Një debat i fortë ka filluar ditët e fundit brenda opozitës, në publik dhe në struktura. E gjitha lidhet me listën personale që Lulzim Basha ofroi te shqiptarët si alternativë përballë Edi Ramës, në zgjedhjet e 25 qershorit.

Lista mund të ketë shumë kontestime, mund të ketë edhe shumë vlerësime, por njerëzit debatojnë thjesht dhe vetëm për faktin “A duhet apo nuk duhet mbështetur Lulzim Basha me atë listë që paraqiti”.

Në fakt, thelbi i problemit nuk është vetë lista, është Lulzim Basha dhe kriteret apo standardet, që ai ka vendosur në përzgjedhjen e kadidatëve që ka vendosur. Pra, ai ka marrë një vendim, ashtu siç e deklaron dhe vetë, ka përjashtuar gjysmën e partisë nga lista. Por, nuk ka dhënë ende standardin që kishte vendosur. A ishte një standard përjashtimi nga lista e kandidimit i të gjithë ish-ministrave të qeverisë Berisha?

Në rast se do shikojmë listën nuk mund të themi “po”, sepse gjysma e qeverisë së djeshme ndodhet sërish në kandidim. Pra nuk ka pasur një standard të vendosur nga Basha.

Statuti i PD kërkon miratim të listës së kandidatëve nga Këshilli Kombëtar dhe minimalisht duhej të diskutohej në Kryesi. Edhe kjo nuk ka ndodhur. Pra kemi një tjetër standard të munguar, që Berisha ndoshta në shumicën e rasteve edhe formalisht kishte kurajo ta mblidhte Kryesinë dhe të vendoste qoftë edhe i vetëm në listë, por në prani të Kryesisë.

Një standard i tretë i munguar është minimalisht ndarja në mënyrë qytetare me personalitetet që largon nga karriera politike. Nuk ka asnjë telefonatë të vetme të Lulzim Bashës me ata që hiqte nga lista. Të paktën për t’i thirrur, për t’iu dhënë mendimin në sy dhe për të vendosur sërish një standard, që PD nuk i ka munguar.

Pra, këto tre detaje shumë të rëndësishëm, mungesa e komunikimit, përjashtimi pa mbledhur strukturat dhe standardi për t’u ndarë nga e shkuara, janë treguesit se Lulzim Basha thjesht dhe vetëm ka vepruar për të larguar ata që nuk i pëlqenin, që mund t’i zinin rrugën dhe këtë i vetëm apo në bashkëpunim me dikë tjetër ai e bëri dhe tashmë është fakt.

Pas standardeve, një pikë tjetër mjaft e rëndësishme janë kriteret e përdorura, këtë herë nuk po flasim për largimet, por për kandidimet e reja, pra kë largon dhe me cilat standarde, dhe kë zgjedh dhe me cilat kritere.

Ikin të vjetër dhe vijnë të rinj, është normale qarkullimi i elitave në politikë. Në rastin Basha iku gjysma e PD reale dhe erdhi gjysma e listës së tij familjare, por kjo nuk ka rëndësi se si do të shihet në publik. Rëndësi ka cilat ishin kriteret që Basha përdori për të vendosur të tijët.

Po të shohim listat, disa kryetarë degësh janë në zona fituese, disa në zona humbëse, të tjerë nuk janë fare. Diku riciklohen figura, diku vendosen të akuzuarit e qeverisë Berisha, diku tjetër futen disa të rinj pa asnjë kontribut. Mjafton një rast dhe një pyetje për Lulzim Bashën: Cili është kontributi i Klevis Balliut për demokratët e Pogradecit dhe pse ai duhet të ishte në listë fituese, përpara kreut të PD në Korçë? Cili është kriteri që ka vendosur për të rinjtë që do përfshinte në lista, në lidhje me vlerat, arsimin apo kontributet?

Në rast se kriteret e vendosura nga Basha kanë fytyrën e Fahri Balliut kjo do të ishte qesharake. Duke i parë të gjitha qarqet me radhë, në asnjë prej tyre nuk shikon të jetë ruajtur një parim. Diku mungojnë femrat, diku ka të futur të panjohur, diku kanë hyrë njerëz duke paguar, diku tjetër janë futur servilë pa peshë politike. Në lista mungon shumica e sekretariatit apo krerët e departamenteve.

Standarde nuk ka, kritere nuk ka, prandaj dhe ajo mund të quhet lista “Basha” dhe njerëzit nuk kanë pse debatojnë janë pro apo kundër partisë së tyre, tashmë që lista doli. Lulzim Basha nuk është PD-ja. Ai nuk ka paraqitur një listë, duke marrë vendime në konsultim me faktorë të rëndësishëm brenda partisë, me strukturat e saj, me Këshillin Kombëtar dhe Kryesinë. Lulzim Basha nuk ka vendosur kritere për emërimet e reja, por ka hequr me një firmë gjysmën e partisë dhe ka vendosur ata që i pëlqejnë atij personalisht.

Lista “Basha” nuk është lista e PD, ajo është lista e tij personale, ashtu siç e ka theksuar dhe në publik, jashtë çdo standardi, në mungesë të kritereve politike, në mungesë të pyetjes dhe vlerësimit nga strukturat e partisë.

Gjithmonë e më shumë po duket se baza ka një krisje dhe shkëputje me kryetarin e saj. Edhe media më e afërt e tij nuk e mbron dot atë lloj liste, sepse të gjithë tashmë e dinë: Ajo nuk është lista e PD, ajo është lista e Lulzim Bashës dhe Lulzim Basha nuk është PD-ja. Kjo thjesht dhe vetëm, sepse pa asnjë standard shpartalloi gjysmën e partisë dhe pa asnjë kriter emëroi pjesën tjetër për interesa familjare, korruptive dhe klienteliste. Prandaj, Lulzim Basha nuk është PD-ja. Lista e tij do tentojë të përfaqësojë PD./CityNews