Connect with Us

Prova të reja me raketa të Koresë së Veriut

Bota

Prova të reja me raketa të Koresë së Veriut

Publikuar

-

Koreja e Veriut ka kryer një tjetër provë me raketa balistike, duke shkelur një premtim bërë presidentit amerikan, Donald Trump, se do të përmbahet nga provat e tilla pas përfundimit të ushtrimeve ushtarake amerikane-koreane.

Presidenti Trump, megjithatë, tha se nuk i sheh provat e fundit të Koresë së Veriut si “shkelje të zotimit”. Para se të largohej nga Washingtoni për të marrë pjesë në takimin e G-7-tës në Francë, presidenti amerikan tha se udhëheqësi i Koresë së Veriut Kim Jong Un “ka qenë shumë i drejtpërdrejtë me mua… Atij i pëlqen të provojë raketat, por ne nuk kemi kufizuar kurrë raketat me rreze të shkurtër veprimi”.

Qeveria japoneze raportoi herët të shtunën për provat me raketa. Ushtria e Koresë së Jugut konfirmoi provat disa minuta më vonë, duke thënë se Koreja e Veriut hodhi raketat nga krahina e Hamgyongut jugor në bregdetin e saj lindor.

Sipas një deklarate të Shtatmadhorisë së Koresë së Jugut, raketat që vlerësohet të jenë “me rreze të shkurtër veprimi” fluturuan rreth 380 kilometra, duke arritur një lartësi prej 97 kilometrash dhe një shpejtësi prej 6.5 Machës, (1 mach është i barabartë me 1225 kilometra në orë).

Një zyrtar i lartë amerikan i tha Zërit të Amerikës se Shtetet e Bashkuara i dinë njoftimet “për prova raketore të Koresë së Veriut dhe po e ndjekin situatën. Ne këshillohemi ngushtë me aleatët tanë japonezë dhe jugkorean”, tha ai.

Pas një takimi emergjent, Këshilli i Sigurisë Kombëtare të Koresë së Jugut shfaqi “shqetësimin” për vazhdimin e provave nga Koreja e Veriut, pavarësisht përfundimit të ushtrimeve ushtarake ndërmjet Shteteve të Bashkuara dhe Koresë së Jugut./ VOA

KLIKO PER TE KOMENTUAR

Komentoni

Your email address will not be published. Required fields are marked *

Bota

25 vjet pas mbytjes së tragetit Estonia/ Tragjedia që iu mori jetën 852 personave 

Publikuar

-

Nga

Para 25 vjetësh u mbyt në Detin Baltik trageti “Estonia”. 852 vetë humbën jetën. Tragjedia më e rëndë detare në Europën e pas luftës ende nuk është zbardhur plotësisht.

Mbytja e “Estonias” më 28 shtator 1994 konsiderohet si tragjedia më e madhe detare në historinë europiane të pasluftës. Rrugës nga Estonia për në Suedi trageti hasi në stuhi në Detin Baltik. Kapaku i bashit të anijes u ça, uji vërshoi në kuvertë dhe brenda pak minutash anija u fundos duke marrë me vete në thellësi të detit 852 vetë, që humbën jetën, ndër ta 501 suedezë dhe 284 estonezë.

Një përgjegjës apo fajtor për fundosjen e tragetit nuk u gjet. Mos vallë kapiteni pati udhëtuar me shpejtësi të lartë në stuhi? Mos vallë anija ishte e papërshtatshme për t’i bërë ballë detit Baltik të trazuar? Të mbijetuarit dhe të afërmit e viktimave ngritën padi më 1996 duke kërkuar dëmshpërblim prej kantierit detar Meyer në Papenburg, që e kishin konstruktuar këtë anije si dhe Shoqatës franceze të Kontrollit Teknik Bureau Veritas, që i kishin dhënë licencën e lundrimit tragetit „Estonia. Para një gjykate në Nanterre pranë Parisit 1.100 paditës kërkojnë 41 milionë Euro dëmshpërblim. Në korrik kërkesa e tyre u hodh poshtë.

Kent Härstedt është 54 vjeç, socialdemokrat që në rininë e tij, politikan dhe diplomat. Në vitin 1995 ai shkroi një libër për ngjarjet në Estonia („Det som inte kunde ske” – Ajo që nuk duhej të kishte ndodhur kurrë). Ai ka thotë, se „atë natë nuk do ta harroj kurrë”, Kujtimi mund të të rikthehet papritur, thotë ai. Sa herë Kent Härstedt është në ujë i ndodh kjo. E kësisoj ai kthehet sërish në vitin 1994, si pasagjer në tragetin Estonia, që lundronte nga Talini për në Stockholm. Eshtë 28 shtator.

Në orën 01.22 kapiteni i Estoniasjep njësinjal emergjence. Anija ka hasur në stuhi të fortë, papritur çahet kapaku i bashit. Estonia brenda pak minutash mbushet me ujë dhe fillon të fundoset. Në këto çaste Kent Härstedt ndodhet në barin e tragetit. „Anija batoi në njërën anë. Ishte një shok i madh për ne të gjithë. Fillimisht ne të gjithë u përpoqëm të hidhemi prej anijes në ujë të ftohtë drejt atyre pak platformave të shpëtimit që ishin në dispozicion. Më pas na u desh të mbijetojmë në këta ishuj shpëtimi. Ata që të nesërmen ende ishin gjallë u shpëtuan nga një helikopter. Në këtë moment shumica prej nesh në ishullin e shpëtimit ishin pothuajse të ngrirë. Nga 20 vetë vetëm gjashtë jetonim ende.”

852 njerëz të mbytur, emrat e të cilëve janë skalitur sot në një monument përkujtimor. Emra njerëzish nga një duzinë vendesh. Kjo është katastrofa më e madhe detare në Europë përgjatë shekullit të kaluar.

Henning Witte

Hetime jo të plota

Një hetim në vitin 1997 rezulton, se parametrat e mbylljes së kapakut të bashit të anijes kanë qenë mjaft të dobët. Rregullat e sigurisë për tragetet e Detit Baltik tashmë janë forcuar, por nxjerrja e gërmadhës së anijes nuk është bërë.

Ky ishte gabim, mendon Henning Witte. Avokati gjermano-suedez e ka të vështirë të shkëputet prej rastit Estonia edhe gjatë kohës së lirë. Witte ka mbrojtur të afërmit e viktimave në gjykatë dhe ka hulumtuar edhe vet për rastin. Ai i konsideron të pamjaftueshme hetimet e kryera deri tani në gërmadhën e anijes. „Platforma e bashit që çahet, uji vërshon në kuvertë, batim në anën e timonit dhe Estonia fundoset. Në një rast të tillë  natyrisht duhet ta dish, se si qëndron puna me hambarin e makinave: A kanë qenë kamionët të lidhur mirë? Por mungojnë filmime zyrtare të pjesës së brendshme të hambarit të automjeteve. Ne themi, se duhet të bëhen sërish zhytje për të hetuar, pavarësisht që ka kaluar shumë kohë.”

Pas kapakut të bashit mungonte izolimi hermetik ndaj ujit. Megjithatë as kantieri gjerman dhe as kontrolli teknik francez nuk e kanë marrë përgjegjësinë, ankohet avokati. „Platforma e ngritur konsiderohej si hermetike ndaj ujit. Por kjo mund të vlente për një qarkullim përgjatë bregdetit e jo në det të hapur. Në këtë rast Bureau Veritas duhej të kishte reguar me një Stop! Me këtë parametër anija nuk është e aftë për të dalë në det të hapur, përpara daljes në det do duhej vendosur shtresa izoluese.”

Por kolegët e Wittes dështuan këtë verë sërish para gjykatës franceze me kërkesën për dëmshpërblim prej shoqatës së kontrollit teknik të anijes. Ata në emër të më shumë se 1000 të mbijetuarve dhe të afërmve të viktimave patën kërkuar rreth 40 milionë Euro dëmshpërblim.

Për Kent Härstedt paraja nuk është kaq e rëndësishme se sa e vërteta për katstrofën e Estonias. I mbijetuari, prej shumë vjetësh deputet në parlamentin suedez, rrëfen për hamendësime, se një bombë e pat shkaktuar fundosjen e anije, e vendosur nga shërbime sekrete apo terroristë. Ai apelon: „Le të kërkojmë një herë bashkarisht me themel. Kjo mund të ndihmonte edhe për t’u dhënë fund teorive të komplotit. Për një shoqëri demokratike nuk është mirë, kur përhapen të tilla dyshime. Unë besoj, që një hetim i mirëfilltë do të ishte mirë për të gjithë ne.”

Ai mendon se me këtë do të vendosej drejtësia edhe kundrejt 852 vetëve, që humbën jetën atë ditë shtatori para 25 vjetësh në Detin Baltik./ DW

LEXO TE PLOTE

Blog

Fenomeni i Llazarit/ Kur “të vdekurit” rikthehen në jetë

Publikuar

-

Nga

Zemra e saj kishte pushuar së rrahuri, dhe ajo nuk po merrte më frymë. Janina Kolkievic u shpall e vdekur. 91-vjeçarja kishte pasur një jetë të gjatë. Por jeta e saj nuk do të mbaronte aty. Njëmbëdhjetë orë më vonë, ajo u zgjua në morgun e spitalit, duke kërkuar çaj dhe kek.

Sado e pabesueshme që mund të duket, Kolkievic është vetëm një nga shumë njerëzit, për të cilët thuhet se “u rikthyen nga bota e përtejme”. Në fakt, ka pasur jo pak raste kur shenjat jetësore të pacientëve, janë rikthyer pasi ata janë shpallur të vdekur.

Në vitin 2001, një burrë 66-vjeçar përjetoi një atak kardiak, teksa po i nënshtrohej një operacioni në bark. Pas 17 minutash tentativash për të risjellë në jetë, përfshirë goditjet në gjoks me elektroshok, shenjat jetësore nuk arritën të ktheheshin, dhe pacienti u shpall i vdekur. Dhjetë minuta më vonë, kirurgu ndjeu befas pulsin e tij. Ai ishte gjallë.

Operacioni në bark vazhdoi, dhe u mbyll me sukses. Në vitin 2014, një 78-vjeçar nga Misisipi në SHBA, u shpall i vdekur pasi një infermiere pa se ai nuk kishte më puls. Të nesërmen, ai u zgjua brenda një qeseje plastike në morg. Këto janë padyshim histori të jashtëzakonshme, që tingëllojnë të denja për një film horror.

Por në botën reale ekziston një emër për raste të tilla:Sindromi i Llazarit. Fenomeni ose Sindromi i Llazarit, përcaktohet si një rikthim i vonuar i rrahjeve të zemrës. Kjo dukuri mban emrin e Llazarit të Betanisë, që sipas Dhjatës së Re u ringjall nga Jezu Krishti 4 ditë pas vdekjes së tij. Që nga viti 1982, kur Fenomeni i Llazarit u përshkrua për herë të parë në literaturën mjekësore, ka pasur të paktën 38 raste të raportuara. Sipas një raporti të vitit 2007 nga Vedamurti Adhijaman dhe kolegët e tij, në rreth 82 përqind të rasteve të kësaj Sindrome, rikthimi i aktivitetit kardiovaskular ka ndodhur brenda 10 minutave nga ndalimi i rrahjeve të zemrës, dhe rreth 45 përqind të pacientëve kanë pasur një rimëkëmbje të mirë neurologjike.

Por ndërsa numri i ulët i rasteve, duket se nxjerr në pah rrallësinë e Sindromës së Llazarit, shkencëtarët besojnë se ajo është shumë më e zakonshme nga sa sugjerojnë studimet.

“Fenomeni i Llazarit, është një ngjarje e shpeshtë”-vëren kirurgu Vaibhav Sahni, në një raport të vitit 2016 . “Një çështje e rëndësishme, është nëse vdekja e një pacienti të veçantë, ka ndodhur si rezultat i ndërprerjes së parakohshme të përpjekjeve të reanimimit”- thekson ai.

Se çfarë e shkakton këtë fenomen mbetet ende e paqartë, por ka disa teori. Disa studiues sugjerojnë që Fenomeni i Llazarit, mund të shkaktohet nga një ngritje e presionit në gjoks të shkaktuar nga defribilatori. Pasi ndërpriten goditjet me të, presioni mund të largohet gradualisht, duke nxitur rifunksionimin e zemrës. Një teori tjetër, është veprimi i vonuar i ilaçeve të përdorura si pjesë e përpjekjeve të reanimimit, siç është adrenalina.

“Ka të ngjarë që ilaçet e injektuara nëpërmjet një vene periferike, të shpërndahen në mënyrë të pamjaftueshme, për shkak të pengesës nga vena e dëmtuar. Dhe kur qakullimi përmirësohet, shpërndarja e barnave mund të kontribuojë në rikthimin e qarkullimit të gjakut”- shpjegojnë Adhijaman dhe kolegët e tij.

Hiperkalemia, niveli shumë i lartë i kaliumit në gjak, është një shpjegim tjetër që propozohet për Fenomenin  e Llazarit. Por ndoshta arsyeja kryesore është shpallja gabimisht të vdekur e një personi. Si është e mundur kjo? Ekzistojnë dy lloje vdekjesh:ajo klinike dhe biologjike.

Vdekja klinike përcaktohet si mungesë e pulsit, e rrahjeve të zemre dhe frymëmarrjes, ndërsa vdekja biologjike përcaktohet si mungesë e aktivitetit të trurit. Në bazë të tyre, mund të supozohet se përcaktimi është i thjeshtë.

Në fakt jo. Ekzistojnë disa kushte mjekësore, që mund ta bëjnë një individ të “duket” i vdekur.

Një gjendje e tillë është hipotermia, kur trupi pëson një rënie të papritur të temperaturës, gjë sqë  shkaktohet zakonisht nga ekspozimi i zgjatur ndaj të ftohtit. Katalepsia dhe sindroma e paralizës, janë shembuj të kushteve të tjera.

Katalepsia karakterizohet nga një gjendje e ngjashme me ekstazën, me një frymëmarrje të ngadalësuar, ndjeshmëri të zvogëluar dhe palëvizshmëri të plotë, që mund të zgjasë nga disa minuta në disa javë. Kjo gjendje, mund të shfaqet si simptomë e çrregullimeve neurologjike si epilepsia dhe sëmundja e Parkinsonit. Ndërkohë tek “sindroma e paralizës”, një pacient është i vetëdijshëm për gjendjen e tij, por ai pëson paralizë të plotë të muskujve, me përjashtim vetëm të muskujve që kontrollojnë lëvizjen e syve./ Përshtatur nga CNA.al

LEXO TE PLOTE

Kosova & Rajoni

“Na mbante të dyja në krevat”/ Gruaja tregon tmerret që përjetoi nga dhuna e bashkëshortit

Publikuar

-

Gruaja e rrahur dhe keqtrajtuar nga burri që mban njëherësh edhe një grua tjetër, tregon tmerrin që ka jetuar. Një shtëpi në një fshat të largët të komunës së Istogut zhurmon nga zërat e fëmijeve që jetojnë aty.

Sipas “RTK”, zërat e tyre në rrethana normale paraqesin jetë dhe harmoni, por jeta e tyre aty është në mesin e zhurmes, stresit e dhunës familjare.

Shpresa, nuk është emri i vërtetë i viktimes, por për shkak mos zbulimit të identitet të saj, ne do ta quajmë kështu.

Ajo është një grua e re, në të 30-tat, por që fytyra e saj duket si të ishte shumë vite më në moshë. Kjo si shkak i jetës së rëndë e dhunës që ka përjetuar nga burri që do të duhej ta dojë e të pëkujdeset për të.

“Në fillim i kemi pas raportet shumë të mira, kemi kalu shumë mirë, por pas dy viteve, ja nisi dhunë kapak, por e kam përballu…. Ja nisi fjalë, ja nisi të rrehme”.

Por përvëc dhunes dhe keqtrajtimit fizik që Shpresa ka përjetuar për tri vite martesë, burri i saj kishe vendosur që të martohej edhe njëherë, dhe të jetonte me dy gra në një shtëpi.

“Ai sna i ka nda as dhomat, me një dhomë dy grate,, në një shtrat kemi flejt te dyja. Ka ndodh nese është kanë me mu tub o dicka, ajo u cu e ka kap… ajo se ka pas dertin”.

Një jetesë e tillë për Shpresen kishte vazhduar për 13 vite martesë. E në mesin e një dhune të tillë psiqike, ajo ka përjetuar edhe dhunë fizike shumë të rëndë.

“Burrit i humbën 10 euro, ja mori dikush, edhe ai ja nisi mem fajsu mu që unë ja kam marë, edhe me tha unë po shkoj dikun edhe kur të kthehna i du paret, unë se kisha iden ku kanë mbet ato pare”.

Por humbja e 10 euro e kishte shtyer atë që kur të kthehej në shtëpi, para mesnatës të ushtronte dhunë në forma të ndryshme në Shpresen.

“I tha grus shko mere hunin (durin) që i mbyllshum dyert me të edhe ja ka nis mem rreh, unë vajzën e kisha vetëm 3 javshe, hala isha lehone… ai ja ka nis mem rreh”

“Grues tjetër ja lypke mjetet, ja lypke thiken ja lypke goten… me thikë ma shtypke fytin krejt me shenja e kam pas, mi ka pre flokt… goten ma ka thy n’kry, krejt te qame e kom pas edhe mka mlu gjaku”.

Ajo rrëfen se pas disa orëve të dhunes më në fund e kishe lënë, duke e detyruar të pastrohej me ujë të ftoft.

“Neser u zgju si mos me pas ndodh sen, edhe me ka detyru me u qu me i kry krejt puntë… unë isha e ajne komplet, doren se nijsha, nofulla krejt mu aj, kryt veq me qitke gjak smu nalke, ai qashtu me tha qu tash me i pre durt”.

Në mesin e dhimbjeve të tmerrshme që Shpresa thot se kishe pëjetuar, ajo e kishe lënë shtëpinë, duke ecur gjatë gjithë dites në male e fusha, për tu fshehur që të arrinte në mbrëmje në Stacionin Policore, më të afërmin që e kishte.

Aty ajo kishte rrëfyer për dhunen, ku nga trajtimi i mjekut, kishte rezultuar që e kishte njërën dorë të thyer, koken e prerë e edhe shumë lëndime të tjera.

Për këtë dhunë burri i sja ishte mbajtur në paraburgim vetëm dy javë, kun ë të njejten kohe edhe Shpresa ishte strehuar në një shtëpi të sigurt.

Por, mos përkrahja e familjes se Shpreses, dhe 4 fëmijet që ajo kishte e kishin detyruar që të kthehej përsëri tek burri, dhe të tërhiqte deklaratën e saj në Gjykatë.

Por pasi kishin kaluar 3 vite, ajo prap ishte kthyer në strehimore, kësaj here, pas kërcënimeve që kishte marrë nga burri i saj, i cili edhe e kishte rrah gruan tjetër.

Kësaj here burri i tyre kishte qëndruar në burg vetëm disa ditë, ndërsa njëra grua kishte qendruar dy javë në strehimore, e Shpresa një muaj.

Burri i saj, kishte arritur që prap, me ndërmjetësimine Qendres për Punë Sociale dhe të familjes së saj, ta bindte që të kthehej në shtëpi, kësaj here për të qendruar vetëm dy javë.

Pas dy jave prap kishte ushtruar dhunë ndaj Shpreses.

“Shkova nalt, hyna në dhomë erdh edhe ajo tjetra edhe ja ka nis me na rreh të dyajave… knej e kam pas katastrof, dhëmbin ma thej, dhëmballen, një jave ditë unë kam hjek edhe pasi që kam ardh këtu (Strehimore), prej dhimbjës së dhëmbit”.

Pas dhunes që kishte përjetuar Shpresa kishte ikur nga shtëpia e burrit, duke ecur në male për të arritur në Polici.

Shpresa tani është e strehuar në Strehimore, por ajo asnjërin nga fëmijet e saj nuk e ka me vete.

Bashkëshorti i viktimes është i njohur për Komunen e Istogut e gjithashtu edhe për organet e rendit.

Një dhunë të tillë, fizike e psikologjike ndaj dy bashkëshorteve të tij, e konfirmon edhe Mbrojtësja e viktimave në rajonin e Pejës.

“Bashkëshortja e parë e ka raportu rastin në Polici, me 02.06.2015, herën e dytë e ka raportu me 05.06.2019 .. Për rastin e parë ka qenë dhunë në familje dhe lëndime të lehta trupor, ka pas lëndime doren e thyme flok te kputa prej burrit, e lëndime u kanë edhe në pjesën e krahrorit të djatht edhe ka qenë e mavijosne në fytyrë edhe është kanë e friksuar ka qenë në stress dicka të pa besueshëm”, e tregon edhe Mbrojtësja e Viktimave në rajonin e Pejës , Saime Syla.

Ajo tregon se si edhe bashkëshortja tjetër me 21 prill të këtij viti e ka paraqit rastin në Polici.

“Është kan e shqetësume, është rrah në mënyra të ndryshme”.

Qendra për Punë Sociale në komunë të Istogut, përveq që janë në njohuri për dhunën e ushtruar nga ky përson e pranojnë që në atë familje ka edhe dhunë psiqike shumë të rëndë.
“Ka pas shumë lëndime të rënda, doren e thyme, koken e qame fytin e mavijosur, flok te shkuluna, rast me të rënd kurr nuk kemi pa”, tregon Myrverte Verbaj, udhëheqëse e Shërbimeve Sociale në Istog.

Ajo tregon se në atë familje gjendja është mjaft e rëndë, dhe jetesa aty nuk është në standarte të normales.

“ Gjendja është teper e rëndë, paramendoni një familje me kushte të mira ekonomike, ku një burr I ka dy gra cfar familje mund të jetë, aty ka problem aty ka gjelozi, ka dhunë psikologjike e edhe fizike, ka shumë fëmijë, te dyja gratë flejnë në një shtrat me burrin”.

Burri i Shpresës nuk është vetëm ushtues i dhunës në familje, ai për Policinë e Kosovës është i njohur edhe për shumë vepra të tjera penale.

“Kemi të bëjmë me një person që është recidivist i shumë veprave penale, i njëjti në sistemin informative të Policisë së Kosvës është i njoher për një numër të konsiderueshëm të veprave penale prej të cilave tri nderlidhen me dhunë në familje… Dy raste të dhunës në familje ndërlidhen me viktimen gruan e parë ndërsa një rast ndërlidhet me gruan e dytë me të cilen ai bashkjeton”, thotë Arsim Shala, kapiten në Policinë e Kosovës.

Identiteti burrit të viktimes është i njohur për redaksinë, por ai nuk do të publikohet për shkak të siguris së viktimave.

Ky person, në bazë të dhënave që na ka dorëzuar Prokuroria Themelore ne Pejë, ka të ngritura 11 aktakuza dhe 13 kallëzime penale. aktakuzat janë për vepra të ndryshme penale.

Ai i ka 5 aktakuza për veprat penale Vjedhje si dhe Vjedhje të rëndë, 1 aktakuzë për asgjësim apo dëmtimi i pasurisë, 2 aktakuza për veprën penale Dhunë në familje, 1 aktakuzë për veprën penale Lidhje e paautorizuar e shërbimeve publike.

Ndërsa në Departamentin e Krimeve të Rënda, ndaj të pandehurit janë ngritur tri aktakuza, 2 aktakuza për veprën penale armëmbajtje pa leje dhe 1 aktakuzë për veprën penale Shkaktim i rrezikut të përgjithshëm.

Për prokurorin në Pejë ai është mjaft I njohur dhe për dhunë të ushtruar ndaj grave të tij.

“Deri me tani kemi 2 aktakuza për dhunë në familje, aktakuza e fundit është ngritur me datën 14 gusht të këtij viti dhe rastin tjetër e kemi në prill të këtij viti nga bashkëshortja e tij, ndërsa rastin tjeter e kemi në vitin 2015 nëse nuk gaboj nga vëllau I vet I cili ka qenë viktimë e rastit, për këto dy raste është ngritur aktakuza dhe të njejtat janë procesuar në gjykatat kompetente. për rastin e fundit janë duke u ndërmarrë të gjitha veprimet e nevojshme dhe në bazë të provave dhe materialeve do të veprojë edhe prokurori I shtetit”, tha Shkodran Nikçi, zedhënës i Prokurorisë në Themelore në Pejë.

Gjykatën Themelore të Pejës, përmes emailit i ka thënë emisionit UDHËVE, që ky person është gjykuar disa herë në Gjykatën e Pejës, por asnjëhërë ai nuk ka vuajtur denim me burg, pasi që të gjitha denimet janë vetëm dënime me kusht.

Në Gjykaten Themelore Pejë, Dega Deçan është zhvilluar procedur penale për veper penale vjedhje e mbetur në tentativë ,dhe është gjykuar më denim me burgim prej 6 muaj më kusht ne afat për nje viti . Aktgjykimi e ka marë formen e prerë më dt 31.05.2019, ka thënë Tringa Zhuti, zëdhënëse e Gjykatës Themelore në Pejë.

Për lënden penale është nxierr aktgjykim denues për vepra penale të vjedhjes ose rëndë dhe është shqiptuar denimi unik me burgim 2 vite me kushte për 3 vite, po ashtu për pjesen tjeter të veprave penale është nxierr aktgjykim refuzus pas qe është terheq prokurori.

Për lënden penale Vjedhje e rëndë, me aktvendimin të datës 30.06.2015,është hudh aktakuza për shkak të parashkrimit relative të ndjekjes penale.

Por, bashkëshorti i Shpreses, dhunë kishte ushtruar edhe ndaj vëllaut të tij, të cilit sipas arsyetimit të Gjykatës, i ka shkaktuar lëndime të të lehta trupore, dhe për këtë gjë, ai është denuar me kush prej 3 muajsh, por që, nëse një vepër e tillë nuk përsëritet brenda një viti ai atëherë nuk do ta vuajë denimin.

Një rrahje e tillë kishte ndodhur në muajin shtator të vitit 2014.

Por, pa u mbushur një vit, në qershor të vitit 2015, ai kishte ushtruar dhunë përsëri, këtë herë ndaj bashkëshortës së tij, SHPRESES. Ai për një gjë të tillë ka vuajtur denim vetëm 21 ditë, pasi që dënimi i shqiptuar me burg prej 3 muajsh ishte zëvendësuar me denim me gjobë prej 400 euro .

Në arsyetimin e aktakuzes së Prokurorisë Themelore në Pejë, të ngritur me datën 21.08 2015, ishte cekur se i pandehuri vazhdimisht ushtron dhunë si fizike ashtu edhe psiqike ndaj të dëmutarës.

Por kishte mjafuar ndryshimi i deklaratës së viktimës, e cila kishte thënë se do të shkonte të jetonte me burrin përsëri, dhe prokurori i çështjes i ishte drejtuar Gjykatës që të pandehurit t’i ndërpritej paraburgimi.

Në bazë të kësaj Gjykata do të vepronte në bazë të veprës penale Lëndim i Lehtë truporë dhe do të mjaftohej me denimin prej 3 muajsh me kusht, të cilën madje e kthen në gjobë prej 400 eurosh, pavarësisht se përsëritjen e vepres penale e kishte konsideruar si rrethanë rënduese.

Në vitin 2014 gjithashtu i pandehuri ishte denuar më kusht për shkak të përdorimir të armës apo mjetit të rrezikshëm, ku kishte përdorur armë gjatë një ahengu familjarë.

Ai vetëm brenda një viti, kishte shkaktuar 3 vepra të ndryshme penale, dy të lëndimit truporë, dhe një për armmbajtje pa leje. Edhe pse nga ana e të pandehurit ishte shkelur dënimi me kusht ai asnjëherë nuk e ka mbajtur denim efektiv.

Deri tani të gjitha lëndët kanë përfunduar me vendim përfundimtar përveç një Aktakuze që është ngritur në muajin gusht të vitit 2019 për të cilën ende nuk është caktuar seanca fillestare, ka thënë Tringa Zhuti, zëdhënëse e Gjykatës Themelore në Pejë.

Ajo ka thënë se të gjitha Aktgjykimet ndaj të pandehurit kanë marrë formën e prerë. Ndërsa deri më tani kemi dy raste të dhunës në familje për të cilët Zyra për Mbrojtjen e Viktimave në Gjykatë ka dorëzuar dy Kërkesa për lëshimin e urdhrit mbrojtës megjithatë në seancë pala e mbrojtur (viktima), në të dy rastet është tërhequr nga kërkesa për lëshimin e urdhrit mbrojtës.

“I pandehuri nuk ka vuajtur denim për dhunën e kryer ndaj bashkëshorteve me të cilat bashkjeton për shkak se Ligji për mbrojtjen nga dhuna në familje nuk parasheh shqiptimin e dënimit për kryesin e dhunës por vetë caktimin e urdhrit mbrojtës ( referojuni Ligjit nr. 03/L-182 për Mbrojtje nga Dhuna në Familje), dënimi mund të shqiptohet në procedurë penale vetëm në rastet kur kryesi i dhunës e shkel Urdhrin Mbrojtës të caktuar nga gjykata”.

Gjykata Themelore në Pejë, asnjëherë nuk e ka dënuar të pandehurin me burg, duke e lënë të lirë me denime me kusht.

Për Kryesuesin e Këshillit Gjyqësorë të Kosovës rastet e dhunës në familje kur kemi të bëjmë me recidivistë të veprave penale, duhet të merren parasysh që të shqiptohet

Por shoqëria civile dhe rrjeti i grupit të grave mos veprimin më të ashpër nga ana e gjykatës Themelore në Pejë, si dhe të Prokurorisë e sheh dështim në mbrojte të viktikave të dhunës në familje.

“Këtu kemi një dështim të sistemit të drejtësis, ashtu e kisha përshkru në këtë rastë, dhe ka abuzim edhe të fëmijëve … Prokurori menjëherë do të duhej të reagonte plus edhe ky fakti na dekuroajon që disaherë është ushtruar dhuna është rast recidivist ku ka edhe lëndime të rënda trupore dhe prokuroria në këtë rajon nuk ka reagu, ndoshta ka ngritë ndonjë aktakuzë, por nuk po shohim që ka ndonjë zbatim të denimit adekuat, kemi denime me kusht, që nëse kemi recedivizem disa herë ajo është no sens”, thotë Ariana Qosaj.

Ndërsa për Ehat Miftarajn nga Institui i Kosovës për Drejtësi, një rast i tillë është neglizhencë e Prokurorisë dhe e Gjykatës kompetente.

“Kur kemi të bëjmë me individë të cilët kanë në më shumë se 10 aktakuza ose kallzime penale dhe kur rastet e këtyre perosnave marin kohë me vite për tu trajtuar nga këto institucione atëherë mos trajtimi adekuat i këtyre rasteve i bënë si prokurorët si gjyqtarët njejtë në fajtorë sikurse kryerësit e vepres penale në rast kur kemi të bëjmë me dhunë në familje. Viktimat e krimit përveqëse në njëfar mënyre po demtohen nga qytetarët ose kryerësit e veprave penale pastaj po demtohen dyfish edhe nga vet shteti. Ky shtet dhe system ligjorë që duhet të jep drejtësi, është kthyer në një vend që jep padrejtësi dhe është bërë kryerësi ose shkelësi më i madh i lirive dhe të drejtave të njeriut”.

LEXO TE PLOTE