Avokati Spartak Ngjela ka përmendur emra, teksa foli për fajtorët e kësaj situate ku ndodhet vendi, pas tërmetit të 26 nëntorit.

Ngjela cilësoi si fajtorë ish-kryeministrin Sali Berisha, kryeministrin Edi Rama, presidentin Ilir Meta dhe kreun e opozitës Lulzim Bashën.

Sipas avokatit, i pari që e ka shkelur urdhrin dhe ligjin e ndërtimit në vijën bregdetare është Meta, ndërsa pretendon se Pandeli Majko ka respektuar ligjin.

“Fajtori kryesor është shteti. E ka bërë nga paaftësia apo nga korrupsioni kjo është çështje për t’u hetuar, por unë them se është bërë nga korrupsioni.

E patë se si ra një hotel, e di si thanë ishte pronari, burri dhe gruaja dhe ishte ndërtuar pa leje. Si nuk e di shteti këtë. Si mund të mos e dijë shteti se është ndërtuar një hotel pa leje.

Edhe qeveria në Meksikë ka pasur urdhër që nuk ndërtohej 170 metra larg nga deti, ka qenë edhe në kohën e Zogut, nuk lejohej atëherë të ndërtohej. I pari që e ka prishur duhet të ketë qenë Meta, Majko nuk e ka prishur dhe pastaj të gjithë u sulën si ujqër.

Përgjegjësit kryesorë janë Berisha, Rama , Meta dhe Basha. Unë di ç’thotë ligji, këta janë të akuzuarit dhe këta janë që nuk e pranojnë”, deklaroi Ngjela./ CNA.al

Kryetari i Partisë Demokratike, Lulzim Basha vizitoi sërish Durrësin, ku është ndalur të dëgjojë shqetësimet e qytetarëve.

Fillimisht Basha ishte në lagjen 17, ku me dhjetëra banorë, ishin të alarmuar, pasi pallati i tyre, i dëmtuar nga tërmeti, nuk ka akoma një vlerësim zyrtar, nëse është apo jo i banueshëm.

“Bashkërendohuni me pushtetin. Uluni, i lëmë ndasitë politike. Unë jam plotësisht dakord që jeni opozitë dhe keni frontet të ndara, keni vizionin tuaj”, u shpreh një prej banorëve të prekur nga tërmeti.

“Qeveria ka detyrat e veta, opozita ka detyrat e veta. Ju po e shikoni, ne vetëm luftë politike nuk po bëjmë. E rëndësishme është që ne të sjellim zërin dhe shqetësimet tuaja. Ky është roli ynë. Nëse ne e marrim zërin tuaj dhe e kthejmë në politikë për karrigen tonë, ne bëjmë gabim. Nëse ne çojmë shqetësimin tuaj atje, ne e kemi bërë detyrën tonë, sepse po nuk e bëmë ne, nuk ka kush ta bëjë.

Edhe po të ishim në role të ndryshme, ne në qeveri dhe ata në opozitë, këtë do kërkoja nga ata. Nuk do kërkoja të bëja fotografi bashkë. Do t’u kërkoja ‘merrni zërin e njerëzve na e sillni dhe shikoni si po e bëjmë ne punën” Se këtë detyrë ka opozita. Po u shkri opozita, nuk ka më kush t’ju mbrojë.

Çfarë kemi kërkuar: E para, që vlerësimi të bëhet sa më shpejt, në mënyrë profesionale Për këtë kemi këshilluar që të shtohet numri i inxhinierëve, përndryshe vlerësimi shtyhet, e shtyhet, e shtyhet…

E dyta, të caktohen fondet, sepse vlerësimi pa fonde është zero. Sot në mëngjes, kanë pranuar një sugjerim që ua kam dhënë gjatë tre ditëve të fundit: që banorëve të zonave rurale që janë me shtëpi, t’u japin para në dorë, ta bëjnë vetë. Sepse koha nuk pret, dimri sapo ka filluar. Çfarë do të bëni, do të rrini me muaj të tërë kështu? Nuk mund të ndodhë kjo”, u shpreh Basha nga Durrësi./CNA.al

Drejtori i Përgjithshëm i Policisë së Shteit, Ardi Veliu ka bërë me dije se mbi 4000 forca policie u angazhuan pas rënies së tërmetit të 26 nëntorit.

Sipas Veliut, efektivët e policisë janë përfshirë në operacionet e kërkim-shpëtimit, dhënia e ndihmës së parë për njerëzit që kishin nevojë, garantimin e rendit dhe sigurisë, disiplinimin e qarkullimit duke i dhënë përparësi qarkullimit të ambulancave dhe ekipeve të zjarrfikëseve si dhe sigurimin e pronës së qytetarëve dhe ruajtjen e objekteve të dëmtuara, për të mos lejuar futjen e banorëve për shkaqe sigurie.

Veliu ka shprehur falenderime për forcat special Renea, FNSH-të e Tiranës, Shkodrës e Fierit, Drejtoritë Vendore të Policisë Durrës ,Tiranë dhe Lezhë për profesionalizmin dhe ndjenjën e lartë të humanizmit duke rrezikuar edhe jetën e tyre, të cilët u përfshinë drejtpërdrejt të parët në operacionet e kërkim-shpëtimit.

“Falë ndërhyrjes së tyre, në bashkëpunim edhe me skuadrat e zjarrfikëseve dhe ushtrinë u shpëtuan 39 jetë njerëzish, që kishin mbetur poshtë rrënojave. Më pas, duke bashkëpunuar edhe me grupet speciale të vendeve mike, u bë i mundur edhe shpëtimi i disa personave të tjerë. Forcat Renea dhe FNSH-ja në kushte të vështira dhe të rrezikshme për sigurinë e jetës së tyre vijuan operacionet për nxjerrjen e trupave nga rrënojat dhe për këtë ata sot meritojnë mirënjohjen dhe respektin e gjithë organizatës së Policisë, por edhe të gjithë qytetarëve”, u shpreh Veliu.

Më tej Veliu bëri me dije se punonjësite policisë kontibuan me vullnet sipas mundësive duke bërë të mundur mbledhjen e shumës 104 milion e 350 mijë lekë, e cila u depozitua ne platformën e-Albania.

“Me këtë rast, duke përfituar nga ky komunikim publik, dua të falënderoj një për një, të gjithë punonjësit e Policisë, por edhe familjet e tyre që kontribuuan me vullnet sipas mundësive duke bërë të mundur mbledhjen e shumës 104 milion e 350 mijë lekë, e cila u depozitua ne platformën e-Albania. Mirëkuptoj edhe 2016 punonjësit e Policisë që nuk kanë kontribuuar me vlera monetare, pasi nuk kanë pasur mundësi”, tha Veliu në një konferencë për shtyp./CNA.al