetar i studentëve shqiptarë me synim prodhimin e një ambienti dhe ligjërimi politik ku nuk kishte më vend për dhunën, zemëratën dhe veprat e këqija, porse ngritjen lart të shpirtit të paqes dhe pajtimit i cili do tu jepte shanse forcave të së mirës të lartësonin dinjitetin dhe mirësinë e shqiptarëve.

Lëvizja studentore e dhjetorit ’98, ishte një lëvizje e strukturuar dhe artikuluar drejt në rrafshin politik, social, intelektual dhe ideor ngase në asnjë moment nuk rreshti së synuari kthjelltësisht qytetarinë e paqes dhe atdhedashurisë ndër gjithë faktorët veprimorë dhe vendimorë politikë, kulturorë dhe social në Shqipëri.

Kjo Lëvizje studentore e dhjetorit ’98, kaloi nëpër disa etapa deri në vendimin e madh të mbi 120 studentëve për tu vetësublimuar për besimin dhe idetë e tyre duke u futur në një grevë urie 13 ditore e cila u përmbyll me një shërbim të madh ndaj vendit tonë, uljen në tryezë të Kryeministrit Shqiptar të asaj kohe z.Pandeli Majko dhe Liderit të Opozitës z.Sali Berisha, vendosjen e paqes dhe fitoren e madhe të forcave të së mirës dhe bashkëpunimit përkundrejt operatorëve të së keqes dhe dhunës.

Vendosja e Paqes dhe rifillimi i një kohe të re politike në Shqipëri ishte pararendja e një sërë aktesh të mëvonshme politike të cilat sollën konsensus të madh ndërpolitik por edhe reforma e zhvillime shumë pozitive në Shqipëri.

Tryeza e Paqes që erdhi si rezultat i Lëvizjes studentore të dhjetorit ’98, ishte pika e kthesës në Shqipëri, prej nga ku u shestua bashkëpunimi i faktorit politik shqiptar për çështjen e Kosovës, por edhe për çështje të mëdha të zhvillimit dhe progresit të Shqipërisë, për tu bërë një vend i denjë për anëtarësim në NATO dhe BE.

Tryeza e Paqes që erdhi si rezultat i Lëvizjes studentore të dhjetorit ’98, ishte pika e kthesës prej nga ku vendi ynë rikonfirmoi orientimin e tij demokratik dhe euro-atlantik.

E nën kontekstin e zhvillimeve të sotme politike duhet të themi se dhjetori ’90 dhe dhjetori ’98 janë dëshmi e energjive të mëdha kombëtare që kemi ne shqiptarët për të ndryshuar dhe korrektuar rregjimet dhe kurset ku na dhunojnë apo manipulojnë të hyjmë udhëheqësitë tona politike.

Çdo lloj tolerimi i mëtejshëm i realtiteteve të mbizotëruara nga udhëheqësi politike të mbrapshta, të majta e të djathta, çdo lloj përshtatshmërie ndaj keqnajave ciklike e simetrike që këto udhëheqësi ndërtojnë në funksion të lojrave për pushtet dhe ruajtje kontrolli, do të jetë humbje e fitoreve të arritura në dhjetorin ‘90 dhe dhjetorin ‘98.

Në dhjetorin ’90 fituam duke përmbysur të keqen, në dhjetorin ’98 fituam duke lartësuar tryezën e paqes dhe bashkëpunimit parimor, sot ka ardhur koha të ringrihemi për të fituar duke lartësuar qytetarinë dhe perëndimizimin.

Kurrë nuk është vonë.

Realiteti bi-monist, realiteti PD – PS, realiteti i mbizotëruar nga elitat bllokuese postkomuniste që drejtojnë e vegjetojnë në këto dy parti, duhet të ndryshojë.

Eshtë koha për dalëzotsi.

Eshtë koha për një realitet të fortë, shprehës, këmbëngulës, kurajoz, qytetar jashte PD dhe jashte PS.

Është koha për Lëvizjen e Re.

LEXO TE PLOTE

Opinione

8 dhjetori 2019 ose “Aparteidi” kriminal ndaj rinisë shqiptare!

Publikuar

-

Nga

Nga Akil Kraja

– Ndër më të rëndat kriza që po kalon sot vendi ynë, është ajo që prek rininë. Një krizë që do ta përkufizoja si një aparteid social e kriminal, një shtypje financiare, morale e politike, që po merr jetë të rinjsh të pafajshëm.

Rrëfimi prekës i para disa javëve, i boksierit kampion, 30 vjeçarit nga Vlora, Klevis Çelaj, për vështirësitë e hasura në të përditshmen e tij si sportist dhe si individ, është dëshmia e disatë në muajt e fundit të një realiteti tragjik me të cilin përballen të rinjtë shqiptarë. Një realitet që merr trajtat e një aparteidi dhe që i ka rrënjët në kriminalizimin e thellë të shoqërisë shqiptare.

Në çdo nivel e në çdo hallkë të shoqërisë, rinia shqiptare është e dyzuar mes dy botësh që janë qartazi në konflikt me njëra tjetrën. Në një krah shoqëria e krimit, dhe në tjetrin, shoqëria e punës. Në një krah dhuna, arroganca, fuqia e supremacia e të paprekshmëve, dhe në krahun tjetër vuajtja, shtypja, pamundësia që çon deri tek vrasja në seri e të rinjve shqiptarë.

Indriti ishte 25 vjeç. U vra në Myslym Shyri teksa kërkonte të fitonte ndershmërisht bukën e gojës si montues kondicionerësh. Nga hetimet, autorët rezultojnë të jenë vrasës e kriminelë të rinj në moshë që jetonin në gjendje të lirë e të kamur në mes të Tiranës. Një zinxhir i tërë i përbërë nga policë, gjyqtarë, tatimorë, shtetarë kanë dalë garantë që pavarësisht krimeve të tyre të mëparshme, ata të jetonin të lirë duke evituar dënimet respektive, ende sot e kësaj dite.

Ergysi 31 vjeçar dhe Orjani 36 vjeç u vranë po kështu teksa punonin në një rikonstruksion tek pallati i Zv.Kryeministrit. Ata kërkonin të fitonin ndershmërisht bukën e gojës duke punuar në ndërtim. Firma përgjegjëse për vrasjen e tyre ishte e njohur për shkeljet e shumta e të njëpasnjëshme. Por kjo nuk kishte ndikuar që firma të fitonte një tender nga Bashkia Tiranë dhe punimet të bëheshin serish në shkelje të ligjit. Kjo sepse një zinxhir i tërë i shtetit ka dalë garant që firma të vazhdonte të fitonte në paligjshmërinë e saj.

Ardit Gjoklaj 17 vjeç, u vra teksa ishte punësuar në një territor administruar nga Bashkia Tiranë. Arditi kërkonte të fitonte pak para për të blerë librat e shkollës. Kompania përgjegjëse rezultoi me shkelje ligjore të shumta, por sërisht, një zinxhir i tërë, duke filluar nga Kryetari i Bashkisë, ka dalur garant që gjithçka të dukej brenda “normalitetit” të paligjshmërisë.

Me herët, Elanda, 23 vjeçe, u vra në një tjetër aksident, këtë rradhë në Gjermani, teksa po tentonte si dhjetëra mijëra të rinj shqiptarë të ndiqnin një tjetër rrugëtim. Ajo kërkonte të mos kishte fatin e Indritit, Ergysit, Orjanit e Arditit. Ajo kërkonte që të punësohej më një pagë që të mjaftonte për të mbyllur muajin normalisht, një mjedis shoqëror ku i plotfuqishmi të mos ishte “i forti i lagjes”, por një qytetar i drejtë Europian.

Po kështu dhe Adela, një studente 23 vjeçare nga Rrësheni, e cila u vetëvra para disa javësh për shkak të barrës së rëndë të papunësisë e të varfërisë së familjes së saj. Pavarësisht një diplome si inxhiniere, pavarësisht investimit të moralshëm të familjes së saj, ajo u përball si dhjetëra vajza të reja shqiptare me kërkesa abuzive nga të plotfuqishmit e zonës, nga të korruptuarit, nga pushtetarët e pronarët matrapazë.

Që një i ri shqiptar të gjejë sot një vend pune, në pamundësi për ta blerë atë, duhet nxjerrë ose teserën e partisë, ose numrin e telefonit të mikut me pushtet, për të mos thënë më shumë…

LEXO EDHE:  Departamenti i Emigracionit dhe Diasporës i PD takime emigrantët në Greqi

LEXO EDHE:  Asambleja e PS shkarkon tre anëtarë/ Po në PD, kush do shkarkohet?

A janë këto shembuj të mjaftueshëm për të folur për një aparteid? Mosha mesatare në vendin tonë ka arritur aktualisht 36.7 vjeç për shkak të eksodit masiv të të rinjve. Studim pas studimi, mbi 80% e të rinjve shprehin ambicien për t’u larguar nga vendi. Qartazi arsyeja është diskriminimi, si burim i varfërisë dhe humbjes së shpresës. Të rinjtë ndihen të diskriminuar nga mungesa e meritokracisë, nga mungesa e konkurrencës së lirë, e ligjshmërisë, e moralit ekonomik dhe demokratik. Dhe kjo prek çdo hallkë të shoqërisë, çdo të ri, në çdo nivel.

Dijon, New York, Strasbourg, Paris, Prishtinë, Milano, Bruksel…

Kam jetuar personalisht në secilin prej këtyre qyteteve por nuk ndërrova emrin, nuk u dënova, e nuk u morra me punë të pista. Të mos ishte programi “BrainGain” (dhe pse nuk mora asnjë përfitim material nga ky program përpos vlerësimit moral) mbase nuk do te kisha mundur të integroja administratën publike e për pasojë mund të mos isha kthyer kurrë në Shqipëri…

Por në fund, pas 7 vitesh nga kthimi, faktet flasin vetë.

Ata që kanë ndërruar emrat, që janë dënuar për krimet e tyre në “rini”, sot ata drejtojnë 61 bashkitë e vendit, janë në parlament e në qeveri, në media e në show-biz. Ata janë anti-heronjtë e Shqipërisë moderne, e një Shqipërie të marrë peng nga debatet se kush ishin heronjtë e 45ës, apo të 90ës, ndërkohë që për ata të sotmit, askush nuk flet.

Pavarësisht se dje ishin Roshat apo Frrokët, anti-heronjtë e sotëm, shembulli i suksesit për të rinjtë shqiptarë mbeten Valdrinat e Jorgot, sepse ata vazhdojnë të mbeten në pushtet. Këta anti-heronj ndihen të fortë, të mbrojtur e të paprekshëm. Ata promovohen nga një shoqëri thellësisht e kriminalizuar që artin e realizmit socialist e ka zëvendësuar me artin e realizmit kriminal.

A i keni dëgjuar ndonjëherë këngët që përcillen sot nga radiot shqiptare? A keni pyetur ndonjëherë sesi dhe kush e financon artin shqiptar sot? Dhe nuk e kam fjalën vetëm për artin e rrugëve, por dhe për skenat dhe këngëtaret më prestigjioze që shiten si shembuj suksesi e talenti.

Të kthyerit braingain, të rinjtë që besonin tek puna, tek konkurrenca e lirë dhe e ndershme, tek edukimi profesional e jo tek mësimet e rrugës, tek forca e kontratës ligjore e jo tek kontrata e plumbit, tek fitimi nga sipërmarrja dhe jo tek paraja e shpejtë e drogës… ata, ne, së bashku jemi opozitë, dhe opozita në fund të ditës nënkupton një pakicë.

Ndaj sot unë shkruaj për Indritin, Ergysin, Arditin, Elandën e Adelën, për këta të rinj për të cilët, sot më 8 dhjetor askush nuk flet, pasi ata nuk jetojnë më.

E ritheksoj se nëse me “aparteid” nënkuptojmë një lloj shtresëzimi të dhunshëm shoqëror kundra një grupimi për shkak të një trajtje përbashkuese, etnike, fetare, gjeografike, politike apo ngjyre të lëkurës, atëherë realisht mund të themi se në Shqipëri aparteidi ndaj të rinjve po bëhet mbi bazën e vlerave.

Indriti, Ergysi, Arditi, Elanda e Adela kërkonin meritokraci, konkurrencë të lirë e shance të barabarta. Ata kërkonin një ekonomi mundësishë, një shtet ligjor, një shoqëri që t’u jepte hapësirë rritjeje, zhvillimi e lartësimi. Por në vend të këtyre, Shqipëria i dha vdekjen. Ky është aparteidi kriminal ndaj rinisë shqiptare !

LEXO TE PLOTE

Opinione

Paralajmërimin “bombë” i Spartak Ngjelës/ Këta tre politikanë do të fundosen së shpejti

Publikuar

-

Nga

Gjendja e pas – tërmetit të 26 nëntorit është e rënde. Shumë e rëndë. Madje, po të ecet kështu, ajo do të rëndohet edhe më shumë ekonomikisht për shqiptarët.

Qeveria shqiptare as ka para, dhe as nuk po gjen dot para. Por, ajo është edhe jashtë karakterit profesional të një qeverie. Kurse Rama po i lutet Turqisë dhe Erdoganit, që të shpëtojë nga goditja penale.(!)

Ky kryeministër dhe kjo qeveri duhet të largohen se nuk pranohen si individë nga Perëndimi, por edhe mazhoranca duhet të nxjerrë domosdoshmërisht një kryeministër të pakorruptuar dhe të pranuar nga Uashingtoni e Brukseli, por, një qeveri me karakter të theksuar profesional. Ky akt tani është imperativi i kohës për Shqipërinë.

l.
Askush nga shtetet e mëdha nuk po i jep sot para si ndihmë Shqipërisë.
Pse?
Sepse qeverinë Rama e kanë në listë si të korruptuar. Kjo është arsyeja. Por ky është edhe shkaku. Dhe kanë të drejtë. Kur gjithë Perëndimi të akuzon për korrupsion, dhe kur vendi i dërmuar nga një periudhë dymbëdhjetëditore tërmetesh që po zgjat, ka nevojë për ndihma në para, kryeministri duhet të japë dorëheqjen. Kjo duhet të ndodhë sepse, fakti real i mospranimit moral të Ramës nga Perendimi, e dëmton rëndë edhe Shqipërinë, edhe shqiptarët.

ll.
Pse nuk jep dorëheqjen kryeministri Rama, mos ndoshta ka në mendje idenë e ligë të Luigjit të XV-të, a près moi la déluge? (mbas meje qameti)
Apo ndoshta këtë tjetrën e Luigjit të XIV – L’etat c’est moi. (Shtetit jam unë). Sepse po kuptohet që mediokriteti i tij, në këtë formim e ka ndërtuar këtë kryeministër.

Nëse Rama ecën kështu, do të shkojë shumë thellë kundër vetes, sepse destabilizimin e Shqipërisë nuk e lejon Uashingtoni dhe as Berlini.
E vetmja rrugë për të është dorëheqja, që të lejojë frymëmarrjen e Shqipërisë.

Kjo është arsyeja politike dhe historike e këtij Çasti Historik me rrezik të jashtëzakonshëm për Shqipërinë dhe për shqiptarët. Por, ky është edhe kushti i nënkuptuar i politikës së lartë perëndimore.

LEXO EDHE:  Luli lë Metën të vetëm në betejë

LEXO EDHE:  “Kushtetuesja”/ PD i përgjigjet ashpër Xhafajt: Vëllai i Geronit kërkon një person që betohet tek zyra e tij

lll.
Mafia e ndërtimit tani u kap. Por, bashkë me të, janë kapur dhe tre kryeministra: Rama Berisha, Meta.

Të tre, kot e kanë që bashkohen. Nuk shpëtojnë dot nga kontrolli apo nga akuza penale, sepse për t’u pasuruar familjarisht me mafien shqiptare të ndërtimit, krijuan krimin më të shëmtuar në historinë e shtetit shqiptar: vranë shqiptarit e pafajshëm, dëmtuan shqiptarët e varfër dhe i krijuan Shqipërisë disa miliardë euro dëm.
Hetimi penal është domosdoshmëri, dhe ai duhet t’i ndëshkojë të gjithë: ndërtuesit mafiozë, dhe pushtetarët e korruptuar.
Kurse Rama shkon të lypë në Turqi me syret e Kuranit. Kaq i lehtë mendërisht është ky kryeministër shkatërrues vlerash kombëtare!!!
Po Erdogani, nuk do pyesë: pse nuk po i afrohet Perëndimi qeverisë Rama? Nuk e di Erdogani që autorët e kësaj tragjedie shqiptare janë të korruptuarit e mëdhenj të Shqipërisë?

lV.
Këta të korruptuar krijuan në fakt një kohë të ligë: pasi iu grabitën shqiptarëve të varfër 10 miliardë euro me korrupsion, i dëmtuan tragjikisht edhe me miliarda të tjetëra në tërmetin e 26 nëntorit.
Drejtësia duhet të jetë me qëndrim drastik kundrejt tyre.

Politika amerikane duhet të ringjallë në këto çaste drejtësinë shqiptare për të ndëshkuar këtë krim kaq mafioz në Shqipëri. Por duhet të denoncojë edhe miliardat e dollarëve që iu ka gjetur pushtetarëve shqiptarë nëpër bankat e zonave ofshore.

Kjo ishte tragjedi kombëtare, por, po të fillojë këtu goditja penale e drejtësisë së re, drejtuar nga politika amerikane dhe ajo e Bashkimit Europian, historia e Shqipërisë do të hyjë realisht në rrjedhën e moralitetit shtetëror dhe prosperitet shoqëror.

Po Turqia, aty ku po përqëndrohet tani Rama, çfarë do të bëjë me krimin shqiptar?
Presidenti turk Erdogan duhet t’i kujtojë Ramës ndëshkimin penal drastik që u bë në Turqi pas tërmetit tragjik të saj.

Pa ndëshkimin e krimit të ndërtimit korruptiv, asgjë nuk arrihet dot për rimëkëmbjen e Shqipërisë.
Kjo është e vërteta e kësaj kohe tragjike në Shqipëri.

 

LEXO TE PLOTE