E fundit!

22:57 Politikë

Rama, intervistë për BBC/ Kundërshton Albin Kurtin: SHBA dhe BE kanë të drejtë

Kryeministri Edi Rama ka komentuar situatën në veri të...

Letra e Ministres Nikolla/ Studentët: Përfaqësoni interesat e biznesmenëve

4 Maj 2015, 13:07, Aktualitet CNA

Studentët i janë përgjigjur ditën e sotme letrës së Ministres së Arsimit Lindita Nikolla. Ata mbajtën një qëndrim përpara Ministrisë së Arsimit dhe Sportit, i cili u shoqërua me aktin simbolik të kyçjes së derës së Ministrisë. Sipas tyre ky institucion nuk përfaqëson universitarët por interesat e biznesmenëve të diplomoreve private.

Ja përgjigjia e plotë e studentëve

“Drejtuar Ministrisë së Arsimit dhe Sporteve,
Ministres Lindita Nikolla.

Ky qëndrim studentor, nëpërmjet kësaj letre të hapur, vjen si përgjgje ndaj letrës publike drejtuar studentëve nga Ministrja e Arsimit znj.Lindita Nikolla, e cila e nervozuar dhe vënë në panik ripërsërit po të njëjtat të pavërteta të rënda në lidhje me reformimin e arsimit të lartë, për të cilat duhet të mbajë përgjegjësi publike.

Në letër, Ministrja thotë se kjo reformë, për sa i përket rritjes së tarifave hyn në fuqi jo për studentët aktualë por për ata që do të regjistrohen në universitet, dhe kjo është një gënjeshtër e madhe, pasi rritja e tarifave është realitet i çdovitshëm tashmë, ku edhe gjatë këtij viti u rritën me rreth 20%. Por edhe sikur kjo të mos ndodhte, ftesa për të heshtur përballë zhvatjes ekonomike ndaj brezit tjetër studentor, që u përket familjarëve, të afërmve dhe bashkëqytetarëve tanë, është skandaloze dhe korruptive.

Ministrja Nikolla thotë se kjo reformë do t?u japë të drejta studentëve brenda universitetit, dhe kjo është një tjetër gënjeshtër ulëritëse. Të drejtat që jep Ministrja, janë e drejta për të marrë borxhe dhe e drejta për të gënjyer në lidhje me cilësinë e universitetit, si mundësi për të marrë sa më pak borxhe, sepse kështu, duke gënjyer shteti do të japë disa qindarka më shumë për universitetin, duke gënjyer se do të marre disa të tilla me pak nga xhepat studentore.

Ministrja Nikolla thotë se do t?i japë pavarësi universitetit, pavarësi për t?u marrë vetë me mbijetesën dhe për të rritur tarifat sa e si të duan që të sigurojë mbijetesën në fjalë, pra liri për ta braktisur në mes të katër rrugëve dhe për të thelluar më tej zhvatjen studentore.

Ministrja thotë gënjeshtra kaq të mëdha, dhe bie kaq lehtë me këmbët e veta në këto kurthe që përpiqet të ngrejë për studentët, saqë kalimi nga njëra gënjeshtër në gënjeshtrën tjetër brenda një letre të vetme ka këmbë tepër të shkurtra. Ministrja është gënjeshtare!

Ajo thotë se i jep liri studentëve, ndërkohë që u jep liri për të marrë borxhe!

Ajo thotë se u jep të drejta studentëve, ndërkohë që i detyron të thonë të pavërtetën në lidhje me universitetin!

Ajo thotë se kjo reformë është demokratike, për studentët dhe nga studentët, ndërkohë që nuk ka pyetur as për mendimet, as për kushtet dhe as për mundësitë e tyre në raport me reformën, universitetin dhe shoqërinë!

Ajo thotë se kjo reformë është model i ndjekur nga vendet më të zhvilluara europiane, ndërkohë që këto vende ka kohë që po e braktisin si të falimentuar modelin në fjalë!

Kjo reformë është tregtarizuese dhe klienteliste, dhe si e tillë është e dënuar të mos kalojë. Ndërkohë, as Ministrja Nikolla, me gjithë gënjeshtrat dhe banalitetin e tyre, nuk do te kaloje ne universitet.

Ministrja Lindita Nikolla, bashkë me zv/Ministrin Arbjan Mazniku, shpallen persona të padëshirueshëm dhe ??non grata?? brenda mjediseve të universitetit: për mungesë informimi në masat studentore, për dezinformim publik në lidhje me pasojat e reformës, për shpërfillje të vazhdueshme të zërit studentor dhe për natyrën anti-studentore e anti-shoqërore të reformës në fjalë!

Ne, Universitarët, studentë dhe pedagogë të universiteteve publike, bëjmë të ditur se rezistenca vazhdon! Protestat vazhdojnë, këtë të mërkurë, 6 maj 2015, në orën 10:45 pranë Korpusit Qëndror Universitar për të marshuar më pas drejt Kryeministrisë, do të jemi sërisht edhe më të shumtë, edhe më të fortë, për të mos e lënë këtë reformë të kalojë!

Për Universitetin! Për Shoqërinë!”